ಪ್ರತಿಷ್ಠಿತ ಜೆಇಇ ಪರೀಕ್ಷೆಯಲ್ಲಿ ಶೇ.100 ಅಂಕ ಪಡೆದ ಕಲ್ಪಿತ್

ಉದಯಪುರ: ಪ್ರತಿಷ್ಠಿತ ಪರೀಕ್ಷೆ ಎಂದೇ ಕರೆಸಿಕೊಂಡಿರುವ ಜಾಯಿಂಟ್ ಎಂಟ್ರಸ್ ಎಕ್ಸಾಮ್ (ಜೆಇಇ) 2017ರ ಮುಖ್ಯ ಪರೀಕ್ಷೆಯಲ್ಲಿ ಉದಯಪುರದ ಕಲ್ಪಿತ್ ವೀರ್‌ವಾಲ್ ಶೇ.100ರಷ್ಟು ಅಂಕ ಪಡೆದಿದ್ದು, ದೇಶಕ್ಕೇ ಮೊದಲ ಸ್ಥಾನ ಪಡೆದಿದ್ದಾರೆ. ಉದಯಪುರದ ಎಂಡಿಎಸ್ ಹಿರಿಯ ಮಾಧ್ಯಮಿಕ ಶಾಲೆಯ ವಿದ್ಯಾರ್ಥಿಯಾಗಿರುವ ಕಲ್ಪಿತ್ ವರ್ಷವಿಡೀ ಒಂದೇ ಒಂದು ತರಗತಿಯನ್ನೂ ಮಿಸ್ ಮಾಡಿಕೊಂಡಿಲ್ಲವಂತೆ.

ಟೈಮ್ಸ್ ಆಫ್ ಇಂಡಿಯಾ ಜತೆಗೆ ಮಾತನಾಡಿದ ಕಲ್ಪಿತ್, 'ಕೋಟಾ ಅಥವಾ ಹೈದರಾಬಾದಿಗೆ ಹೋಗಿ ಕೋಚಿಂಗ್ ತಗೋ ಎಂದು ಎಲ್ಲರೂ ಸಲಹೆ ನೀಡುತ್ತಿದ್ದರು. ಆದರೆ ಅಧ್ಯಯನವನ್ನು ನಾನು ಯಾವತ್ತೂ ಹೊರೆ ಎಂದು ಭಾವಿಸಲಿಲ್ಲ. ನಾನು ಕಲಿಕೆಯನ್ನು ಎಂಜಾಯ್ ಮಾಡುತ್ತಿದ್ದೆ. ಉದಯಪುರದಲ್ಲೇ ಇದ್ದು ತರಬೇತಿ ಪಡೆದೆ ಎಂದಿದ್ದಾರೆ.

'ಮೊದಲ ರ್‍ಯಾಂಕ್ ಬರುತ್ತೇನೆ ಎಂದು ಗೊತ್ತಿತ್ತು, ಆದರೆ 360ಕ್ಕೆ 360 ಅಂಕ ಬರುತ್ತದೆ ಎಂದು ಎಣಿಸಿರಲಿಲ್ಲ ಎಂದಿದ್ದಾನೆ 17ರ ಹರೆಯದ ಕಲ್ಪಿತ್. ಇವರ ತಂದೆ ಪುಷ್ಪೇಂದ್ರ ವೀರ್‌ವಾಲ್ ಸರಕಾರಿ ಎಂಬಿ ಆಸ್ಪತ್ರೆಯಲ್ಲಿ ಸುಶ್ರೂಷಕರಾಗಿ ಕೆಲಸ ಮಾಡುತ್ತಿದ್ದು ತಾಯಿ ಪುಷ್ಪಾ ಅವರು ಸರಕಾರಿ ಶಾಲೆಯಲ್ಲಿ ಶಿಕ್ಷಕಿಯಾಗಿದ್ದಾರೆ.

'ನಮ್ಮ ತಂದೆತಾಯಿ ನನ್ನ ಆರೋಗ್ಯದ ಬಗ್ಗೆ ತುಂಬಾ ಕಾಳಜಿ ವಹಿಸಿದ್ದರು. ಕೆಮ್ಮು, ನೆಗಡಿ ಬಂದರೂ ಆತಂಕಕ್ಕೊಳಗಾಗುತ್ತಿದ್ದರು. ಕಾಲೇಜು, ಕೋಚಿಂಗ್ ಕ್ಲಾಸ್‌ಗಳನ್ನು ಹೊರತುಪಡಿಸಿದರೆ ನಿತ್ಯ 5-6 ಗಂಟೆ ಅಧ್ಯಯನ ಮಾಡುತ್ತಿದ್ದೆ' ಎಂದಿದ್ದಾರೆ.

ಕಲ್ಪಿತ್ ಕೇವಲ ಓದಿನಲ್ಲಷ್ಟೇ ಅಲ್ಲ, ಪಠ್ಯೇತರ ಚಟುವಟಿಕೆಗಳಲ್ಲೂ ಭಾಗಿಯಾಗುತ್ತಿದ್ದ. ಕಳೆದ ವರ್ಷ ನೀತಿ ಆಯೋಗ ಆಯೋಜಿಸಿದ್ದ ರಾಷ್ಟ್ರ ಮಟ್ಟದ ಸ್ಪರ್ಧೆಯಲ್ಲಿ ಭಾಗಿಯಾಗಿದ್ದ ಎಂದು ಶಾಲೆಯ ನಿರ್ದೇಶಕ ಶೈಲೇಂದ್ರ ಸೋಮನಿ ತಿಳಿಸಿದ್ದಾರೆ. ಕಲ್ಪಿತ್ ಮುಂದೆ ಐಐಟಿ-ಮುಂಬೈನಲ್ಲಿ ಕಂಪ್ಯೂಟರ್ ಸೈನ್ಸ್ ವ್ಯಾಸಂಗ ಮಾಡಬೇಕೆಂದಿದ್ದಾನೆ.

Udaipur boy Kalpit Veerval has topped the prestigious JEE Main 2017. Kalpit is the first student to score a perfect 100%, or 360 marks, in the JEE Main competition.