ನೀರವ್‌ ಮೋದಿ ಬಂಧನಕ್ಕೆ ಕ್ಷಣಗಣನೆ

ಹೊಸದಿಲ್ಲಿ: ಲಂಡನ್‌ನಲ್ಲಿ ತಲೆಮರೆಸಿಕೊಂಡಿರುವ ವಜ್ರದ ವ್ಯಾಪಾರಿ ನೀರವ್‌ ಮೋದಿ ಬಂಧನಕ್ಕೆ ಕ್ಷಣಗಣನೆ ಆರಂಭವಾಗಿದೆ. ಬ್ರಿಟನ್‌ನ ವೆಸ್ಟ್‌ಮಿನ್‌ಸ್ಟರ್‌ ಕೋರ್ಟ್‌ ನೀರವ್‌ ಮೋದಿ ಬಂಧನಕ್ಕೆ ವಾರಂಟ್‌ ಜಾರಿ ಮಾಡಿದೆ. ಹೀಗಿದ್ದರೂ, ನೀರವ್‌ ಜಾಮೀನು ಕೋರಿ ಅರ್ಜಿ ಸಲ್ಲಿಸಬಹುದು. ಕೋರ್ಟ್‌ ಷರತ್ತುಬದ್ಧ ಜಮೀನು ನೀಡುವ ಸಾಧ್ಯತೆಯೂ ಇದೆ. 13,000 ಕೋಟಿ ರೂ.ಗಳ ಪಂಜಾಬ್‌ ನ್ಯಾಷನಲ್‌ ಬ್ಯಾಂಕ್‌ ಹಗರಣದ ಪ್ರಮುಖ ಆರೋಪಿ ನೀರವ್‌ ಮೋದಿಯನ್ನು ಭಾರತವು ವಿತ್ತಾಪರಾಧಿ ಎಂದು ಘೋಷಿಸಿದೆ. ನೀರವ್‌ ಇತ್ತೀಚೆಗೆ 10 ಲಕ್ಷ ರೂ. ಬೆಲೆಬಾಳುವ ಜಾಕೆಟ್‌ ಧರಿಸಿಕೊಂಡು ಲಂಡನ್‌ನ ಬೀದಿಗಳಲ್ಲಿ ಕಾಣಿಸಿಕೊಂಡಿದ್ದರು.

ಸಿಬಿಐ ಮತ್ತು ಜಾರಿ ನಿರ್ದೇಶನಾಲಯದ ಅಧಿಕಾರಿಗಳ ತಂಡ ಶೀಘ್ರದಲ್ಲಿಯೇ ಲಂಡನ್‌ಗೆ ತೆರಳಲಿದೆ. ಈ ಬೆಳವಣಿಗೆ ಬಗ್ಗೆ ತನಿಖಾಧಿಕಾರಿಗಳು ಹಾಗೂ ಲಂಡನ್‌ನಲ್ಲಿರುವ ಭಾರತೀಯ ರಾಯಭಾರ ಕಚೇರಿ ಅಧಿಕಾರಿಗಳು ತೀವ್ರ ನಿಗಾ ವಹಿಸಿದ್ದಾರೆ.

2018ರ ಆಗಸ್ಟ್‌ನಲ್ಲಿ ನೀರವ್‌ ಮೋದಿಯ ಗಡಿಪಾರು ಪ್ರಕ್ರಿಯೆ ಆರಂಭವಾಗಿತ್ತು. ನೀರವ್‌ ಮೋದಿ ಲಂಡನ್‌ನಲ್ಲಿ ಈ ಹಿಂದೆ ಕಾಣಿಸಿಕೊಂಡಿದ್ದ ವಾಸ್ತವ್ಯವನ್ನು ಬದಲಿಸಿದ್ದು, ಭಿನ್ನ ವಿಳಾಸದಲ್ಲಿದ್ದಾನೆ. ಕಳೆದ ಮಾರ್ಚ್‌ 7ರಂದು ಬ್ರಿಟನ್‌ನ ಗೃಹ ಇಲಾಖೆಯು ಭಾರತ ಸಲ್ಲಿಸಿದ್ದ ಗಡಿಪಾರು ಅರ್ಜಿಯನ್ನು ಕೋರ್ಟ್‌ಗೆ ಸಲ್ಲಿಸಿತ್ತು. 2018ರ ಫೆ.15ರಂದು ಜಾರಿ ನಿರ್ದೇಶನಾಲಯ ನೀರವ್‌ ಮೋದಿ ವಿರುದ್ಧ ಅಕ್ರಮ ಹಣ ವರ್ಗಾವಣೆ ಪ್ರಕರಣ ದಾಖಲಿಸಿತ್ತು. ಭಾರತ ಹಾಗೂ ವಿದೇಶಗಳಲ್ಲಿ ನೀರವ್‌ಗೆ ಸೇರಿದ 1,725 ಕೋಟಿ ರೂ. ಮೌಲ್ಯದ ಆಸ್ತಿಗಳನ್ನು ಮುಟ್ಟುಗೋಲು ಹಾಕಿಕೊಳ್ಳಲಾಗಿದೆ.