ಬುರ್ಕಾ ಧರಿಸಿದರೆ ವಿಟಮಿನ್‌ ಡಿ ಕೊರತೆ!
ಬುರ್ಕಾ ಧರಿಸುವುದರಿಂದ ಇಲ್ಲವೇ ಮುಖವನ್ನು ಪೂರ್ಣ ಮುಚ್ಚುವುದರಿಂದ ಸೂರ್ಯ ಪ್ರಕಾಶದಿಂದ ವಿಫುಲವಾಗಿ ಸಿಗುವ ವಿಟಮಿನ್‌ ಡಿಯ ಕೊರತೆ ಉಂಟಾಗುತ್ತದೆ
ಲಂಡನ್‌: ಬುರ್ಕಾ ಧರಿಸುವುದರಿಂದ ಇಲ್ಲವೇ ಮುಖವನ್ನು ಪೂರ್ಣ ಮುಚ್ಚುವುದರಿಂದ ಸೂರ್ಯ ಪ್ರಕಾಶದಿಂದ ವಿಫುಲವಾಗಿ ಸಿಗುವ ವಿಟಮಿನ್‌ ಡಿಯ ಕೊರತೆ ಉಂಟಾಗುತ್ತದೆ ಎಂದು ಹೇಳಿರುವ ಬ್ರಿಟನ್‌ ಬಲಪಂಥೀಯ ಪಕ್ಷವಾದ ಯುಕೆ ಇಂಡಿಪೆಂಡೆನ್ಸ್‌ ಪಾರ್ಟಿ ಸಾರ್ವಜನಿಕ ಸ್ಥಳಗಳಲ್ಲಿ ಬುರ್ಕಾ ಧರಿಸುವುದನ್ನು ನಿಷೇಧಿಸುವುದಾಗಿ ಪ್ರಣಾಳಿಕೆಯಲ್ಲಿ ಘೋಷಿಸಿದೆ.
ಬುರ್ಕಾ ಧಾರಣೆಯಿಂದ ಗುರುತನ್ನು ಮರೆಮಾಚಿದಂತಾಗುತ್ತದೆ, ಸಂವಹನಕ್ಕೆ ಅಡ್ಡಿಯಾಗುತ್ತದೆ, ಉದ್ಯೋಗವಕಾಶಕ್ಕೆ ಸೀಮಿತತೆ ಒದಗುತ್ತದೆ, ಮತ್ತು ಗೃಹ ಹಿಂಸೆಯ ಸಾಕ್ಷ್ಯವನ್ನು ಮುಚ್ಚಿಹಾಕುತ್ತದೆ, ಎಲ್ಲಕ್ಕಿಂತ ಹೆಚ್ಚಾಗಿ ದೇಹಕ್ಕೆ ಅತ್ಯಂತ ಅಗತ್ಯವಿರುವ, ಸೂರ್ಯನ ಬೆಳಕಿನಿಂದ ಸಿಗುವ ವಿಟಮಿನ್‌ ಡಿ ಸಿಗದಂತೆ ಮಾಡುತ್ತದೆ ಎಂದು ಪಕ್ಷದ ಪ್ರಣಾಳಿಕೆಯನ್ನು ವಿವರಿಸಲಾಗಿದೆ.
ಮ್ಯಾಂಚೆಸ್ಟರ್‌ನ ಸಂಗೀತ ಕಾರ್ಯಕ್ರಮದಲ್ಲಿ ಸಂಭವಿಸಿದ ಬಾಂಬ್‌ ಸ್ಫೋಟ 22 ಮಂದಿಯನ್ನು ಬಲಿ ಪಡೆದ ಬೆನ್ನಿಗೇ ತನ್ನ ಚುನಾವಣೆ ಪ್ರಚಾರಕ್ಕಿಳಿದ ಪೌಲ್‌ ನುಟ್ಟಾಲ್‌ ನೇತೃತ್ವದ ಪಕ್ಷ, ಬುರ್ಕಾ ನಿಷೇಧವನ್ನು ತನ್ನ ಪ್ರಮುಖ ಅಜೆಂಡಾ ಮಾಡಿಕೊಂಡಿದೆ.
ಮುಖ ಮುಚ್ಚಿಕೊಳ್ಳುವಂತ ನಡೆಗಳು ಒಗ್ಗಟ್ಟಿನ ಪ್ರತಿಕೂಲಗಳು. ಈ ರೀತಿಯ ಪ್ರತ್ಯೇಕತಾವಾದ, ವಿಭಜನೆ ಮತ್ತು ದೌರ್ಜನ್ಯದ ಅಮಾನವೀಯ ಸಂಕೇತಗಳನ್ನು ಒಪ್ಪಲಾಗದು ಎಂದು ಹೇಳಿರುವ ಪಕ್ಷ, ನಾವು ಎಲ್ಲ ಮಹಿಳೆಯರಿಗೆ ಸಮಾನ ಅವಕಾಶ ಸಿಗಬೇಕು ಎಂದು ಬಯಸುತ್ತೇವೆ. ಅವರು ಬದುಕಿನ ಎಲ್ಲ ವಿಭಾಗಗಳಲ್ಲಿ, ಉದ್ಯೋಗಗಳಲ್ಲಿ ಮುಕ್ತವಾಗಿ ತೊಡಗಿಸಿಕೊಳ್ಳಬಹುದು ಎಂದಿದೆ.