ಅಜಂ ಖಾನ್‌ ಮೇಲಿವೆ 72 ಕೇಸ್: 'ಹಿಸ್ಟರಿ ಶೀಟರ್‌' ಎಂದು ಘೋಷಿಸಲು ಪೊಲೀಸರ ನಿರ್ಧಾರ

ಲಖನೌ: ಸದಾ ಕಾಲ ವಿವಾದಿತ ಹೇಳಿಕೆಗಳನ್ನು ನೀಡುವ ಸಮಾಜವಾದಿ ಪಕ್ಷದ ಸಂಸದ ಮೊಹಮ್ಮದ್‌ ಅಜಂ ಖಾನ್‌ ಮೇಲೆ 72 ಪೊಲೀಸ್‌ ಪ್ರಕರಣಗಳು ದಾಖಲಾಗಿವೆ.

ಭೂ ಕಬಳಿಕೆ, ವಿವಾದಿತ ಹೇಳಿಕೆ ಸೇರಿದಂತೆ ಅನೇಕ ಬಗೆಯ ಕ್ರಿಮಿನಲ್‌ ಕೇಸ್‌ಗಳು ಅವರ ಮೇಲಿದ್ದು, ಅಜಂ ಖಾನ್‌ ಅವರನ್ನು 'ಹಿಸ್ಟರಿ ಶೀಟರ್‌' ಎಂದು ಘೋಷಿಸಲು ಉತ್ತರ ಪ್ರದೇಶ ಪೊಲೀಸ್‌ ಇಲಾಖೆ ನಿರ್ಧರಿಸಿದೆ.

72 ಪ್ರಕರಣಗಳಲ್ಲಿ 15ರಲ್ಲಿ ದೋಷಾರೋಪ ಪಟ್ಟಿ ದಾಖಲಾಗಿದ್ದರೆ, ಉಳಿದ ಕೇಸ್‌ಗಳ ತನಿಖೆ ನಡೆಯುತ್ತಿದೆ. ರಾಂಪುರ ಸಮೀಪದ ಮೊಹಮ್ಮದ್‌ ಅಲಿ ಜೌಹಾರ್‌ ವಿಶ್ವವಿದ್ಯಾಲಯದ ಸ್ಥಾಪನೆ ವೇಳೆ ರೈತರ ಭೂಮಿಯನ್ನು ಅಕ್ರಮವಾಗಿ ಕಬಳಿಸಿರುವ ಆರೋಪ ಅವರ ಮೇಲಿದ್ದು, ಈ ಪ್ರಕರಣ ಸಂಬಂಧ ಕೆಲವು ದಿನಗಳ ಹಿಂದಷ್ಟೇ 27 ಎಫ್‌ಐಆರ್‌ಗಳು ದಾಖಲಾಗಿವೆ.

ಈ ಹಿಂದೆ ಲೋಕಸಭೆ ಚುನಾವಣೆ ವೇಳೆ ಜಯಪ್ರದಾ ಅವರನ್ನು ಗುರಿಯಾಗಿಸಿಕೊಂಡು 'ಖಾಕಿ ಚಡ್ಡಿ' ಹೇಳಿಕೆ ನೀಡಿ ವಿವಾದಕ್ಕೆ ಗುರಿಯಾಗಿದ್ದರು.