ಹತ್ತೇ ದಿನದಲ್ಲಿ ತಲಾಖ್ ಎಂದವನಿಗೆ ಬಿತ್ತು ಭಾರಿ ದಂಡ!

ಸಂಬಾಲ್: ತ್ರಿವಳಿ ತಲಾಖ್ ನಿಷೇಧದ ಬಗ್ಗೆ ರಾಷ್ಟ್ರಾದ್ಯಂತ ಚರ್ಚೆಯಲ್ಲಿರುವ ಸಂದರ್ಭದಲ್ಲೇ, ಉತ್ತರ ಪ್ರದೇಶದ ಸ್ಥಳೀಯ ಪಂಚಾಯಿತಿಯೊಂದು ಪತ್ನಿಗೆ ತ್ರಿವಳಿ ತಲಾಖ್ ನೀಡಿದ ವ್ಯಕ್ತಿಯೊಬ್ಬನಿಗೆ 2 ಲಕ್ಷ ರೂ. ದಂಡ ವಿಧಿಸಿದೆ. ಪತ್ನಿಗೆ ತಿಂಗಳಿಗೆ 60,000 ರೂ.ಗಳನ್ನು ನೀಡುವಂತೆ ಆದೇಶಿಸಿದೆ. ಜತೆಗೆ ಮದುವೆ ಸಂದರ್ಭ ನೀಡಿದ್ದ ವರದಕ್ಷಿಣೆಯನ್ನು ಹಿಂತಿರುಗಿಸುವಂತೆ ತಾಕೀತು ಮಾಡಿದೆ.

ಸಂಬಾಲ್‌ನ ಮದರಸಾ ಖಲಿಲ್ ಉಲ್ ಉಲೂಮ್‌ನ ಟರ್ಕ್ ಸಮುದಾಯದ ಪಂಚಾಯಿತಿಯಲ್ಲಿ ಭಾನುವಾರ ಈ ಘಟನೆ ನಡೆದಿದೆ. 45 ವರ್ಷದ ವ್ಯಕ್ತಿ 22 ವರ್ಷದ ಯುವತಿಯನ್ನು ಮದುವೆಯಾಗಿದ್ದರು. ಕೇವಲ 10 ದಿನಗಳ ಸಂಸಾರ ನಡೆಸಿದ ಆತನಿಗೆ ಪತ್ನಿ ಬೋರಾಗಿದ್ದಳು. ಮೂರು ಬಾರಿ ತಲಾಖ್ ಹೇಳಿದ್ದಾನೆ. ತವರು ಮನೆಗೆ ಹೊರಡುವಂತೆ ಸೂಚಿಸಿದ್ದಾನೆ.

ಯುವತಿಯ ಪೋಷಕರು ಟರ್ಕ್ ಪಂಚಾಯಿತಿಗೆ ದೂರು ನೀಡಿದ್ದರು. ದಂಡದ ಮೊತ್ತವನ್ನು ನಗದು ರೂಪದಲ್ಲಿ ತಕ್ಷಣ ನೀಡುವಂತೆ ಪಂಚಾಯಿತಿ ತಿಳಿಸಿದೆ. ಮುಂದಿನ ದಿನಗಳಲ್ಲಿ ಅನಗತ್ಯವಾಗಿ ತ್ರಿವಳಿ ತಲಾಖ್ ನೀಡಿ ಪತ್ನಿಯನ್ನು ತ್ಯಜಿಸುವ ಕೆಟ್ಟ ಸಂಪ್ರದಾಯಕ್ಕೆ ತೆರೆ ಬೀಳಬೇಕು ಎಂದು ಟರ್ಕ್ ಪಂಚಾಯಿತಿ ತಿಳಿಸಿದೆ.