ಉ.ಪ್ರ. ಚುನಾವಣೆ: ಶೇ.61 ಮತದಾನ
ಉತ್ತರ ಪ್ರದೇಶದ ವಿಧಾನಸಭೆ ಚುನಾವಣೆಗೆ ನಡೆದ 3ನೇ ಹಂತದ ಮತದಾನ ಸಣ್ಣಪುಟ್ಟ ಅಹಿತಕರ ಘಟನೆಗಳ ನಡುವೆ ಬಹುತೇಕ ಶಾಂತಿಯುತವಾಗಿದ್ದು, ಶೇಕಡ 61.16 ರಷ್ಟು ಮತದಾನ ದಾಖಲಾಗಿದೆ.
ಲಖನೌ: ಉತ್ತರ ಪ್ರದೇಶದ ವಿಧಾನಸಭೆ ಚುನಾವಣೆಗೆ ನಡೆದ 3ನೇ ಹಂತದ ಮತದಾನ ಸಣ್ಣಪುಟ್ಟ ಅಹಿತಕರ ಘಟನೆಗಳ ನಡುವೆ ಬಹುತೇಕ ಶಾಂತಿಯುತವಾಗಿದ್ದು, ಶೇಕಡ 61.16 ರಷ್ಟು ಮತದಾನ ದಾಖಲಾಗಿದೆ.
ಏಳು ಹಂತದ ಚುನಾವಣೆಯಲ್ಲಿ ಈಗ ಮೂರು ಹಂತ ಮುಕ್ತಾಯಗೊಂಡಿದ್ದು, ಫೆ. 23, 27, ಮಾರ್ಚ್ 4 ಮತ್ತು 8ರಂದು ಮುಂದಿನ ಹಂತದಲ್ಲಿ ಮತದಾನ ನಡೆಯಲಿದೆ. ಭಾನುವಾರ ನಡೆದ ಚುನಾವಣೆಯಲ್ಲಿ ಲಖನೌ, ಇಟಾವ, ಮೈನ್ಪುರಿ ಸೇರಿದಂತೆ ಪ್ರಮುಖ ಜಿಲ್ಲೆಗಳ 69 ಕ್ಷೇತ್ರಗಳಿಗೆ ಮತದಾನವಾಗಿದ್ದು, 826 ಘಟಾನುಘಟಿ ಅಭ್ಯರ್ಥಿಗಳ ಭವಿಷ್ಯ ಮತಪೆಟ್ಟಿಗೆಯಲ್ಲಿ ಅಡಕವಾಗಿದೆ.
ಈ ಕ್ಷೇತ್ರಗಳಲ್ಲಿ ಎಸ್ಪಿ ವರಿಷ್ಠ ಮುಲಾಯಂ ಸಿಂಗ್ ಯಾದವ್ ಕುಟುಂಬದ ಪ್ರಭಾವ ಹೆಚ್ಚಿರುವ ಹಿನ್ನೆಲೆಯಲ್ಲಿ ಮೂರನೇ ಹಂತದ ಮತದಾನ ಸಮಾಜವಾದಿ ಪಕ್ಷಕ್ಕೆ ಮುಖ್ಯವಾಗಿದೆ. ಎಸ್ಪಿಯಿಂದ ಸ್ಪರ್ಧಿಸಿರುವ ಮುಲಾಯಂ ಅವರ ಸೊಸೆ ಅಪರ್ಣಾ, ಬಿಜೆಪಿಯ ರಿಟಾ ಬಹುಗುಣ, ಬಿಎಸ್ಪಿಯ ಬ್ರಿಜೇಶ್ ಪಾಠಕ್ ಕಣದಲ್ಲಿರುವ ಪ್ರಮುಖರು.
2012ರ ವಿಧಾನಸಭೆ ಹಾಗೂ 2014ರ ಲೋಕಸಭೆ ಚುನಾವಣೆಯಲ್ಲಿ ಈ ಕ್ಷೇತ್ರಗಳಲ್ಲಿ ಕ್ರಮವಾಗಿ ಶೇಕಡ 60 ಮತ್ತು ಶೇಕಡ 58.43ರಷ್ಟು ಮತದಾನ ದಾಖಲಾಗಿತ್ತು.
ಮತ ಚಲಾಯಿಸಿದ ಗಣ್ಯರು:
ಕೇಂದ್ರ ಗೃಹ ಸಚಿವ ರಾಜನಾಥ್ ಸಿಂಗ್ ಕುಟುಂಬ ಸಮೇತ ಹಾಗೂ ಬಿಎಸ್ಪಿ ನಾಯಕಿ ಮಾಯಾವತಿ ಅವರು ಲಖನೌದಲ್ಲಿ ಸರದಿ ಸಾಲಲ್ಲಿ ಬಂದು ಮತ ಚಲಾಯಿಸಿದರು. ಇನ್ನು ಮುಖ್ಯಮಂತ್ರಿ ಆಖಿಲೇಶ್ ಯಾದವ್ ಇಟಾವದ ಸೈಫಿಯಲ್ಲಿ ಮತ ಹಾಕಿದರು. ಮತದಾನದ ಬಳಿಕ ಬಿಜೆಪಿ, ಸಮಾಜವಾದಿ ಪಕ್ಷ ಹಾಗೂ ಬಹುಜನ ಸಮಾಜ ಪಕ್ಷದ ನಾಯಕರು ಗೆಲುವು ತಮ್ಮದೇ. ಈ ಬಾರಿ ತಮ್ಮ ಪಕ್ಷದ ಸರಕಾರವೇ ರಚನೆಯಾಗಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದರು.
ನಗದು, ಮದ್ಯ ವಶ
ಮೂರನೇ ಹಂತದ ಚುನಾವಣೆಯಲ್ಲಿ 38.40 ಕೋಟಿ ರೂ. ನಗದು ಹಾಗೂ 2.04 ಲಕ್ಷ ರೂ. ಮೌಲ್ಯದ ಮದ್ಯ ವಶಪಡಿಸಿಕೊಳ್ಳಲಾಗಿದೆ ಎಂದು ಚುನಾವಣಾ ಆಯೋಗ ಹೇಳಿದೆ. ಮತಗಟ್ಟೆಗಳಿಗೆ ಭಾರಿ ಭದ್ರತೆ ಒದಗಿಸಿರುವ ಹಿನ್ನೆಲೆಯಲ್ಲಿ ಹಣಬಲ, ತೋಳ್ಬಲಕ್ಕೆ ಕಡಿವಾಣ ಬಿದ್ದಿದೆ.