ಶೌಚಾಲಯ ಇಲ್ಲದ್ದಕ್ಕೆ ಪತಿಗೆ ಡಿವೋರ್ಸ್‌

ಬಾಗಾ: ಬಿಹಾರದ ಪಶ್ಚಿಮ ಚಂಪಾರಣ್‌ ಜಿಲ್ಲೆಯ ದಹವಾ ಗ್ರಾಮದ ಮನೆಯಲ್ಲಿ ಪತಿ ಶೌಚಾಲಯ ನಿರ್ಮಿಸಿಲ್ಲ ಎಂಬ ಕಾರಣಕ್ಕೆ ನವ ವಿವಾಹಿತೆ ವಿಚ್ಛೇದನಕ್ಕೆ ಅರ್ಜಿ ಹಾಕಿದ್ದಾರೆ.

ಉತ್ತರ ಪ್ರದೇಶದ ಖುಷಿನಗರ್‌ ಜಿಲ್ಲೆಯ ಅರ್ಚನಾ ಗೌತಮ್‌ (21) ಹಾಗೂ ಬಾಬುಲ್‌ ರಾಮ್‌ ಮೇ 20ರಂದು ವಿವಾಹವಾಗಿದ್ದರು. ಶೌಚಾಲಯ ಕಟ್ಟಿಸುವುದಾಗಿ ಬಾಬುಲ್‌ ಕುಟುಂಬದವರು ಹುಡುಗಿ ಮನೆಯವರಿಗೆ ಮದುವೆಗೆ ಮೊದಲು ಭರವಸೆ ನೀಡಿದ್ದರು. ಆದರೆ, ಬಾಬುಲ್ ಮನೆಯವರು ಮಾತಿಗೆ ತಪ್ಪಿದ್ದರು. ಇದರಿಂದ ಬೇಸರಗೊಂಡ ಅರ್ಚನಾ ವಿಚ್ಛೇದನಕ್ಕೆ ಅರ್ಜಿ ಸಲ್ಲಿಸಿ, ತವರು ಮನೆಗೆ ವಾಪಸಾಗಿದ್ದಾರೆ.

'ಮನೆಯಲ್ಲಿ ಶೌಚಾಲಯ ಇಲ್ಲದ ಕಾರಣ ಆಕೆ ಬಯಲಿಗೆ ಹೋಗಬೇಕಿತ್ತು. ಹಣವಿಲ್ಲದ ಕಾರಣ ಬಾಬುಲ್‌ ಮನೆಯವರಿಗೆ ಹ್ಯಾಂಡ್‌ ಪಂಪ್‌ ಹಾಕಿಸಲು ಹಾಗೂ ಶೌಚಾಲಯ ನಿರ್ಮಿಸಲು ಸಾಧ್ಯವಾಗಲಿಲ್ಲ. ಬಾಬುಲ್‌ ದಿನಗೂಲಿ ನೌಕರ. ಎರಡು ಕಡೆಯವರ ವಾದ ಆಲಿಸಿದ ನಂತರ ಅರ್ಚನಾಳ ವಿಚ್ಛೇದನ ಅರ್ಜಿಯನ್ನು ಪಂಚಾಯತಿ ಅಂಗೀಕರಿಸಿತು,'ಎಂದು ಸರಪಂಚ್ ವಿನೋದ್‌ ಚೌಧರಿ ಹೇಳಿದ್ದಾರೆ.

'ಶೈಕ್ಷಣಿಕ ಅರ್ಹತೆ ವಿಚಾರವಾಗಿಯೂ ದಂಪತಿ ನಡುವೆ ಕಲಹ ಇತ್ತು.ಅರ್ಚನಾ ಪದವೀಧರಳಾದರೆ, ಬಾಬುಲ್‌ ಮೆಟ್ರಿಕ್ಯೂಲೇಷನ್‌ ಪೂರ್ಣಗೊಳಿಸಿಲ್ಲ,' ಎಂದು ಗ್ರಾಮಸ್ಥರು ಹೇಳಿದ್ದಾರೆ.