ಆಧಾರ್‌ನಲ್ಲಿ ವಿಳಾಸ ಬದಲಾವಣೆಗೆ ಹೊಸ ವಿಧಾನ: ಯುಐಡಿಎಐ

ಹೊಸದಿಲ್ಲಿ: ಆಧಾರ್‌ ಕಾರ್ಡ್‌ನಲ್ಲಿ ವಿಳಾಸ ಬದಲಾವಣೆ ಮಾಡಲು ಹೊಸ ವಿಧಾನ ಜಾರಿಗೊಳಿಸಲು ಭಾರತೀಯ ವಿಶಿಷ್ಟ ಗುರುತು ಪ್ರಾಧಿಕಾರ ಮುಂದಾಗಿದೆ.

ಪ್ರಸ್ತುತ ವಾಸವಿರುವ ಮನೆಯ ವಿಳಾಸಕ್ಕೆ ಆಧಾರ್‌ ನಲ್ಲಿರುವ ವಿಳಾಸವನ್ನು ನಮೂದಿಸಲು ಸೂಕ್ತ ದಾಖಲೆಗಳಿಲ್ಲವಾದಲ್ಲಿ, ಸೀಕ್ರೆಟ್‌ ಪಿನ್‌ ನಂಬರ್‌ ಮೂಲಕ ಕಾರ್ಡ್‌ನಲ್ಲಿ ವಿಳಾಸ ಮಾರ್ಪಡಿಸಬಹುದಾಗಿದೆ.

ವಾಸವಿರುವ ಮನೆಯ ವಿಳಾಸದಲ್ಲಿ ಸರಕಾರದ ಇತರೆ ಗುರುತು ಚೀಟಿಯ ವಿಳಾಸಗಳು ಇರುವುದಿಲ್ಲ. ಇಂತಹ ಸಂದರ್ಭದಲ್ಲಿ ಹೊಸ ವಿಧಾನದಲ್ಲಿ ವಿಳಾಸ ಬದಲಿಸಬಹುದಾಗಿದೆ. ಪ್ರಸ್ತುತ ವಾಸವಿರುವ ಮನೆಗೆ ಆಧಾರ್‌ ಪ್ರಾಧಿಕಾರದಿಂದ ಸೀಕ್ರೆಟ್‌ ಪಿನ್‌ ನಂಬರ್ ಹೊಂದಿರುವ ಲೆಟರ್‌ ಪೋಸ್ಟ್‌ನಲ್ಲಿ ಬರಲಿದೆ. ಆಧಾರ್‌ ಕೇಂದ್ರದಿಂದ ವಿಳಾಸ ಪರಿಶೀಲನೆ ನಡೆಯುತ್ತದೆ. ಈ ಸೀಕ್ರೆಟ್‌ ನಂಬರ್‌ ಇರುವ ಲೆಟರ್‌ ತೋರಿಸಿದರೆ, ವಿಳಾಸ ಅಪ್ಡೇಟ್‌ ಆಗುತ್ತದೆ. 2019ರ ಏಪ್ರಿಲ್‌ನಿಂದ ಈ ವ್ಯವಸ್ಥೆ ಜಾರಿಯಾಗಲಿದ್ದು, ಹೊಸ ವರ್ಷದಿಂದ ಪ್ರಾಯೋಗಿಕವಾಗಿ ಆರಂಭಗೊಳ್ಳಲಿದೆ.

ವೆಬ್‌ಸೈಟ್‌ನಲ್ಲಿ ಸೀಕ್ರೆಟ್‌ ನಂಬರ್‌ ವಿಧಾನ ಮೂಲಕ ಆಧಾರ್‌ ಪಡೆಯಲು ಆಯ್ಕೆ ನೀಡಲಾಗುತ್ತದೆ ಎಂದು ಪ್ರಾಧಿಕಾರ ಹೇಳಿದೆ. ಪ್ರಸ್ತುತ ಜನರು ಇಲಾಖೆ ಹೇಳಿರುವ 35 ದಾಖಲೆಗಳ ಪೈಕಿ ಒಂದೆರಡನ್ನು ಅರ್ಜಿಯೊಂದಿಗೆ ನೀಡಬೇಕು. ಪಾಸ್‌ಪೋರ್ಟ್‌, ಬ್ಯಾಂಕ್‌ ಪಾಸ್‌ ಪುಸ್ತಕ, ಮತದಾನ ಗುರುತು ಚೀಟಿ, ವಾಹನ ಚಲಾವಣೆ ಪರವಾನಗಿ ಪತ್ರ, ಮದುವೆ ಪ್ರಮಾಣ ಪತ್ರ, ಮನೆ ಬಾಡಿಗೆ ಪತ್ರಗಳನ್ನು ನೀಡಬಹುದಾಗಿದೆ.

ಕಾರ್ಮಿಕರು, ವಲಸಿಗರಲ್ಲಿ ವಾಸಿಸುವ ಸ್ಥಳದ ದಾಖಲೆಗಳು ಇರುವುದಿಲ್ಲ. ಅಂತಹ ಸಂದರ್ಭದಲ್ಲಿ ಈ ಆಯ್ಕೆಯನ್ನು ಬಳಸಬಹುದು ಎಂದು ಭಾರತೀಯ ವಿಶಿಷ್ಟ ಗುರುತು ಪ್ರಾಧಿಕಾರ(ಯುಐಡಿಎಐ) ತಿಳಿಸಿದೆ.