ವಾಷಿಂಗ್ಟನ್‌: 'ಎಚ್‌1-ಬಿ' ವೀಸಾ ನೀತಿಯನ್ನು ಕಠಿಣಗೊಳಿಸುವ ಮೂಲಕ ಅಮೆರಿಕದಲ್ಲಿರುವ ಭಾರತೀಯ ಮೂಲದ ಸಾವಿರಾರು ಟೆಕ್ಕಿಗಳು ಮತ್ತು ಉದ್ಯೋಗಾಕಾಂಕ್ಷಿಗಳಲ್ಲಿ ಆತಂಕ ಮೂಡಿಸಿದ್ದ ಟ್ರಂಪ್‌ ಆಡಳಿತ, ಇದೀಗ ಮತ್ತೊಂದು ಹೊಸ ಆಘಾತ ನೀಡುವ ಸಾಧ್ಯತೆಯಿದೆ.
'ಎಚ್‌-1ಬಿ' ವೀಸಾ ಅಡಿಯಲ್ಲಿ ಅಮೆರಿಕದಲ್ಲಿರುವ ಉದ್ಯೋಗಿಗಳ ಪತ್ನಿ/ಪತಿಯೂ ಸ್ಥಳೀಯವಾಗಿ ನೌಕರಿ ಮಾಡಲು ಒಬಾಮಾ ಸರಕಾರ ನೀಡಿದ್ದ ಅನುಮತಿಯನ್ನು ರದ್ದುಗೊಳಿಸಲು ಅಧ್ಯಕ್ಷ ಟ್ರಂಪ್‌ ಆಡಳಿತ ಚಿಂತನೆ ನಡೆಸಿದೆ.
ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಅವರ 'ಬೈ ಅಮೆರಿಕನ್‌ ಆ್ಯಂಡ್‌ ಹೈರ್‌ ಅಮೆರಿಕನ್‌' (ಅಮೆರಿಕದ ವಸ್ತುಗಳನ್ನೇ ಖರೀದಿಸಿ ಮತ್ತು ಅಮೆರಿಕದವರಿಗೇ ಉದ್ಯೋಗ ನೀಡಿ) ಎಂಬ ನೀತಿಯಡಿ ಈ ನಿಯಮ ಜಾರಿಗೆ ತರಲಾಗುತ್ತಿದೆ ಎಂದು ಅಮೆರಿಕದ ಆಂತರಿಕ ಭದ್ರತಾ ಇಲಾಖೆ ತಿಳಿಸಿದೆ.
ನಿಯಮ ಜಾರಿಯಾದರೆ ಅಮೆರಿಕದಲ್ಲಿರುವ ಐಟಿ ಕಂಪನಿಗಳಿಗೂ ಕೌಶಲಯುತ ಉದ್ಯೋಗಿಗಳ ಕೊರತೆ ಕಾಡುವ ಸಾಧ್ಯತೆಯಿದೆ.