ಭಾರತದ ಮಿಲಿಟರಿ ವ್ಯವಸ್ಥೆ ಆಧುನಿಕರಣಕ್ಕೆ ಅಮೆರಿಕ ಸಿದ್ಧ

ವಾಷಿಂಗ್ಟನ್‌: ಭಾರತೀಯ ಸೇನೆಯ ಸಾಮರ್ಥ್ಯವನ್ನು ಹೆಚ್ಚಿಸಲು ಅಮೆರಿಕಾ ಸಿದ್ಧವಾಗಿದ್ದು, ಎರಡೂ ರಾಷ್ಟ್ರಗಳ ಸೈನಿಕರು ಒಟ್ಟು ಸೇರಿದರೆ ಗಮನಾರ್ಹ ಮತ್ತು ಅರ್ಥಪೂರ್ಣ ದಾರಿಯಲ್ಲಿ ಸಾಗಬಹುದು ಎಂದು ಅಮೆರಿಕ ಕಮಾಂಡರ್‌ ಅಭಿಪ್ರಾಯ ಪಟ್ಟಿದ್ದಾರೆ.

ಕಳೆದ ಹತ್ತು ವರ್ಷಗಳಲ್ಲಿ ಭಾರತ ಹಾಗೂ ಅಮೆರಿಕ ನಡುವೆ 15 ಬಿಲಿಯನ್‌ ಅಮೆರಿಕನ್‌ ಡಾಲರ್‌ಗಳಷ್ಟು ರಕ್ಷಣಾ ವ್ಯವಹಾರ ನಡೆಸಿದ್ದು, ಮುಂದಿನ ವರ್ಷಗಳಲ್ಲಿ ಇದರ ಸಂಖ್ಯೆ ಏರುವ ಸಾಧ್ಯತೆ ಹೆಚ್ಚಿದೆ. ಈ ಎಲ್ಲಾ ಬೆಳವಣಿಗೆಯ ಕುರಿತು ಅಭಿಪ್ರಾಯ ಹೊರ ಹಾಕಿರುವ ಅಮೆರಿಕ ಪೆಸಿಫಿಕ್ ಕಮಾಂಡರ್‌ ಅಡ್ಮಿರಲ್ ಹ್ಯಾರಿ ಹ್ಯಾರಿಸ್, 'ನನ್ನ ಪ್ರಕಾರ ಭಾರತದ ಮಿಲಿಟರಿ ವ್ಯವಸ್ಥೆಯನ್ನು ಆಧುನಿಕಗೊಳಿಸಲು ಅಮೆರಿಕ ತಯಾರಾಗಿದೆ' ಎಂದು ಹೇಳಿದ್ದಾರೆ.

ಭಾರತ ಅಮೆರಿಕ ನಡುವಿನ ರಕ್ಷಣಾ ಸಂಬಂಧಕ್ಕೆ ಹೆಚ್ಚು ಪ್ರಾಶಸ್ತ್ಯ ನೀಡುತ್ತಿರುವ ಹ್ಯಾರಿಸ್‌, ' ಒಂದು ವೇಳೆ ಭಾರತ-ಅಮೆರಿಕ ಸೇನೆ ಒಟ್ಟಾಗಿ ಶಸ್ತ್ರಾಸ್ತ್ರ ಅಭ್ಯಾಸ ನಡೆಸಿದರೆ, ಭಾರತದ ಮಿಲಿಟರಿ ವ್ಯವಸ್ಥೆಯಲ್ಲಿ ಗಮನಾರ್ಹ ಮತ್ತು ಅರ್ಥಪೂರ್ಣ ಬದಲಾವಣೆ ತರಬಹುದು ಎಂದು ಹೇಳಿದ್ದಾರೆ.

ಮಲಬಾರ್‌ನ ತ್ರಿಪಕ್ಷೀಯ ನೌಕಾ ವ್ಯಾಯಾಮ (ಭಾರತ, ಜಪಾನ್‌ ಹಾಗೂ ಅಮೆರಿಕ)ದ ಮೂಲಕ ನಾವು ಭಾರತದ ಜತೆ ಉತ್ತಮ ಭಾಂದವ್ಯ ಹೊಂದಿದ್ದೇವೆ, ಅಲ್ಲದೇ 1995ರ ಸಂದರ್ಭದಲ್ಲಿ ಮಲಬಾರ್ ನೌಕಾಭ್ಯಾಸದಲ್ಲಿ ಪಾಲ್ಗೊಂಡಿದ್ದೆ ಎಂದು ತಮ್ಮ ಅಂದಿನ ದಿನಗಳ ನೆನಪಿಸಿಕೊಂಡಿದ್ದಾರೆ.

ಆದರೆ ಈ ಅಭ್ಯಾಸಗಳಲ್ಲಿ ಇದೀಗ ಹೆಚ್ಚಿನ ಬದಲಾವಣೆಯಾಗಿದ್ದು, ಈ ಸಂಬಂಧಕ್ಕೆ ಆಸ್ಟ್ರೇಲಿಯಾ ಕೂಡಾ ಪಾಲ್ಗೊಳ್ಳಬಹುದು ಎಂದು ಅಭಿಪ್ರಾಯ ಪಟ್ಟಿದ್ದಾರೆ.

ಇದೇ ವೇಳೆ ಭಾರತ-ಚೀನಾ ನಡುವೆ ಸೃಷ್ಠಿಯಾಗಿರುವ ಬಿಕ್ಕಟ್ಟಿನ ಕುರಿತು ಕೇಳ ಬಂದ ಪ್ರಶ್ನೆಗೆ ಉತ್ತರಿಸಲು ನಿರಾಕರಿಸಿರುವ ಹ್ಯಾರಿಸ್‌, ' ಇಂತಹ ಗುಪ್ತಚರ ಮಾಹಿತಿಗಳನ್ನು ನಾನು ಇಲ್ಲಿ ಹಂಚಿಕೊಳ್ಳಲು ಬಯಸುವುದಿಲ್ಲ, ಹೀಗಾಗಿ ಈ ಪ್ರಶ್ನೆಗೆ ಉತ್ತರಿಸಲು ನಾನು ಬಯಸುವುದಿಲ್ಲ. ಆದರೆ ನಮ್ಮ ಎರಡು ರಾಷ್ಟ್ರಗಳ ಬಾಂಧವ್ಯ ಅಭಿವೃದ್ಧಿಯಿಂದ ಅಮೆರಿಕಾದ ಸಂಯುಕ್ತ ಸಂಸ್ಥಾನಗಳಿಗಂತೂ ಸಹಾಯವಾಗುತ್ತದೆ' ಎಂದು ಹೇಳಿದ್ದಾರೆ.

America ready to help india modernise its military