ಅಯೋಧ್ಯೆಯಲ್ಲಿ ಶ್ರೀರಾಮಾನುಜಾಚಾರ್ಯರ ಪುತ್ಥಳಿ ಅನಾವರಣ ಮಾಡಿದ ಯೋಗಿ ಆದಿತ್ಯನಾಥ್

ಅಯೋಧ್ಯೆ: ಪ್ರಧಾನಿ ನರೇಂದ್ರ ಮೋದಿಯವರ ನೇತೃತ್ವದಲ್ಲಿ ರೂಪುಗೊಳ್ಳುತ್ತಿರುವ ನವ ಭಾರತವು ತನ್ನ ಸಂಸ್ಕೃತಿ ಹಾಗೂ ಅಧ್ಯಾತ್ಮಿಕ ಪರಂಪರೆಯ ಹೆಮ್ಮೆಯನ್ನು ಹಿಂದೆಂದಿಗಿಂತಲೂ ಈಗ ಹೆಚ್ಚು ಅಗಾಧವಾಗಿ ಹೊರಸೂಸುವಂತಾಗಿದೆ ಎಂದು ಉತ್ತರ ಪ್ರದೇಶದ ಮುಖ್ಯಮಂತ್ರಿ ಯೋಗಿ ಆಧಿತ್ಯನಾಥ್ ಹೇಳಿದ್ದಾರೆ.

ಅಯೋಧ್ಯೆಯಲ್ಲಿ ನೂತನವಾಗಿ ಸ್ಥಾಪಿಸಲಾಗಿರುವ ಶ್ರೀರಾಮಾನುಜಾಚಾರ್ಯರವರ ಪುತ್ಥಳಿಯನ್ನು ಅನಾವರಣಗೊಳಿಸಿ ಅವರು ಮಾತನಾಡಿದರು. ಕಳೆದ ಡಿಸೆಂಬರ್ ನಲ್ಲಿ ಮೋದಿಯವರು ಕಾಶಿ ಕಾರಿಡಾರ್ ಅನಾವರಣಗೊಳಿಸಿದ್ದರು. ಮೊನ್ನೆಯಷ್ಟೇ ಮಹಾಕಾಳ ದೇಗುಲ ಕಾರಿಡಾರ್ ನ ಮೊದಲ ಹಂತದ ಸೌಲಭ್ಯಗಳನ್ನು ಅವರು ಅನಾವರಣಗೊಳಿಸಿದ್ದಾರೆ. ಉತ್ತರಾಖಾಂಡದ ಕೇದಾರನಾಥ ದೇಗುಲ ಕಾರಿಡಾರ್ ನ ಮೊದಲ ಹಂತದ ಸೌಲಭ್ಯಗಳ ಕಾಮಗಾರಿ ಜಾರಿಯಲ್ಲಿದೆ. ಅಯೋಧ್ಯೆಯಲ್ಲಿ ಭವ್ಯವಾದ ರಾಮಮಂದಿರ ನಿರ್ಮಾಣವಾಗುತ್ತಿದೆ. ಈ ಎಲ್ಲವೂ ದೇಶದ ಸಂಸ್ಕೃತಿ ಹಾಗೂ ಅಧ್ಯಾತ್ಮಕ ಪರಂಪರೆಯನ್ನು ವಿಶ್ವಕ್ಕೆ ಸಾರುವ ಪ್ರಯತ್ನಗಳಾಗಿವೆ ಎಂದು ಅವರು ಹೇಳಿದರು.

Ayodhya Ram Mandir - ಅಯೋಧ್ಯೆ ರಾಮಮಂದಿರ ನಿರ್ಮಾಣ ಕಾರ್ಯ ಶೇ.50ರಷ್ಟು ಪೂರ್ಣ:ಯೋಗಿ ಆದಿತ್ಯನಾಥ್
“ಅಯೋಧ್ಯೆಯಲ್ಲಿ 120 ವರ್ಷಗಳ ನಂತರ, ರಾಮಾನುಜಾಚಾರ್ಯರ ಪುತ್ಥಳಿ ಅನಾವರಣಗೊಂಡಿದೆ. ನಮ್ಮ ದೇಶವು ಪುರಾತನ ಜ್ಞಾನಸಂಪುತ್ತು ಹಾಗೂ ಶ್ರೀರಾಮಾನುಜಾಚಾರ್ಯರ ಪವಿತ್ರ ಬೋಧನೆಗಳು ತೋರಿದ ಹಾದಿಯಲ್ಲೇ ಸಾಗುತ್ತಿದೆ. ರಾಮಾನುಜಾಚಾರ್ಯರ ಬೋಧನೆಗಳು ಲೌಕಿಕ ಬಂಧನಗಳನ್ನು ತೊಡೆದು ಅಧ್ಯಾತ್ಮದ ಹಾದಿಯಲ್ಲಿ ಮೋಕ್ಷ ಪಡೆಯುವ ದಾರಿಯನ್ನು ತೋರಿಸುತ್ತವೆ. ಅಷ್ಟೇ ಅಲ್ಲದೆ, ನಮ್ಮನ್ನು ಕೆಟ್ಟ ಶಕ್ತಿಗಳಿಂದ ಪಾರಾಗಲು ಸಹಾಯ ಮಾಡುತ್ತವೆ’’ ಎಂದು ಅವರು ಹೇಳಿದರು.

ನವಭಾರತವು, ತನ್ನ ಪುರಾತನ ವೇದ, ಉಪನಿಷತ್ತು, ಕಾಲದ ಮಿತಿಯನ್ನೂ ಮೀರಿದ ಅಧ್ಯಾತ್ಮ ಜ್ಞಾನ, ಏಕತೆಯ ಸಂದೇಶ, ಸರ್ವೇಜನೋ ಸುಖಿನೋ ಭವಂತು ಎಂಬ ಭಾವನೆ… ಇವೆಲ್ಲವನ್ನೂ ಗೌರವಿಸುತ್ತದೆ. ನಮ್ಮ ಭೂಮಿಯಲ್ಲಿ ಆಗಿ ಹೋಗಿರುವ ಅನೇಕ ಸಾಧುಗಳು, ಸನ್ಯಾಸಿಗಳು, ಅಧ್ಯಾತ್ಮ ಜ್ಞಾನಿಗಳು ಲೋಕ ಕಲ್ಯಾಣದ ಮೂಲಕವೇ ಮೋಕ್ಷ ಸಾಧಿಸಬಲ್ಲೆವು ಎಂಬ ಸತ್ಯವನ್ನು ಅರಿತಿದ್ದರು. ಈಗ ಇರುವ ಅಧ್ಯಾತ್ಮ ಸಾಧಕರು, ಧರ್ಮ ಪ್ರವರ್ತಕರು ಅದನ್ನು ಮುಂದುವರಿಸಿಕೊಂಡು ಹೋಗುತ್ತಿದ್ದಾರೆ ಎಂದು ಅವರು ತಿಳಿಸಿದರು.