ವಾರಾಣಸಿಯಲ್ಲಿ ಬಾಲ ಪೊಲೀಸ್ ಅಧಿಕಾರಿಗಳು

ವಾರಾಣಸಿ: ಅಂತಾರಾಷ್ಟ್ರೀಯ ಹೆಣ್ಣು ಮಗು ದಿನದ ಪ್ರಯುಕ್ತ ವಾರಾಣಸಿ ಪೊಲೀಸರು ವಿಶಿಷ್ಟ ಕಾರ್ಯಕ್ರಮ ಆಯೋಜಿಸಿದ್ದು, ಬಾಲಕಿಯರಿಗೆ ಪೊಲೀಸ್ ಇಲಾಖೆಯ ಕಾರ್ಯನಿರ್ವಹಣೆ ಪರಿಚಯ ಮಾಡಿಕೊಡುವ ಮತ್ತು ಅವರಿಗೆ ಧೈರ್ಯ, ಸಾಹಸ ಪ್ರವೃತ್ತಿಯನ್ನು ಮನವರಿಕೆ ಮಾಡಿಕೊಡುವ ಉದ್ದೇಶದಿಂದ ಒಂದು ದಿನದ ಮಟ್ಟಿಗೆ ಪೊಲೀಸ್ ಅಧಿಕಾರಿಯಾಗುವ ಅವಕಾಶ ಮಾಡಿಕೊಟ್ಟಿದ್ದಾರೆ.

ಗುರುವಾರ ವಾರಾಣಸಿ ನಗರದ 15 ಪೊಲೀಸ್ ಠಾಣೆಗಳ ಕಾರ್ಯನಿರ್ವಹಣೆಯ ಮೇಲುಸ್ತುವಾರಿ ನೋಡಿಕೊಳ್ಳಲು ಬಾಲಕಿಯರಿಗೆ ಅವಕಾಶ ಕಲ್ಪಿಸಿದ್ದು, ಅವರ ಕೈಕೆಳಗೆ ಅಲ್ಲಿನ ಪೊಲೀಸ್ ಅಧಿಕಾರಿಗಳು ಕಾರ್ಯನಿರ್ವಹಿಸಿದರು. ನಗರದ ಕಮಿಷನರ್ ವ್ಯಾಪ್ತಿಯ 15 ಪೊಲೀಸ್ ಠಾಣೆಗಳಲ್ಲಿ ದಿನದ ಮಟ್ಟಿಗೆ ಪೊಲೀಸ್ ಅಧಿಕಾರಿಯಾಗಿದ್ದ ಬಾಲಕಿಯರು ಪೊಲೀಸ್ ಅಧಿಕಾರಿಗಳಿಗೆ ಸಲಹೆ ಸೂಚನೆ ಮತ್ತು ಆದೇಶ ನೀಡಿದರು.

ವಾರಾಣಸಿ ಪೊಲೀಸ್, ಶಂಭುನಾಥ ಸಿಂಗ್ ರಿಸರ್ಚ್ ಫೌಂಡೇಶನ್ ಮತ್ತು ಸಿಆರ್‌ವೈ ಫೌಂಡೇಶನ್ ಸಹಯೋಗದಲ್ಲಿ 15 ಬಾಲಕಿಯರಿಗೆ ಪೊಲೀಸ್ ಅಧಿಕಾರಿಯಾಗುವ ಅವಕಾಶ ದೊರೆತಿತ್ತು.

ಅಧಿಕಾರ ನಿರ್ವಹಣೆ, ನಾಯಕತ್ವ, ನಿರ್ಧಾರ ತೆಗೆದುಕೊಳ್ಳುವುದು ಸಹಿತ ಸಮಾಜದಲ್ಲಿ ಶಾಂತಿ ಕಾಪಾಡಲು ಕೈಗೊಳ್ಳಬೇಕಾದ ಕ್ರಮಗಳು, ಪರಿಸ್ಥಿತಿಯನ್ನು ನಿಭಾಯಿಸುವುದನ್ನು ಬಾಲಕಿಯರು ಈ ಸಂದರ್ಭದಲ್ಲಿ ಅರಿತುಕೊಂಡರು.
ಮೂಲ ವರದಿ: ನವಭಾರತ್ ಟೈಮ್ಸ್