ವಾಯು ಚಂಡಮಾರುತ ದುರ್ಬಲ

ಹೊಸದಿಲ್ಲಿ: ಭೂ ಪ್ರದೇಶದಿಂದ ದೂರ ಸಾಗಿದ್ದ ವಾಯು ಚಂಡಮಾರುತ ಮತ್ತೇ ಪಥ ಬದಲಿಸಿ ಗುಜರಾತ್‌ ಕರಾವಳಿತ್ತ ಧಾವಿಸಿದೆ. ಆದರೆ, ಅದು ಉತ್ತರ ಗುಜರಾತ್‌ ತೀರ ಪ್ರವೇಶಿಸುವ ವೇಳೆಗೆ ದುರ್ಬಲಗೊಳ್ಳಲಿದೆ ಎಂದು ಹವಾಮಾನ ಇಲಾಖೆ ಹೇಳಿದೆ.

ಜೂನ್‌ 17ರಂದು ಸಂಜೆ ವೇಳೆಗೆ ಚಂಡಮಾರುತ ಗುಜರಾತ್‌ ತೀರ ತಲುಪಲಿದೆ. ಆದರೆ ಅಷ್ಟರಲ್ಲಿ ಅದು ಭಾರಿ ವಾಯುಭಾರ ಕುಸಿತವಾಗಿ ಮಾರ್ಪಡಲಿದೆ. ಇದರಿಂದ ಗುಜರಾತ್‌ ತೀರ ಭಾಗದಲ್ಲಿ ಭಾರಿ ಮಳೆಯಾಗುವ ಸಾಧ್ಯತೆಯಿದೆ ಎಂದು ಇಲಾಖೆ ತಿಳಿಸಿದೆ.

ಶರವೇಗದಲ್ಲಿ ಧಾವಿಸುತ್ತಿದ್ದ ವಾಯು ಚಂಡ ಮಾರುತ ಜೂನ್‌ 13ರಂದು ಗುಜರಾತ್‌ ತೀರಕ್ಕೆ ಅಪ್ಪಳಿಸಬೇಕಿತ್ತು. ಚಂಡಮಾರುತ ಎದುರಿಸಲು ಗುಜರಾತ್‌ ಸರಕಾರ ಸಕಲ ಸಿದ್ಧತೆ ಕೈಗೊಂಡಿತ್ತು. ಆದರೆ ಅಷ್ಟರಲ್ಲಿ ಅದು ಪಥ ಬದಲಿಸಿ ಭೂ ಪ್ರದೇಶದಿಂದ ದೂರವಾಗಿ ಆಳ ಸಮುದ್ರದತ್ತ ಸಾಗಿತ್ತು. ಮೂರು ದಿನಗಳ ಬಳಿಕ ಅದು ಮತ್ತೆ ಭೂಭಾಗದತ್ತ ಹೊರಳಿದೆ.