ಹೆಸರಾಂತ ಬಾಲಿವುಡ್‌ ನಟ ಖಾದರ್‌ ಖಾನ್‌ ನಿಧನ

ಟೊರೊಂಟೊ: ದೀರ್ಘಕಾಲದ ಅನಾರೋಗ್ಯದಿಂದ ಬಳಲುತ್ತಿದ್ದ ಬಾಲಿವುಡ್‌ನ ಹೆಸರಾಂತ ಹಾಸ್ಯನಟ ಹಾಗೂ ಸಂಭಾಷಣೆಕಾರ ಖಾದರ್‌ ಖಾನ್‌ (81) ಕೆನಡಾದ ಟೊರೊಂಟೊ ಆಸ್ಪತ್ರೆಯಲ್ಲಿ ಸೋಮವಾರ ನಿಧನ ಹೊಂದಿದ್ದಾರೆ.

ಅಫಘಾನಿಸ್ತಾನದ ಕಾಬೂಲ್‌ನಲ್ಲಿ ಜನಿಸಿ ಬಾಲಿವುಡ್‌ನಲ್ಲಿ ಹೆಸರು ಮಾಡಿದ ಖಾದರ್‌ ಖಾನ್‌ 'ಪ್ರೊಗ್ರೆಸಿವ್‌ ಸೂಪರ್‌ನ್ಯೂಕ್ಲಿಯರ್‌ ಪಾಲ್ಸಿ' ಎಂಬ ಕಾಯಿಲೆಯಿಂದ ಬಳಲುತ್ತಿದ್ದರು. ದೇಹದ ಸಮತೋಲನ ಏರುಪೇರು ಮಾಡುವ, ನಡೆದಾಡಲೂ ಕಷ್ಟ ತಂದೊಡ್ಡುವ ಈ ಕಾಯಿಲೆ ಅವರನ್ನು ತೀವ್ರವಾಗಿ ಬಾಧಿಸಿತ್ತು. ಕೆಲವು ದಿನಗಳ ಹಿಂದೆ ಕೋಮಾಕ್ಕೆ ಜಾರಿದ್ದರು. ಟೊರೊಂಟೊ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ ಅವರು ಸೋಮವಾರ ಮೃತಪಟ್ಟಿದ್ದಾರೆ. ''ತಂದೆಯ ಸಾವು ಅತೀವ ದುಃಖ ತಂದಿದೆ. ನಮ್ಮ ಕುಟುಂಬ ಕೆನಡಾದಲ್ಲಿ ನೆಲೆಸಿರುವ ಕಾರಣ ಟೊರೊಂಟೊದಲ್ಲಿಯೇ ಅಂತ್ಯಕ್ರಿಯೆ ನಡೆಸಲಾಗುವುದು,'' ಎಂದು ಪುತ್ರ ಸರ್ಫಾಜ್‌ ಖಾನ್‌ ಮಂಗಳವಾರ ಹೇಳಿದ್ದಾರೆ.

'ದಾಗ್‌' ಮೂಲಕ ಎಂಟ್ರಿ: 1973ರಲ್ಲಿ ರಾಜೇಶ್‌ ಖನ್ನಾ ಅವರ 'ದಾಗ್‌' ಸಿನಿಮಾ ಮೂಲಕ ಚಿತ್ರರಂಗಕ್ಕೆ ಕಾಲಿಟ್ಟ ಖಾದರ್‌ 300ಕ್ಕೂ ಹೆಚ್ಚು ಚಿತ್ರಗಳಲ್ಲಿ ನಟಿಸಿದ್ದಾರೆ. 'ಅಮರ್‌ ಅಕ್ಬರ್‌ ಅಂಥೋನಿ', 'ಕೂಲಿ', 'ಜವಾನಿ ದಿವಾನಿ', 'ಅಗ್ನಿಪಥ್‌' ಸೇರಿ 250 ಚಿತ್ರಗಳಿಗೆ ಸಂಭಾಷಣೆ ಬರೆದು ಹೆಸರು ಮಾಡಿದ್ದಾರೆ. ಅಮಿತಾಭ್‌ ಬಚ್ಚನ್‌, ಅನುಪಮ್‌ ಖೇರ್‌, ಮನೋಜ್‌ ಬಾಜಪೇಯಿ ಸೇರಿ ಹಲವು ನಾಯಕರ ಚಿತ್ರಗಳಲ್ಲಿ ಪೋಷಕ ಹಾಗೂ ಹಾಸ್ಯ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ.

ಗಣ್ಯರ ಕಂಬನಿ: ಖಾದರ್‌ ಖಾನ್‌ ಅವರ ನಿಧನಕ್ಕೆ ಪ್ರಧಾನಿ ಮೋದಿ, ಕೇಂದ್ರ ಸಚಿವೆ ಸ್ಮೃತಿ ಇರಾನಿ, ಕಾಂಗ್ರೆಸ್‌ ಅಧ್ಯಕ್ಷ ರಾಹುಲ್‌ ಗಾಂಧಿ, ನಟರಾದ ಅಮಿತಾಭ್‌ ಬಚ್ಚನ್‌, ಅನುಪಮ್‌ ಖೇರ್‌, ಚಿತ್ರ ನಿರ್ದೇಶಕ ಮಧುರ್‌ ಭಂಡಾರ್‌ಕರ್‌ ಸೇರಿದಂತೆ ಹಲವು ಗಣ್ಯರು ಕಂಬನಿ ಮಿಡಿದಿದ್ದಾರೆ.