ಟ್ರಾಫಿಕ್‌ ಲೈಟ್‌ ಕೊಚ್ಚಿ ಹೋಗಿದ್ದು ಮುಂಬಯಿ ನಗರದಲ್ಲ, ಚೀನಾದ್ದು!

ಮುಂಬಯಿ: ಮಳೆ ನೀರಿನಲ್ಲಿ ಟ್ರಾಫಿಕ್‌ ಸಿಗ್ನಲ್‌ ಕೊಚ್ಚಿ ಹೋಗುತ್ತಿರುವ ವಿಡಿಯೊವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿದ್ದು, ಇದು ಮುಂಬಯಿ ನಗರದಲ್ಲಿ ಸುರಿದ ಧಾರಾಕಾರ ಮಳೆಯ ವಿಡಿಯೊ ಎಂದು ಹಲವಾರು ನೆಟ್ಟಿಗರು ಶೇರ್‌ ಮಾಡಿದ್ದಾರೆ.

ಬಾಲಿವುಡ್‌ ನಿರ್ಮಾಪಕ ವಿವೇಕ್‌ ಅಗ್ನಿಹೋತ್ರಿ ಅವರು ಈ ವಿಡಿಯೊ ಟ್ವೀಟ್‌ ಮಾಡಿ, ''ಹಲೋ ಮುಂಬಯಿ ಟ್ರಾಫಿಕ್‌ ಪೊಲೀಸ್‌ ಆಯುಕ್ತರೇ, ಸಿಗ್ನಲ್‌ ರಸ್ತೆ ದಾಟಿದ್ದಕ್ಕೆ ಎಷ್ಟು ದಂಡ ತೆರಬೇಕು, ''ಎಂದು ಕೇಳಿದ್ದಾರೆ. ಆದರೆ ಇದೇ ವಿಡಿಯೊವನ್ನು ಡಾ. ಶಹರ್‌ಯಾರ್‌ ಎಂಬವರು ಆಗಸ್ಟ್‌ ತಿಂಗಳಲ್ಲಿ ಫೇಸ್‌ಬುಕ್‌ನಲ್ಲಿ ಹಂಚಿಕೊಂಡಿದ್ದಾರೆ. ಈ ವಿಡಿಯೊ ಮುಂಬಯಿನದ್ದಲ್ಲ,ಬದಲಿಗೆ ಚೀನಾದ್ದು ಎಂದು ವೈರಲ್‌ ವರದಿಗಳ ಸತ್ಯಾಸತ್ಯತೆ ಪರಿಶೀಲಿಸಿದಾಗ ಬಯಲಾಗಿದೆ. ಸಾಮಾಜಿಕ ಮಾಧ್ಯಮಗಳಲ್ಲಿ ಈಗ ಹರಿದಾಡುತ್ತಿರುವುದು ವಿಡಿಯೊ ತುಣುಕು ಮಾತ್ರ. ಇದರ ಪೂರ್ಣ ವಿಡಿಯೊವನ್ನು 2018 ಮೇ 11ರಂದು ಚೀನಾದ ಸುದ್ದಿಜಾಲ ಸಂಸ್ಥೆ ಸಿಜಿಟಿಎನ್‌ ಪೋಸ್ಟ್‌ ಮಾಡಿದೆ. ಸಿಜಿಟಿಎನ್‌ ಪ್ರಕಾರ ದಕ್ಷಿಣ ಚೀನಾದ ಯೂಲಿನ್‌ ಸಿಟಿಯಲ್ಲಿ ಸ್ಥಾಪಿಸಲಾಗಿದ್ದ ತಾತ್ಕಾಲಿಕ ಟ್ರಾಫಿಕ್‌ ಸಿಗ್ನಲ್‌ ಮಳೆ ನೀರಿನಲ್ಲಿ ಕೊಚ್ಚಿ ಹೋಗಿತ್ತು.