ಎಲ್ಲ 5 ಆರೋಪಿಗಳನ್ನು ಗಲ್ಲಿಗೇರಿಸಿ: ಅಲ್ವರ್ ಅತ್ಯಾಚಾರ ಸಂತ್ರಸ್ತೆ

ಅಲ್ವರ್: ಮೂರು ಗಂಟೆಗಳ ದೀರ್ಘ ಕಾಲ ಆಕೆಯನುಭವಿಸಿದ ನರಕಯಾತನೆ ಜೀವಮಾನವೀಡಿ ಆಕೆಯನ್ನು ನರಳಾಡಿಸಬಹುದು. ಆದರೆ ಸಹಿಸಲಾಗದ ವೇದನೆಯ ನಡುವೆಯೂ ಆಕೆ ನ್ಯಾಯಕ್ಕಾಗಿ ಹೋರಾಟ ಆರಂಭಿಸಿದ್ದಾಳೆ. ಎಲ್ಲ ಆರೋಪಿಗಳಿಗೆ ನೇಣು ಶಿಕ್ಷೆ ವಿಧಿಸಬೇಕೆಂದು ಆಕೆ ಆಗ್ರಹಿಸುತ್ತಿದ್ದಾಳೆ.

ನನ್ನ ಮೇಲೆ ಅ್ಯಾಚಾರವೆಸಗಿ, ವೀಡಿಯೋ ಚಿತ್ರೀಕರಿಸಿದ ಎಲ್ಲ ದುಷ್ಟರಿಗೂ ನೇಣು ಶಿಕ್ಷೆಯಾಗಬೇಕು. ಇದಕ್ಕಿಂತ ದೊಡ್ಡ ಶಿಕ್ಷೆ ಇದ್ದರೆ ಅದನ್ನೇ ನೀಡಲಿ ಅವರಲ್ಲಿ ನಾನು ಬಿಟ್ಟು ಬಿಡಿ ಎಂದು ಬೇಡಿಕೊಂಡೆ. ಈ ಘಟನೆ ನನ್ನ ಬದುಕಿನದುದ್ದಕ್ಕೂ ಕರಾಳ ಘಟನೆಯಾಗಿ ಕಾಡುತ್ತದೆ, ಎಂದಾಕೆ ಹೇಳಿದ್ದಾಳೆ.

20 ವರ್ಷದ ಆಕೆ ದ್ವಿತೀಯ ಪಿಯುಸಿ ಓದುತ್ತಿದ್ದು, ಶಿಕ್ಷಣವನ್ನು ಮುಂದುವರಿಸಲು ಬಯಸಿದ್ದಾಳೆ.

ಪತಿ ಮತ್ತು ಪತ್ನಿ ಇಬ್ಬರು ಕೂಡ ಆಘಾತದಲ್ಲಿದ್ದಾರೆ. ಆರೋಪಿಗಳ ಕಡೆಯಿಂದ ಬೆದರಿಕೆ ಕರೆಗಳು ಬರುತ್ತಿದ್ದು, ನಾನು ಯಾವುದಕ್ಕೂ ಜಗ್ಗುವುದಿಲ್ಲ. ನ್ಯಾಯ ಸಿಗುವವರೆಗೂ ಹೋರಾಡುತ್ತೇನೆ ಎಂದು ಸಂತ್ರಸ್ತೆಯ ಪತಿ ಹೇಳುತ್ತಿದ್ದಾನೆ.

ಐವರು ಆರೋಪಿಗಳ ಮೇಲೆ ಸಾಮೂಹಿಕ ಅತ್ಯಾಚಾರ ಪ್ರಕರಣ ದಾಖಲಾಗಿದ್ದು, ಮತ್ತೊಬ್ಬನ ಮೇಲೆ ವೀಡಿಯೋ ಮಾಡಿದ ಕೇಸ್ ದಾಖಲಾಗಿದೆ.

ಏಪ್ರಿಲ್ 26 ರಂದು ರಾಜಸ್ಥಾನದಲ್ಲಿ ನಾಗರಿಕ ಸಮಾಜವೇ ತಲೆ ತಗ್ಗಿಸುವಂತ ಕೃತ್ಯವೊಂದು ನಡೆದಿತ್ತು. ಥಾನಾಗಾಜಿ ಪ್ರದೇಶದಲ್ಲಿ ಪತಿಯ ಮುಂದೆಯೇ ಪತ್ನಿಯ ಮೇಲೆ ಸಾಮೂಹಿಕ ಅತ್ಯಾಚಾರ ನಡೆಸಲಾಗಿತ್ತು. ಅಷ್ಟೇ ಅಲ್ಲ ಆರೋಪಿಗಳು ಈ ವೀಡಿಯೋವನ್ನು ಸಾಮಾಜಿಕ ಜಾಲತಾಣದಲ್ಲಿ ಶೇರ್ ಮಾಡಿದ್ದರು.

ಪ್ರಕರಣದ ತನಿಖೆಗೆ 14 ತಂಡಗಳನ್ನು ರಚಿಸಲಾಗಿದೆ.