ಚಲಿಸುತ್ತಿದ್ದ ಜೀಪ್‌ನಿಂದ ಬಿದ್ದ ಮಗುವನ್ನು ಬಿಟ್ಟೇ ಸಾಗಿದ ಪೋಷಕರು!

ಇಡುಕ್ಕಿ: ಚಲಿಸುತ್ತಿದ್ದ ಜೀಪಿನಿಂದ ಒಂದು ವರ್ಷದ ಮಗು ಕೆಳಗೆ ಬಿದ್ದರೂ ಅದನ್ನು ಗಮನಿಸಿದ ಪೋಷಕರು ಸುಮಾರು 50 ಕಿ.ಮೀವರೆಗೂ ಮುಂದೆ ಪ್ರಯಾಣಿಸಿದ ಘಟನೆ ಕೇರಳದ ಇಡುಕ್ಕಿ ಜಿಲ್ಲೆಯ ಮುನ್ನಾರ್‌ನಲ್ಲಿ ನಡೆದಿದೆ. ರಸ್ತೆಯ ಮೇಲೆ ಬಿದ್ದು ರೋದಿಸುತ್ತಾ, ತೆವಳುತ್ತಿದ್ದ ಮಗುವನ್ನು ಸಿಸಿಟಿವಿ ಮೂಲಕ ಗುರುತಿಸಿ ರಕ್ಷಿಸಲಾಗಿದೆ. ಬಳಿಕ ಪೊಲೀಸರು ಮಗುವನ್ನು ಪೋಷಕರಗೆ ಹಸ್ತಾಂತರಿಸಿದ್ದಾರೆ.

ಮುನ್ನಾರ್‌ ಅರಣ್ಯ ಇಲಾಖೆ ಚೆಕ್‌ಪೋಸ್ಟ್‌ ಬಳಿ ಈ ಘಟನೆ ನಡೆದಿದ್ದರಿಂದ ಅಲ್ಲಿದ್ದ ಸಿಸಿಟಿವಿಯಲ್ಲಿ ಮಗುವಿನ ದೃಶ್ಯ ಸೆರೆಯಾಗಿತ್ತು. ಇದನ್ನು ಗಮನಿಸಿದ ಅರಣ್ಯ ಇಲಾಖೆ ಸಿಬ್ಬಂದಿ ಕೂಡಲೇ ಸ್ಥಳಕ್ಕೆ ದೌಡಾಯಿಸಿ ಮಗುವಿಗೆ ಪ್ರಥಮ ಚಿಕಿತ್ಸೆ ಕೊಡಿಸಿದ್ದಾರೆ. ಬಳಿಕ ಪೊಲೀಸರಿಗೆ ವಿಷಯ ಮುಟ್ಟಿಸಿದ್ದಾರೆ. ಅಷ್ಟರೊಳಗೆ ಸುಮಾರು 50 ಕಿ.ಮೀ. ಮುಂದೆ ಸಾಗಿದ್ದ ಪೋಷಕರು ಮಗು ಇಲ್ಲದಿರುವುದನ್ನು ಗಮನಿಸಿ ಆತಂಕಗೊಂಡಿದ್ದಾರೆ. ಮಗು ಕಾಣೆಯಾದ ಬಗ್ಗೆ ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ. ಆ ವೇಳೆಗಾಗಲೇ ಈ ಬಗ್ಗೆ ಮಾಹಿತಿ ಪಡೆದಿದ್ದ ಪೊಲೀಸರು ಅರಣ್ಯ ಇಲಾಖೆ ಚೆಕ್‌ಪೋಸ್ಟ್‌ ಬಳಿ ಮಗು ಪತ್ತೆಯಾಗಿರುವ ವಿಷಯ ತಿಳಿಸಿದ್ದಾರೆ. ಪೋಷಕರು ಮಗು ತಮ್ಮದೇ ಎಂದು ಒಪ್ಪಿಕೊಂಡಿದ್ದಾರೆ. ಪೊಲೀಸರ ಸಮ್ಮುಖದಲ್ಲಿ ಮಗುವನ್ನು ಪೋಷಕರ ವಶಕ್ಕೆ ಒಪ್ಪಿಸಲಾಗಿದೆ.