ಯುನಿಫಾರ್ಮ್‌ ತೊಟ್ಟು ಸಂಭ್ರಮಿಸಿದ ರಾಹುಲ್‌-ಅಖಿಲೇಶ್‌!
ಲಖನೌ: ಸರಿ ಸುಮಾರು ಒಂದೇ ರೀತಿಯ ಡ್ರೆಸ್‌ ತೊಟ್ಟು ಭುಜಕ್ಕೆ ಭುಜ ಕೊಟ್ಟು ಓಡಾಡಿದ ರಾಹುಲ್‌ ಗಾಂಧಿ ಮತ್ತು ಅಖಿಲೇಶ್‌ ಯಾದವ್‌ ಭಾನುವಾರ ಇಲ್ಲಿ ಜಂಟಿ ಪತ್ರಿಕಾಗೋಷ್ಠಿ ಮತ್ತು ರೋಡ್‌ ಶೋ ನಡೆಸುವ ಮೂಲಕ ಕಾಂಗ್ರೆಸ್‌ ಮತ್ತು ಸಮಾಜವಾದಿ ಪಕ್ಷದ ಮೈತ್ರಿ ಭದ್ರವಾಗಿದೆ ಎಂಬುದನ್ನು ದೃಢಪಡಿಸಿದರು.
'ನಮ್ಮ ನಡುವೆ ವಯಸ್ಸಿನಲ್ಲಿ ಅಂತಹ ವ್ಯತ್ಯಾಸವೇನೂ ಇಲ್ಲ. ನಾವಿಂದು ಹೊಸ ಆರಂಭ ಮಾಡಿದ್ದೇವೆ. ರಾಹುಲ್‌ ಮತ್ತು ನಾನು ರಾಜ್ಯವನ್ನು ಪಗ್ರತಿಯ ಹಾದಿಯಲ್ಲಿ ಕೊಂಡೊಯ್ಯುತ್ತೇವೆ,' ಎಂದು 43 ವರ್ಷ ವಯಸ್ಸಿನ ಅಖಿಲೇಶ್‌ 46 ವಯಸ್ಸಿನ ರಾಹುಲ್‌ ಜತೆ ಸುಮಾರು ಒಂದು ತಾಸು ನಡೆಸಿದ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದರು. 'ನಾವಿಬ್ಬರೂ ಒಂದೇ ಸೈಕಲ್‌ನ ಎರಡು ಚಕ್ರಗಳಿದ್ದಂತೆ,' ಎಂದು ಹೇಳಲೂ ಅಖಿಲೇಶ್‌ ಮರೆಯಲಿಲ್ಲ.
ರಾಜಿಯೂ ಮಾಡಿಕೊಂಡಿದ್ದೇವೆ: 'ಯೇ ದಿಲ್‌ ಕಾ ಅಲಯೆನ್ಸ್‌ ಹೇ, ಮಿಲ್‌ ಕೆ ಜೀತೇಂಗೆ,' ಎಂದು ಹೇಳಿದ ರಾಹುಲ್‌ ಗಾಂಧಿ, ನಮ್ಮ ನಡುವೆ ಸಮಾನ ಅಭಿಪ್ರಾಯಗಳೂ ಇವೆ, ಭಿನ್ನತೆಯೂ ಇದೆ, ಸಮಾನತೆಗಳ ಆಧಾರದಲ್ಲಿ ನಾವು ಚುನಾವಣೆಗೆ ಸ್ಪರ್ಧಿಸಿದ್ದೇವೆ, ಹಾಗೇ ಕೆಲ ರಾಜಿಗಳನ್ನೂ ಮಾಡಿಕೊಂಡಿದ್ದೇವೆ ಎಂದರು.
ಉತ್ತರ ಪ್ರದೇಶ ವಿಧಾನ ಸಭಾ ಚುನಾವಣೆಯಲ್ಲಿ ಎರಡೂ ಪಕ್ಷಗಳು ಮಾಡಿಕೊಂಡಿರುವ ಮೈತ್ರಿಯ ಬಗ್ಗೆ ಇದ್ದ ಸಣ್ಣಪುಟ್ಟ ಗೊಂದಲಗಳು ಇಬ್ಬರು ನಾಯಕರ ಜಂಟಿ ಕಾರ್ಯಾಚರಣೆಯ ಮೂಲಕ ಪರಿಹಾರ ಕಂಡಿವೆ. ವಿಶೇಷ ವಿಮಾನದಲ್ಲಿ ಭಾನುವಾರ ಬೆಳಿಗ್ಗೆ ಲಖನೌಗೆ ಬಂದಿಳಿದ ರಾಹುಲ್‌, ನಮ್ಮ ಮೈತ್ರಿ ಈ ಚುನಾವಣೆಗಾಗಿ ಜನರೇ ಮಾಡಿದ ಆಯ್ಕೆ ಎಂದು ತಿಳಿಸಿದರು.
ಜನರಿಗೆ ಮೈತ್ರಿ ಪಸಂದ್‌:
ರಾಹುಲ್‌ ಮತ್ತು ಅಖಿಲೇಶ್‌ ಇಬ್ಬರೂ ಪರಸ್ಪರ ಆಲಂಗಿಸಿಕೊಂಡು, 'ಯೂಪಿ ಕೋ ಯೇ ಸಾಥ್‌ ಪಸಂದ್‌ ಹೇ (ಈ ಮೈತ್ರಿಗೆ ಉತ್ತರ ಪ್ರದೇಶದ ಒಲವಿದೆ)' ಎಂಬ ಚುನಾವಣಾ ಪ್ರಚಾರದ ಟ್ಯಾಗ್‌ಲೈನ್‌ಗೆ ಸಾಥ್‌ ನೀಡಿದರು.