ಹೊಸದಿಲ್ಲಿ : ಪ್ರಧಾನಿ ನರೇಂದ್ರ ಮೋದಿ ಮತ್ತೊಬ್ಬ ಗಾಂಧಿ, ಅವರೂ ರಾಷ್ಟ್ರಪಿತ ಗಾಂಧಿಯಂತೆ ಮೋದಿ ಕೂಡ ಯುವಪೀಳಿಗೆಯನ್ನು ಸಾಕಷ್ಟು ಪ್ರಭಾವಿತಗೊಳಿಸಿದ್ದಾರೆ ಎಂದು ಕೇಂದ್ರ ಸಚಿವ ಮಹೇಶ್‌ ಶರ್ಮಾ ಗುರುವಾರ ಹಾಡಿ ಹೊಗಳಿದ್ದಾರೆ.
ಗಾಂಧೀಜಿಯವರ ಉಪ್ಪಿನ ಸತ್ಯಾಗ್ರಹಕ್ಕೆ ಸಂಬಂಧಿಸಿದಂತೆ ರಾಷ್ಟ್ರೀಯ ಗಾಂಧಿ ಮ್ಯೂಸಿಯಂನ ಮಾಜಿ ನಿರ್ದೇಶಕ ವೈ.ಪಿ ಆನಂದ್‌ ಬರೆದಿರುವ ಪುಸ್ತಕ ಬಿಡುಗಡೆ ಮಾಡಿದ ಅವರು,''ಇಂದು ಮೋದಿಯವರ ರೂಪದಲ್ಲಿ ಗಾಂಧೀಜಿ ನಮ್ಮೊಂದಿಗೆ ಇರುವುದು ನಮ್ಮೆಲ್ಲರ ಸೌಭಾಗ್ಯ,''ಎಂದಿದ್ದಾರೆ. ಉಪ್ಪಿನ ಸತ್ಯಾಗ್ರಹ ಕೇವಲ ಒಂದು ಚಿಟಿಕೆ ಉಪ್ಪಿಗಾಗಿ ನಡೆದ ಹೋರಾಟವಲ್ಲ.
ಅದು ಮುಂದಿನ ಹಲವಾರು ಪೀಳಿಗೆಗೆ ಸ್ಫೂರ್ತಿ ನೀಡಿದೆ, ಅಂತೆಯೇ ಪ್ರಧಾನಿ ಕೂಡ ಸ್ಫೂರ್ತಿ ನೀಡುತ್ತಿದ್ದಾರೆ ಎಂದರು. ಗಾಂಧಿಯವರ ಕನಸುಗಳನ್ನು, ಅವರ ಚಿಂತನೆಗಳನ್ನು ಮುಂದಿನ ಪೀಳಿಗೆಗೆ ತಲುಪಿಸಲು ಕೇಂದ್ರ ಸಂಸ್ಕೃತಿ ಸಚಿವಾಲಯ ಶ್ರಮಿಸುತ್ತಿದೆ ಎಂದು ಶರ್ಮಾ ತಿಳಿಸಿದ್ದಾರೆ.