ಅಕ್ರಮ ಶಸ್ತ್ರಾಸ್ತ್ರ ವ್ಯಾಪಾರ ತಾಣವಾದ ಬಂಗಾಳ

ಕೋಲ್ಕೊತಾ: ಅಕ್ರಮ ಶಸ್ತ್ರಾಸ್ತ್ರ ವ್ಯಾಪಾರ ತಾಣವಾಗುತ್ತಿರುವ ಬಂಗಾಳವು ಈ ನಿಟ್ಟಿನಲ್ಲಿ ಬಿಹಾರದ ಮುಂಗೇರ್‌ ಅನ್ನು ಹಿಂದಿಕ್ಕಿದೆ. ಒಂದೂವರೆ ವರ್ಷದಿಂದ ನಾಡಿಯಾದ ಕಲ್ಯಾಣಿಯಲ್ಲಿ ಅಕ್ರಮ ಶಸ್ತ್ರಾಸ್ತ್ರ ತಯಾರಿ ಫ್ಯಾಕ್ಟರಿ ಕಾರ್ಯಾಚರಿಸುತ್ತಿದ್ದು, ಈ ಬಿಸ್‌ನೆಸ್‌ನಲ್ಲಿ ಹಲವು ಸ್ಥಳೀಯ ನಾಯಕರು ಭಾಗಿಗಳಾಗಿರುವುದು ತಿಳಿದು ಬಂದಿದೆ ಎಂದು ಸಿಬಿಐ ಹೇಳಿದೆ.

ಸೋನಾರ್‌ಪುರ್‌, ಮಹೇಶ್‌ತಲ, ರಬೀಂದ್ರನಗರ್‌, ಹೌರಾಗಳಲ್ಲೂ ಅಕ್ರಮ ಶಸ್ತ್ರಾಸ್ತ್ರ ಫ್ಯಾಕ್ಟರಿಗಳಿವೆ ಎಂದು ತನಿಖಾ ತಂಡ ತಿಳಿಸಿದೆ.

ಕೆಲವು ಬಾರಿ ಈ ಅಕ್ರಮ ಶಸ್ತ್ರಾಸ್ತ್ರಗಳು ಭೂಗತ ಪಾತಕಿ ದಾವುದ್‌ ಗ್ಯಾಂಗ್‌ಗೆ, ಜೆಎಂಬಿ ಸಂಘಟನೆಗೆ, ಕೆಲವೊಮ್ಮೆ ಸ್ಥಳೀಯ ಗೂಂಡಾಗಳಿಗೆ ಸರಬರಾಜಾಗುತ್ತವೆ. ಹೀಗಾಗಿ ಕೋಲ್ಕೊತಾದ ಬೀದಿಗಳಲ್ಲಿ ಗುಂಡು ಹಾರಾಟ ಸಾಮಾನ್ಯ ಎಂಬಂತಾಗಿದೆ.

ಬಾಂಗ್ಲಾ ದೇಶಕ್ಕೆ ಅಕ್ರಮ ಶಸ್ತ್ರಾಸ್ತ್ರ ಸರಬರಾಜು ಪ್ರಕರಣಕ್ಕೆ ಸಂಬಂಧಿಸಿದಂತೆ ಪತ್ತೆ ದಳವು ಇತ್ತೀಚೆಗೆ ಗೋಪಾಲ್‌ನಗರದ ಖೈರುಲ್‌ ಇಸ್ಲಾಂ ಎಂಬಾತನನ್ನು ಢಾಕಾದಲ್ಲಿ ಬಂಧಿಸಿತ್ತು. ಆತನಿಂದ ಶಸ್ತ್ರಾಸ್ತ್ರಗಳನ್ನು ಜಪ್ತಿ ಮಾಡಿ ವಿಚಾರಣೆಗೆ ಒಳಪಡಿಸಿದಾಗ ಆತ ಬಹಳ ದೀರ್ಘಕಾಲದಿಂದ ಈ ದಂಧೆಯಲ್ಲಿ ತೊಡಗಿರುವುದು ತಿಳಿದು ಬಂದಿದೆ. ಅಧಿಕೃತವಾಗಿ ಆತ ಕೊರಿಯರ್‌ ಬಾಯ್‌ ಆಗಿ ಕೆಲಸ ಮಾಡುತ್ತಿದ್ದಾನೆ.

ಬಾಂಗ್ಲಾದೇಶದ ಗುಲ್ಶನ್‌ನಲ್ಲಿ ನಡೆದ ದಾಳಿಯಲ್ಲೂ ಪಶ್ಚಿಮ ಬಂಗಾಳದಿಂದ ಕಳಿಸಲಾಗಿದ್ದ ಶಸ್ತ್ರಾಸ್ತ್ರ ಬಳಕೆಯಾಗಿತ್ತು. ಮಾವಿನ ಹಣ್ಣಿ ಬುಟ್ಟಿಯಲ್ಲಿ ಇರಿಸಿ ಇದನ್ನು ಕಳಿಸಲಾಗಿತ್ತು.