Yasin Malik: ಜೀವಾವಧಿ ಶಿಕ್ಷೆಗೆ ಗುರಿಯಾದ ಉಗ್ರ ಯಾಸಿನ್ ಮಲಿಕ್ ಯಾರು..? ಆತನ ವಿರುದ್ಧ ಇದ್ದ ಆರೋಪಗಳೇನು..?

ಹೊಸ ದಿಲ್ಲಿ: ಕಾಶ್ಮೀರದ ಪ್ರತ್ಯೇಕತಾವಾದಿ ಉಗ್ರ ಯಾಸಿನ್ ಮಲಿಕ್‌ಗೆ ದಿಲ್ಲಿ ನ್ಯಾಯಾಲಯ ಜೀವಾವಧಿ ಶಿಕ್ಷೆ ವಿಧಿಸಿದೆ. ಉಗ್ರರಿಗೆ ಹಣಕಾಸು ನೆರವು ನೀಡಿದ ಆರೋಪದ ಮೇಲೆ ಜೀವಾವಧಿ ಶಿಕ್ಷೆಯ ಜೊತೆಯಲ್ಲೇ 10 ಲಕ್ಷ ರೂ. ದಂಡವನ್ನೂ ವಿಧಿಸಿದೆ. ಈ ಮಹಾ ಉಗ್ರನ ಕೃತ್ಯಗಳೇನು..? ಈತನ ವಿರುದ್ದದ ಕಾನೂನು ಸಮರ ನಡೆದು ಬಂದ ಹಾದಿಯ ಕುರಿತು ಇಲ್ಲಿದೆ ವಿವರಣೆ:


ಅಕ್ಟೋಬರ್ 1999: ಸಾರ್ವಜನಿಕ ಸುರಕ್ಷತಾ ಕಾಯ್ದೆ (ಪಿಎಸ್‌ಎ) ಅಡಿ ಭಾರತದ ಭದ್ರತಾ ಪಡೆಗಳಿಂದ ಯಾಸಿನ್ ಮಲಿಕ್ ಬಂಧನ

Breaking: Yasin Malik Life Imprisonment: ಯಾಸಿನ್ ಮಲಿಕ್‌ಗೆ ಜೀವಾವಧಿ ಶಿಕ್ಷೆ
ಮಾರ್ಚ್ 26, 2002: ಭಯೋತ್ಪಾದನಾ ನಿಗ್ರಹ ಕಾಯ್ದೆಯ ಅಡಿ ಮತ್ತೊಮ್ಮೆ ಯಾಸಿನ್ ಮಲಿಕ್ ಬಂಧನ, ಸುಮಾರು ಒಂದು ವರ್ಷ ಜೈಲು ವಾಸ.

ಮೇ 2007: ಯಾಸಿನ್ ಮಲಿಕ್ ಹಾಗೂ ಆತನ ಜೆಕೆಎಲ್‌ಎಫ್‌ ಪಕ್ಷದಿಂದ ಸಫರ್ - ಐ - ಆಜಾದಿ (ಸ್ವಾತಂತ್ರ್ಯದ ಪ್ರಯಣ) ಅಭಿಯಾನ ಆರಂಭವಾಯ್ತು. ಕಾಶ್ಮೀರದಲ್ಲಿ ಭಾರತ ವಿರೋಧಿ ನಿಲುವು ಹೊಂದಿದ್ದ 3,500 ಪಟ್ಟಣ ಹಾಗೂ ಗ್ರಾಮಗಳಿಗೆ ಯಾಸಿನ್ ಮಲಿಕ್ ಹಾಗೂ ಆತನ ಬೆಂಬಲಿಗರು ಭೇಟಿ ನೀಡಿ ಅಭಿಪ್ರಾಯ ಸಂಗ್ರಹ ಮಾಡಿದರು.

ಫೆಬ್ರುವರಿ 2013: ಪಾಕಿಸ್ತಾನ ರಾಜಧಾನಿ ಇಸ್ಲಾಮಾಬಾದ್‌ನಲ್ಲಿ ನಡೆದ ಪ್ರತಿಭಟನೆಯೊಂದರಲ್ಲಿ ನಿಷೇಧಿತ ಲಷ್ಕರ್ - ಎ - ತೊಯ್ಬಾ ಸಂಘಟನೆಯ ಮುಖ್ಯಸ್ಥ ಹಫೀಜ್ ಮೊಹಮ್ಮದ್ ಸಯೀದ್ ಜೊತೆಗೆ ವೇದಿಕೆ ಹಂಚಿಕೊಂಡು ಗಮನ ಸೆಳೆದ ಯಾಸಿನ್ ಮಲಿಕ್.

ಜನವರಿ 12, 2016: ಪಾಕಿಸ್ತಾನದ ಜೊತೆಗೆ ಗಿಲ್ಗಿಟ್ - ಬಾಲ್ಟಿಸ್ತಾನ್ ವಿಲೀನವನ್ನು ವಿರೋಧಿಸಿ ಪಾಕಿಸ್ತಾನದ ಅಂದಿನ ಪ್ರಧಾನಿ ನವಾಜ್ ಶರೀಫ್ ಅವರಿಗೆ ಪತ್ರ ಬರೆದಿದ್ದ ಯಾಸಿನ್ ಮಲಿಕ್

Yasin Malik Convicted: ಕಾಶ್ಮೀರದ ಪ್ರತ್ಯೇಕತಾವಾದಿ ಉಗ್ರ ಯಾಸಿನ್ ಮಲಿಕ್‌ಗೆ ಶಿಕ್ಷೆ
2017: ಯಾಸಿನ್ ಮಲಿಕ್ ಸೇರಿದಂತೆ ಹಲವು ಪ್ರತ್ಯೇಕತಾವಾದಿ ನಾಯಕರ ವಿರುದ್ಧ ರಾಷ್ಟ್ರೀಯ ತನಿಖಾ ದಳ (ಎನ್‌ಐಎ) ಕೇಸ್ ದಾಖಲಿಸಿತು. ಉಗ್ರರಿಗೆ ಹಣಕಾಸು ನೆರವು ನೀಡಿದ ಆರೋಪವನ್ನು ಯಾಸಿನ್ ಮಲಿಕ್ ವಿರುದ್ಧ ಹೊರಿಸಲಾಯ್ತು. 2019ರಲ್ಲಿ ಸಲ್ಲಿಕೆಯಾದ ಚಾರ್ಜ್‌ ಶೀಟ್‌ನಲ್ಲೂ ಯಾಸಿನ್ ಮಲಿಕ್ ಸೇರಿದಂತೆ ನಾಲ್ವರ ಹೆಸರನ್ನು ನಮೂದಿಸಲಾಗಿತ್ತು.

ಫೆಬ್ರುವರಿ 26, 2019: ಯಾಸಿನ್ ಮಲಿಕ್ ಮನೆ ಮೇಲೆ ದಾಳಿ ನಡೆಸಿದ ವೇಳೆ ಪ್ರಚೋದನಕಾರಿ ಬರಹಗಳು, ದಾಖಲೆಗಳು ಹಾಗೂ ವಿದ್ಯುನ್ಮಾನ ಸಾಕ್ಷ್ಯಗಳು ಲಭ್ಯವಾದವು. ಎಲ್ಲವನ್ನೂ ವಶಕ್ಕೆ ತೆಗೆದುಕೊಳ್ಳಲಾಯ್ತು.

ಏಪ್ರಿಲ್ 10, 2019: ಜಮ್ಮು - ಕಾಶ್ಮೀರದಲ್ಲಿ ಪ್ರತ್ಯೇಕತಾವಾದಿಗಳಿಗೆ ಹಾಗೂ ಉಗ್ರರಿಗೆ ಹಣಕಾಸು ನೆರವು ನೀಡಿದ ಆರೋಪದ ಮೇಲೆ ಜೆಕೆಎಲ್‌ಎಫ್ ಮುಖ್ಯಸ್ಥ ಯಾಸಿನ್ ಮಲಿಕ್ ಬಂಧನ

ಮಾರ್ಚ್ 2020: ಜನವರಿ 25, 1990ರಲ್ಲಿ ಕಾಶ್ಮೀರದ ಶ್ರೀನಗರದಲ್ಲಿ ಇರುವ ರವಾಲ್ ಪೋರಾದಲ್ಲಿ ಭಾರತೀಯ ವಾಯುಪಡೆಯ 40 ಯೋಧರ ಮೇಲೆ ದಾಳಿ ನಡೆಸಿದ ಆರೋಪದ ಮೇಲೆ ಟಾಡಾ ಕಾಯ್ದೆಯಲ್ಲಿ ಯಾಸಿನ್ ಮಲಿಕ್ ಹಾಗೂ ಇನ್ನಿತರ 6 ಮಂದಿ ವಿರುದ್ಧ ಚಾರ್ಜ್ ಶೀಟ್. ಅಷ್ಟೇ ಅಲ್ಲ, 1959ರ ಶಸ್ತ್ರಾಸ್ತ್ರ ಕಾಯ್ದೆಯ ಅಡಿಯಲ್ಲೂ ಪ್ರಕರಣ ದಾಖಲು.

ಮಾರ್ಚ್ 2022: ಭಾರತೀಯ ದಂಡ ಸಂಹಿತೆ ಹಾಗೂ ಯುಎಪಿಎ ಆಯ್ದೆಯಡಿ ಯಾಸಿನ್ ಮಲಿಕ್ ಹಾಗೂ ಇನ್ನಿತರರ ವಿರುದ್ಧ ಸಾಕ್ಷ್ಯ ಪರಿಶೀಲನೆ ಹಾಗೂ ಚಾರ್ಜ್ ಶೀಟ್ ದಾಖಲು ಮಾಡಲು ದಿಲ್ಲಿ ನ್ಯಾಯಾಲಯ ಆದೇಶ.

ಮೇ 10, 2022: ಮಲಿಕ್ ವಿರುದ್ಧದ ಆರೋಪಗಳು ಕೋರ್ಟ್‌ನಲ್ಲಿ ಸಾಬೀತು. ಭಯೋತ್ಪಾದಕ ಕೃತ್ಯ, ಉಗ್ರ ಕೃತ್ಯಕ್ಕಾಗಿ ಹಣ ಸಂಗ್ರಹ, ಉಗ್ರ ಕೃತ್ಯಕ್ಕೆ ಪಿತೂರಿ ಹಾಗೂ ಭಯೋತ್ಪಾದನಾ ಸಂಘಟನೆ ಸದಸ್ಯನಾಗಿ ಕಾರ್ಯ ನಿರ್ವಹಿಸಿದ ಆರೋಪಗಳು ಭಾರತೀಯ ದಂಡ ಸಂಹಿತೆಯ ಅಡಿ ಸಾಬೀತು. ಆದ್ರೆ, ತನ್ನ ವಿರುದ್ಧದ ಆರೋಪವನ್ನು ನಿರಾಕರಿಸಿದ ಮಲಿಕ್.

ಇದೀಗ ಅಂದರೆ, ಮೇ 25, 2022ರಂದು ಯಾಸಿನ್ ಮಲಿಕ್‌ಗೆ ಜೀವಾವಧಿ ಶಿಕ್ಷೆ ವಿಧಿಸಿ ಆದೇಶ ನೀಡಿದ ದಿಲ್ಲಿ ನ್ಯಾಯಾಲಯ..