ಕೊರೊನಾ ವೈರಸ್‌: ವಾಟ್ಸಾಪ್‌ಗಳಲ್ಲಿ ಬರೋದನ್ನೆಲ್ಲಾ ನಂಬದಿರಿ, ಇಲ್ಲಿದೆ ನೈಜ ಮಾಹಿತಿ

ಕೊರೊನಾ ವೈರಾಣು ಬಗ್ಗೆ ಭಯಪಡಬೇಡಿ. ಆದರೆ, ಎಚ್ಚರಿಕೆಯನ್ನು ವಹಿಸಿ. ಸೋಂಕು ಸಂಬಂಧ ಅನೇಕ ಮಿಥ್ಯಗಳು ಹರಡುತ್ತಿವೆ. ಆ ಬಗ್ಗೆ ಎಚ್ಚರ ವಹಿಸಿ. ಸರಿಯಾದ ಮಾಹಿತಿಯನ್ನಷ್ಟೇ ನಂಬಿ ಮತ್ತು ಇತರರಿಗೂ ಹೇಳಿ.

ಮೇಲಿಂದ ಮೇಲೆ ಸೋಪು ಹಾಕಿ ಕೈ ತೊಳೆದುಕೊಳ್ಳಿ. ವೈಯಕ್ತಿಕ ಆರೋಗ್ಯದ ಬಗ್ಗೆ ಹೆಚ್ಚು ಕಾಳಜಿ ವಹಿಸಿ. ಸಾಮಾಜಿಕ ಅಂತರ ಕಾಯ್ದುಕೊಳ್ಳುವ ಮೂಲಕ ಸಾಮಾಜಿಕ ಜವಾಬ್ದಾರಿಯನ್ನು ಮೆರೆಯಿರಿ. ಕೊರೊನಾ ವೈರಾಣು ಸಂಬಂಧ ದಿಲ್ಲಿಯ ಎಐಐಎಂಎಸ್‌ ಕೆಲವು ಮೂಲಭೂತ ಮಾಹಿತಿಯನ್ನು ಒದಗಿಸಿದೆ. ಆ ಬಗ್ಗೆ ಇಲ್ಲಿದೆ ವಿವರ.

Vijaya Karnataka Web

1. ಏನಿದು ಕೊರೊನಾ ವೈರಸ್‌ (COVID-19)
   ಕೋವಿಡ್‌ 19 ಒಂದು ಸಾಂಕ್ರಾಮಿಕ ವೈರಾಣು. ಕೊರೊನಾ ವೈರಸ್‌ ಫ್ಯಾಮಿಲಿಗೆ ಸೇರಿದ್ದು ಎಂದು ಸಂಶೋಧಿಸಲಾಗಿದೆ.
2. ಕೊರೊನಾ ಸೋಂಕು ಹರಡುವ ಬಗೆ ಹೇಗೆ?
   - ಸೋಂಕಿತ ವ್ಯಕ್ತಿ ಸೀನಿದಾಗ, ಕೆಮ್ಮಿದಾಗ ಗಾಳಿಯಲ್ಲಿ ಸಾಕಷ್ಟು ಹನಿಗಳು ಉಳಿಯುತ್ತವೆ. ಅದು ನೆಲದ ಮೇಲೆ ಅಥವಾ ಹತ್ತಿರದ ಯಾವುದೇ ಮೇಲ್ಮೈ ಮೇಲೆ ಆಶ್ರಯ ಪಡೆದುಕೊಳ್ಳುತ್ತವೆ. - ವೈರಸ್‌ ಇರುವ ಮೇಲ್ಮೈಯನ್ನು ಯಾರಾದರೂ ಸ್ಪರ್ಶಿಸಿದರೆ ಅದು ಅವರ ಕೈಗೆ ಅಂಟಿಕೊಳ್ಳುತ್ತವೆ. ಆತ ಅದೇ ಕೈಗಳಿಂದ ಮುಖ, ಕಣ್ಣು ಅಥವಾ ಬಾಯಿ ಸ್ಪರ್ಶಿಸಿದರೆ ಸೋಂಕು ದೇಹವನ್ನು ಪ್ರವೇಶಿಸುತ್ತದೆ. - ಸೋಂಕಿತ ವ್ಯಕ್ತಿಯಿಂದ ಒಂದು ಮೀಟರ್‌ಗಿಂತ ಕಡಿಮೆ ಅಂತರದಲ್ಲಿಆರೋಗ್ಯವಂತ ವ್ಯಕ್ತಿ ಇದ್ದಾಗ ಸೋಂಕು ಹರಡುವ ಪ್ರಮಾಣ ಹೆಚ್ಚಾಗಿರುತ್ತದೆ.
3. ಕೊರೊನಾ ಸೋಂಕು ತಗುಲಿದಾಗ ಏನಾಗುತ್ತದೆ?
   - ಸೋಂಕು ತಗುಲಿದ ಬಹಳಷ್ಟು ವ್ಯಕ್ತಿಗಳಿಗೆ(ಶೇ.80) ಚಿಕಿತ್ಸೆ ಅಗತ್ಯವಿರುವುದಿಲ್ಲ. ತಮ್ಮಷ್ಟಕ್ಕೆ ತಾವೇ ಗುಣಮುಖರಾಗುತ್ತಾರೆ. - ಕೆಲವೊಂದಿಷ್ಟು ಜನರಿಗೆ(ಶೇ.20) ಆಸ್ಪತ್ರೆಯ ಅಗತ್ಯ ಬೀಳುತ್ತದೆ. - ತೀರಾ ಕಡಿಮೆ ಪ್ರಮಾಣದ ಜನರಿಗೆ ತುರ್ತು ನಿಗಾ ಘಟಕದ(ಐಸಿಯು) ಚಿಕಿತ್ಸೆ ಅಗತ್ಯವಿರುತ್ತದೆ. ವಿಶೇಷವಾಗಿ ದೀರ್ಘಕಾಲೀನ ರೋಗಗಳಿಂದ ಬಳಲುತ್ತಿರುವವರಿಗೆ.
4. ಕೊರೊನಾ ಯಾವ ವಯಸ್ಸಿನವರಿಗೆ ತಗಲುತ್ತದೆ? ಮಕ್ಕಳಿಗೆ ತಗಲುತ್ತದೆಯಾ?
   - ಎಲ್ಲ ವಯೋಮಾನದವರಿಗೂ ಇದು ತಗಲುತ್ತದೆ. - ಮನೆಯಲ್ಲಿ ಸೋಂಕಿತ ವ್ಯಕ್ತಿಯಿದ್ದರೆ ಖಂಡಿತವಾಗಿಯೂ ಮಕ್ಕಳಿಗೂ ಸೋಂಕು ಹರಡುತ್ತದೆ. - ಆದರೆ, ಮಕ್ಕಳಲ್ಲಿ ಈ ಸೋಂಕಿನ ಪ್ರಮಾಣದ ತುಂಬ ಕಡಿಮೆ ಇರುತ್ತದೆ. - ವಯಸ್ಸಾದವರು ಮತ್ತು ಈಗಗಾಲೇ ಬೇರೆ ಬೇರೆ ಕಾಯಿಲೆಗಳಿಂದ ಬಳಲುತ್ತಿರುವವರಿಗೆ(ರಕ್ತದೊತ್ತಡ, ಹೃದಯ ಸಂಬಂಧಿ ಕಾಯಿಲೆಗಳು, ಶ್ವಾಸಕೋಶ ಸಂಬಂಧಿ ಕಾಯಿಲೆಗಳು, ಕ್ಯಾನ್ಸರ್‌ ಅಥವಾ ಮಧುಮೇಹ) ಇದು ತೀರಾ ಅಪಾಯಕಾರಿಯಾಗಿರುತ್ತದೆ.
5. ಕೊರೊನಾ ವೈರಾಣು ಎಷ್ಟು ಹೊತ್ತು ಬದುಕಿರುತ್ತದೆ?
   ಪರಿಸ್ಥಿತಿ(ಉದಾ- ಮೇಲ್ಮೈಯ ಪ್ರಕಾರ, ವಾತಾವರಣದಲ್ಲಿನ ತಾಪಮಾನ ಅಥವಾ ತೇವಾಂಶ)ಯ ಅನುಗುಣವಾಗಿ ವೈರಾಣು ಜೀವಿತಾವಧಿಯಲ್ಲಿ ವ್ಯತ್ಯಾಸವಿರುತ್ತದೆ. ಆದರೆ, ನ್ಯೂ ಇಂಗ್ಲೆಂಡ್‌ ಜರ್ನಲ್‌ ಆಫ್‌ ಮೆಡಿಸಿನ್‌ ಪ್ರಕಾರ, ಕೋವಿಡ್‌ 19 ವೈರಾಣು ಗಾಳಿಯಲ್ಲಿ 3 ಗಂಟೆ, ತಾಮ್ರದ ವಸ್ತುಗಳ ಮೇಲೆ 4 ಗಂಟೆ, ಕಾರ್ಡ್‌ಬೋರ್ಡ್‌ ಮೇಲೆ 1 ದಿನ, ಸ್ಟೇನ್‌ಲೆಸ್‌ ಸ್ಟೀಲ್‌ಗಳ ಮೇಲೆ 2ರಿಂದ 3 ದಿನಗಳವರೆಗೆ ಮತ್ತು ಪ್ಲಾಸ್ಟಿಕ್‌ಗಳ ಮೇಲೆ 4 ದಿನಗಳವರೆಗೆ ಜೀವಂತವಾಗಿರತ್ತದೆ. ಆದರೆ, ತಾಪಮಾನ ಮತ್ತು ತೇವಾಂಶವು ವೈರಾಣು ಬದುಕಿನ ಅವಧಿಯ ಮೇಲೆ ಪ್ರಮುಖ ಪರಿಣಾಮ ಪರಿಣಾಮ ಬೀರುತ್ತದೆ.
6. ಕೊರೊನಾ ತಡೆಗೆ ನಾವು ಏನು ಮಾಡಬೇಕು?
   - ಒಂದು ವೇಳೆ ಮೇಲ್ಮೈಗಳು ಸೋಂಕಿತವಾಗಿವೆ ಅಂತಾ ಅನಿಸಿದರೆ ವೈರಾಣು ನಿರೋಧಕಗಳನ್ನು ಬಳಸಿ ಸ್ವಚ್ಛ ಮಾಡಿ. ಇದರಿಂದ ನೀವು ಮತ್ತು ನಿಮ್ಮ ಹತ್ತಿರದವರು ಸುರಕ್ಷಿತವಾಗಿರುತ್ತೀರಿ. - ಅಲ್ಕೋಹಾಲ್‌ ಆಧರಿತ ಹ್ಯಾಂಡ್‌ ರಬ್‌ಗಳಿಂದ ಅಥವಾ ಸಾಬೂನು ಮತ್ತು ನೀರಿನಿಂದ ಕ್ಲೀನಾಗಿ ಕೈ ತೊಳೆದುಕೊಳ್ಳಿ. - ನಿಮ್ಮ ಕಣ್ಣು, ಬಾಯಿ ಮತ್ತು ಮೂಗುಗಳನ್ನು ಸ್ಪರ್ಶಿಸುವುದನ್ನು ಬಿಡಿ.
7. ಕೊರೊನಾದ ಸಾಮಾನ್ಯ ಲಕ್ಷಣಗಳೇನು?
   - ಜ್ವರ, ಗಂಟಲು ಕೆರೆತ, ಕೆಮ್ಮು ಮತ್ತು ಉಸಿರಾಟದ ತೊಂದರೆ. - ಶೀತ ಮತ್ತು ಇನ್‌ಫ್ಲುಯೆಂಜಾ ವೈರಾಣು ಸೋಂಕು ಇದ್ದಾಗೂ ಇದೇ ರೀತಿಯ ಲಕ್ಷಣಗಳಿರುತ್ತವೆ.
8. ಕೊರೊನಾ ಲಕ್ಷಣ ಕಂಡುಬಂದರೆ ಯಾರನ್ನು ಸಂಪರ್ಕಿಸಬೇಕು?
   - ಉಸಿರಾಟದ ತೊಂದರೆ ಕಾಣಿಸಿಕೊಂಡರೆ ಕುಟುಂಬದ ವೈದ್ಯರನ್ನು ಕಾಣಿ - ಕೊರೊನಾಪೀಡಿತ ದೇಶಗಳಿಗೆ ಪ್ರಯಾಣ ಕೈಗೊಂಡಿದ್ದರೆ - ಸೋಂಕಿತ ವ್ಯಕ್ತಿಯ ಜತೆ ನಿಮಗೆ ನಿಕಟ ಸಂಪರ್ಕ ಏರ್ಪಟ್ಟಿದ್ದರೆ ವೈದ್ಯರನ್ನು ಕಾಣಿ.
9. ಕೊರೊನಾ ಸಂಬಂಧಿ ಯಾವ ಪರೀಕ್ಷೆಗಳನ್ನು ಮಾಡಲಾಗುತ್ತದೆ?
   - ಒಂದು ವೇಳೆ ಲಕ್ಷಣಗಳು(ಕೆಮ್ಮು, ಜ್ವರ ಅಥವಾ ಉಸಿರಾಟದಲ್ಲಿತೊಂದರೆ) ಇಲ್ಲದಿದ್ದರೆ ನೀವು ಕೋವಿಡ್‌ 19 ಪರೀಕ್ಷೆಗೊಳಪಡಬೇಕಿಲ್ಲ. - ಈ ಮೇಲೆ ಹೇಳಲಾಗಿರುವ ಯಾವುದೇ ಲಕ್ಷಣಗಳು ಕಂಡ ಬಂದರೆ, ಕೋವಿಡ್‌ 19 ಪೀಡಿತ ದೇಶಕ್ಕೆ ಪ್ರಯಾಣ ಕೈಗೊಂಡಿದ್ದರೆ ಅಥವಾ ಸೋಂಕಿತ ವ್ಯಕ್ತಿಯ ಸಂಪರ್ಕಕ್ಕೆ ಬಂದಿದ್ದರೆ ಕೂಡಲೇ ಹೆಲ್ತ್‌ ಹೆಲ್ಪ್‌ಲೈನ್‌ಗಳಿಗೆ ಕರೆ ಮಾಡಿ. - ಹೆಲ್ಪ್‌ಲೈನ್‌ಗೆ ಕರೆ ಮಾಡಿದಾಗ, ನಿಮ್ಮ ಸಂಪರ್ಕ ಸಂಖ್ಯೆಯನ್ನು ನಮೂದಿಸಿಕೊಳ್ಳಲಾಗುತ್ತದೆ. ಕೋವಿಡ್‌ 19 ಪರೀಕ್ಷೆಗೆ ಸಂಬಂಧಿಸಿದಂತೆ ನಿಮ್ಮನ್ನು ಸಂಪರ್ಕಿಸಲಾಗುತ್ತದೆ. - ಒಂದು ವೇಳೆ, ಕೋವಿಡ್‌ 19 ಪರೀಕ್ಷೆಗೆ ನೀವು ಅರ್ಹರಾಗಿದ್ದೀರಿ ಎಂದಾದರೆ, ಸರಕಾರ ಸೂಚಿಸಿದ ಲ್ಯಾಬ್‌ನಲ್ಲಿ ನಿಮ್ಮನ್ನು ಪರೀಕ್ಷಿಸಲಾಗುತ್ತದೆ.
10. ಕೊರೊನಾ ಸೋಂಕಿಗೆ ಚಿಕಿತ್ಸೆ ಇದೆಯಾ?
    - ಈ ತನಕ ಈ ಸೋಂಕು ತಡೆಗೆ ಯಾವುದೇ ಚಿಕಿತ್ಸೆ ಇಲ್ಲ. - ಕೊರೊನೊ ಸೋಂಕಿನಿಂದಾಗಿ ಉದ್ಭವವಾಗುವ ಲಕ್ಷಣಗಳ ಆಧರಿತ ಚಿಕಿತ್ಸೆ ನೀಡಬಹುದು. - ಶೇ.80ರಷ್ಟು ಪ್ರಕರಣಗಳು ಕೆಲವೇ ದಿನಗಳಲ್ಲಿ ಗುಣಮುಖರಾಗುತ್ತಾರೆ. - ಅನೇಕ ರೋಗಗಳ ಲಕ್ಷಣಗಳನ್ನು ಹೊಂದಿದವರಿಗೆ ಈ ಸೋಂಕು ತಗುಲಿದ್ದರೆ ಅಂಥವರಿಗೆ ಆಸ್ಪತ್ರೆ ಚಿಕಿತ್ಸೆ ಇಲ್ಲವೇ ತೀವ್ರ ನಿಗಾ ಘಟಕದ ಚಿಕಿತ್ಸೆ ಅಗತ್ಯವಿರುತ್ತದೆ.

(ಮಾಹಿತಿ: ಎಐಐಎಂಎಸ್‌, ಹೊಸದಿಲ್ಲಿ)

ರಾಜ್ಯದಲ್ಲಿ ಲಾಕ್‌ಡೌನ್‌: ಏನೇನು ನಿರ್ಬಂಧಗಳಿವೆ? ಯಾವುದಕ್ಕೆಲ್ಲ ವಿನಾಯಿತಿ ಇದೆ? ಇಲ್ಲಿದೆ ಮಾಹಿತಿ