ಮೋದಿ ಸರಕಾರದಲ್ಲಿ ನಂ 2 ಸ್ಥಾನ ಯಾರದ್ದು?; ಫೋಟೋ ಬಹಿರಂಗ ಪಡಿಸಿದ ಸತ್ಯ

ಹೊಸದಿಲ್ಲಿ: 17ಲೋಕಸಭೆಯ ಮೊದಲ ಅಧಿವೇಶನ ಇಂದು ಆರಂಭವಾಗಿದ್ದು, ನೂತನ ಸಂಸದರ ಪ್ರಮಾಣ ವಚನ ನಡೆಸಲ್ಪಟ್ಟಿತು. ಎಲ್ಲರಿಗಿಂತ ಮೊದಲು ಸದನದ ನಾಯಕ ಪ್ರಧಾನಿ ನರೇಂದ್ರ ಮೋದಿ ಅವರು ಪ್ರಮಾಣ ವಚನ ಸ್ವೀಕರಿಸಿದರು. ಇದರ ಬಳಿಕ ಅವರ ಪಕ್ಕದಲ್ಲಿ ಯಾರು ಕುಳಿತುಕೊಳ್ಳಲಿದ್ದಾರೆ ಅಂದರೆ ಸರಕಾರದ ಎರಡನೇ ನಾಯಕ ಯಾರು ಎಂಬ ಕುತೂಹಲಕಾರಿ ಪ್ರಶ್ನೆಗೆ ಸ್ಪಷ್ಟ ಉತ್ತರ ಸಿಕ್ಕಿತು.

ಸಾಮಾನ್ಯವಾಗಿ ಗೃಹ ಮಂತ್ರಿ ಪ್ರಧಾನಿ ಸ್ಥಾನದ ನಂತರದ ಸ್ಥಾನದಲ್ಲಿರುತ್ತಾರೆ. ಅಂದರೆ ಸರಕಾರದಲ್ಲಿ ಎರಡನೇ ಮುಖ್ಯಸ್ಥರಾಗಿರುತ್ತಾರೆ ಎನ್ನಲಾಗುತ್ತದೆ. ರಕ್ಷಣಾ ಮಂತ್ರಿ ಮೂರನೇ ಸ್ಥಾನದಲ್ಲಿರುತ್ತಾರೆ.

ಹೀಗಾಗಿ ಗೃಹ ಸಚಿವರಾಗಿರುವ ಅಮಿತ್ ಶಾ ಮೋದಿ ಅವರ ಪಕ್ಕ ಕುಳಿತುಕೊಳ್ಳುತ್ತಾರೆ ಎಂದು ಭಾವಿಸಲಾಗಿತ್ತು. ಆದರೆ ಕುಳಿತಿದ್ದು ರಾಜನಾಥ್ ಸಿಂಗ್.


ಹಾಗಾದರೆ ಅಮಿತ್ ಶಾ ಎಲ್ಲಿ ಕುಳಿತರು ಎಂಬ ಪ್ರಶ್ನೆಗೆ ಉತ್ತರ- ಅವರು ಸುಷ್ಮಾ ಸ್ವರಾಜ್ ಕುಳಿತುಕೊಳ್ಳುತ್ತಿದ್ದ ಜಾಗದಲ್ಲಿ ಆಸೀನರಾಗಿದ್ದು ಕಂಡುಬಂತು. ಸುಷ್ಮಾ ಜತೆ ಅಡ್ವಾಣಿ ಕುಳಿತುಕೊಳ್ಳುತ್ತಿದ್ದ ಜಾಗದಲ್ಲಿ ಥಾವರ್ ಚಂದ್ ಗೆಹ್ಲೋಟ್ ಕುಳಿತಿದ್ದರು.

ರಾಜನಾಥ್ ಸಿಂಗ್ ಲೋಕಸಭೆಯ ಉಪ ನಾಯಕರಾಗಿ ಆಯ್ಕೆಯಾಗಿದ್ದಾರೆ.