ಕೋವಿಡ್‌ ಲಸಿಕೆ ಪೂರೈಸಿದ ಭಾರತ, ಮೋದಿಗೆ ಥ್ಯಾಂಕ್ಯೂ: ವಿಶ್ವ ಆರೋಗ್ಯ ಸಂಸ್ಥೆ

ಹೊಸದಿಲ್ಲಿ: ಕೊರೊನಾ ಎಂಬ ಮಹಾಮಾರಿ ವಿರುದ್ಧ ಹೋರಾಟ ನಡೆಸಲು ಅಭಿವೃದ್ಧಿ ಹೊಂದಿದ ದೇಶಗಳು ಪರದಾಡುತ್ತಿರುವ ಸಂದರ್ಭದಲ್ಲಿ ದಿಟ್ಟತನ ಹಾಗೂ ಕ್ರಿಯಾಶೀಲ ಯೋಜನೆಗಳಿಂದ ಸೋಂಕು ವಿರುದ್ಧ ಹೋರಾಟ ನಡೆಸುತ್ತಿರುವ ಭಾರತದ ಕಾರ್ಯಕ್ಕೆ ವಿಶ್ವ ಆರೋಗ್ಯ ಸಂಸ್ಥೆ ಶಹಬ್ಬಾಸ್‌ ಎಂದಿದೆ.

ಅದರಲ್ಲೂ ಕೊರೊನಾ ಲಸಿಕೆಯನ್ನು ಅಭಿವೃದ್ಧಿಪಡಿಸಿ, ಇಡೀ ವಿಶ್ವದಲ್ಲೇ ಅತಿ ಬೃಹತ್‌ ಲಸಿಕೆ ಅಭಿಯಾನಕ್ಕೆ ಚಾಲನೆ ನೀಡಿದ್ದಲ್ಲದೇ ಪ್ರಮುಖ ದೇಶಗಳಿಗೂ ಇದನ್ನು ರವಾನೆ ಮಾಡುತ್ತಿರುವ ಭಾರತದ ಕಾರ್ಯ ಮಹತ್ತರವಾದುದು. ಇದು ನಿಜಕ್ಕೂ ಶ್ಲಾಘನೀಯ ಎಂದು ವಿಶ್ವ ಆರೋಗ್ಯ ಸಂಸ್ಥೆಯ ಮುಖ್ಯಸ್ಥ
ಟೆಡ್ರೋಸ್ ಅಧನಾಮ್ ಗೆಬ್ರಿಯೆಸಸ್ ತಿಳಿಸಿದ್ದಾರೆ.

ಥ್ಯಾಂಕ್ಯೂ, ಇಂಡಿಯಾ, ಪ್ರಧಾನಮಂತ್ರಿ ನರೇಂದ್ರ ಮೋದಿ, ಕೋವಿಡ್‌ 19 ಸೋಂಕು ವಿರುದ್ಧ ಜಾಗತಿಕ ಮಟ್ಟದ ಹೋರಾಟಕ್ಕೆ ಕೈ ಜೋಡಿಸಿರುವುದಕ್ಕೆ. ಈ ರೀತಿಯಾಗಿ ನಾವು ಒಗ್ಗಟ್ಟಿನಿಂದ ಮುನ್ನುಗ್ಗಿದರೆ ಮಾತ್ರ ಯಾವುದೇ ರೀತಿಯ ಸಮಸ್ಯೆಗಳನ್ನು ಎದುರಿಸಬಹುದಾಗಿದೆ. ಇಂಥ ಪ್ಯಾಂಡಮಿಕ್‌ ಸಮಯದಲ್ಲಿ ಜೀವ ಹಾಗೂ ಜೀವನವನ್ನು ಉಳಿಸುವುದು ಸಾಧ್ಯವಾಗಿದೆ ಎಂದು ಟೆಡ್ರೋಸ್ ಅಧನಾಮ್ ಗೆಬ್ರಿಯೆಸಸ್ ಹೊಗಳಿದ್ದಾರೆ.

ಭಾರತದಲ್ಲಿ ಈಗಾಗಲೇ ಕೊರೊನಾ ಲಸಿಕೆ ನೀಡಿಕೆ ಕಾರ್ಯ ಮುಂದುವರಿದಿದೆ. ಈಗಾಗಲೇ ಕೆಲವು ದೇಶಗಳಿಗೆ ಕೊರೊನಾ ಲಸಿಕೆಯನ್ನು ಪೂರೈಸಲು ಭಾರತ ಮುಂದಾಗಿದೆ. ಬಾಂಗ್ಲಾದೇಶ, ಬ್ರೆಜಿಲ್‌ಗೆ ಲಕ್ಷಾಂತರ ಡೋಸ್‌ಗಳ ಲಸಿಕೆಯನ್ನು ರವಾನಿಸಲಾಗಿದೆ.

ಮುಂದಿನ ದಿನಗಳಲ್ಲಿ ಇನ್ನಷ್ಟು ದೇಶಗಳಿಗೆ ಕೊರೊನಾ ಲಸಿಕೆ ಪೂರೈಕೆ ಮಾಡಲು ಭಾರತ ಈಗಾಗಲೇ ನಿರ್ಧರಿಸಿದೆ.