ಗುಜರಾತ್ ಚುನಾವಣೆ ಫಲಿತಾಂಶದ ಮೇಲೆ ಚೀನಾಗೇಕೆ ಕಣ್ಣು?

ಹೊಸದಿಲ್ಲಿ: ಗುಜರಾತ್ ಚುನಾವಣೆ ಫಲಿತಾಂಶದ ಮೇಲೆ ಚೀನಾ ಕಣ್ಣಿಟ್ಟಿದ್ದು, ಇದು ಪ್ರಧಾನಿ ನರೇಂದ್ರ ಮೋದಿ ಅವರ ಆರ್ಥಿಕ ಸುಧಾರಣಾ ಯೋಜನೆಗಳ ಬಗ್ಗೆ ಜನರು ನೀಡುವ 'ಲಿಟ್ಮಸ್ ಪರೀಕ್ಷೆ' ಎಂದೇ ಚೀನಾ ಮಾಧ್ಯಮಗಳು ವರದಿ ಮಾಡಿವೆ.

ಅಷ್ಟಕ್ಕೂ ಭಾರತೀಯರ ಮತದಾರರ ನಿಲವು ಚೀನಾ ಮೇಲೆ ಬೀರುವ ಪರಿಣಾಮವೇನು?

ಭಾರತದೊಂದಿಗೆ ಚೀನಾ ಆರ್ಥಿಕ ಬಾಂಧವ್ಯ ಹೊಂದಿದ್ದು, ಭಾರತದ ಆರ್ಥಿಕ ಸುಧಾರಣೆಗಳು ಈ ನೆರೆ ರಾಷ್ಟ್ರದ ಮೇಲೂ ಪ್ರಭಾವ ಬೀರಲಿದೆ, ಎಂದು ಸರಕಾರಿ ಸ್ವಾಮ್ಯದ ಗ್ಲೋಬಲ್ ಟೈಮ್ಸ್ ವರದಿ ಮಾಡಿದೆ. ಭಾರದ ಆರ್ಥಿಕ ಸುಧಾರಣೆಯಲ್ಲಿ ಏನೇ ಬದಲಾವಣೆಯಾದರೂ ಅದು ಚೀನಾದ ಮೇಲೆ ಮೊದಲು ಪ್ರಭಾವ ಬೀರುತ್ತದೆ, ಎಂದು ವರದಿ ವಿಶ್ಲೇಷಿಸಿದೆ.

'ಚೀನಾದ ಒಪ್ಪೋ, ಕ್ಸಿಯೋಮಿನಂಥ ಅನೇಕ ಕಂಪನಿಗಳು ಭಾರತದೊಂದಿಗೆ ನೇರ ಸಂಪರ್ಕ ಹೊಂದಿದ್ದು, ಭಾರತದ ಆರ್ಥಿಕ ಸುಧಾರಣೆಗಳೊಂದಿಗೆ ಈ ಕಂಪನಿಗಳ ಪ್ರಗತಿಯೂ ಅವಲಂಬಿಸಿದೆ. ಅಕಸ್ಮಾತ್ ಗುಜರಾತ್‌ನಲ್ಲಿ ಮೋದಿ ಗೆದ್ದರೆ, ಭಾರತೀಯರು ಮೋದಿಯ ಆರ್ಥಿಕ ಸುಧಾರಣೆಗಳ ಬಗ್ಗೆ ವಿಶ್ವಾಸ ಹೊಂದಿದ್ದಾರೆಂದು ಅರ್ಥ ಮಾಡಿಕೊಳ್ಳಲಿರುವ ಮೋದಿ ನೇತೃತ್ವದ ಸರಕಾರ ಮತ್ತಷ್ಟು ಆರ್ಥಿಕ ಸುಧಾರಣೆಗಳಿಗೆ ಮುಂದಾಗಲಿದೆ,' ಎಂದು ವರದಿ ಹೇಳಿದೆ.

ಅಕಸ್ಮಾತ್ ಬಿಜೆಪಿ ಸೋತರೆ, ಮೋದಿ ಸರಕಾರದ ಆರ್ಥಿಕ ಸುಧಾರಣಾ ಕ್ರಮಗಳಿಗೆ ಹಿನ್ನಡೆಯಾಗಲಿದೆ, ಎಂದು ವರದಿ ಹೇಳಿದೆ.