ಬಲೂಚಿಸ್ತಾನ: ಮೋದಿ ನಿಲುವಿಗೆ ಕಾಂಗ್ರೆಸ್‌ ಬೆಂಬಲ

ಹೊಸದಿಲ್ಲಿ: ಬಲೂಚಿಸ್ತಾನದಲ್ಲಿ ಮಾನವ ಹಕ್ಕುಗಳ ಉಲ್ಲಂಘನೆ ಕುರಿತು ಪ್ರಧಾನಿ ಮೋದಿ ಅವರು ವ್ಯಕ್ತಪಡಿಸಿರುವ ಕಾಳಜಿಯನ್ನು ಕಾಂಗ್ರೆಸ್‌ ಬೆಂಬಲಿಸಿದೆ.

ಪಾಕಿಸ್ತಾನವು ಕಾಶ್ಮೀರಕ್ಕೆ ಸಂಬಂಧಿಸಿದಂತೆ ಹರಿಯ ಬಿಡುತ್ತಿರುವ ವಾದಕ್ಕೆ ಕಾಂಗ್ರೆಸ್‌ ನೀಡುತ್ತಿರುವ ಪ್ರತಿಕ್ರಿಯೆ ಅಸಹಕಾರ ಧೋರಣೆ ಹೊಂದಿರುವ ನೆರೆಯ ರಾಷ್ಟ್ರಕ್ಕೆ ಸಂಬಂಧಿಸಿದಂತೆ ಭಾರತವು ಒಮ್ಮತದ ನಿರ್ಣಾಯಕ ನಿಲುವನ್ನು ರೂಪಿಸಿಕೊಳ್ಳಲು ನೆರವಾಗಲಿದೆಯೇ ಎಂಬ ನಿರೀಕ್ಷೆಯನ್ನು ಹುಟ್ಟು ಹಾಕಿದೆ.

ಕಾಶ್ಮೀರ ಸಂತ್ರಸ್ತರ ವಿಚಾರದಲ್ಲಿ ಪರಂಪರಾಗತವಾಗಿ ಒಮ್ಮುಖ ದೋರಣೆ ತಾಳುತ್ತಾ ಬಂದಿದ್ದ ಕಾಂಗ್ರೆಸ್‌ ಆ ಕಳಂಕ ಅಂಟಿರುವ ಕೈಗಳನ್ನು ಬಲೂಚಿಸ್ತಾನದ ಮೂಲಕ ಶುದ್ಧಗೊಳಿಸಲು ಹೊರಟಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ. ನೀತಿಗಳ ಪರಿಶೀಲನೆ ಮತ್ತು ದೇಶೀಯ ರಾಜಕೀಯ ಪ್ರಭಾವ ಹೆಚ್ಚಿಸಿಕೊಳ್ಳುವಲ್ಲಿ ಕಾಂಗ್ರೆಸ್‌ ಮೋದಿ ಅವರ ಆಕ್ರಮಣಶೀಲತೆಯ ಜತೆಯಲ್ಲೇ ತನ್ನ ಚೆಂಡನ್ನು ಉರುಳಿಸುವ ನಿರ್ಧಾರ ತಾಳಿದೆ ಎನ್ನಲಾಗುತ್ತಿದೆ.

ಪ್ರಧಾನಿ ನರೇಂದ್ರ ಮೋದಿ ಅವರು ಸ್ವಾತಂತ್ರ್ಯ ದಿನಾಚರಣೆ ವೇಳೆ ಬಲೂಚಿಸ್ತಾನದ ಬಗ್ಗೆ ನೀಡಿದ ಹೇಳಿಕೆಗೆ ಮಾಜಿ ವಿದೇಶ ಸಚಿವ ಸಲ್ಮಾನ್‌ ಖುರ್ಷಿದ್ ಆಕ್ಷೇಪ ವ್ಯಕ್ತಡಿಸಿದ್ದು, ಪಾಕ್‌ ಆಕ್ರಮಿತ ಕಾಶ್ಮೀರ ಮತ್ತು ಬಲೂಚಿಸ್ತಾನಕ್ಕೆ ವ್ಯತ್ಯಾಸವಿದೆ. ಬಲೂಚಿಸ್ತಾನ ಪಾಕ್‌ನ ಆಂತರಿಕ ವಿಷಯ. ಆ ಬಗ್ಗೆ ಮಾತನಾಡಿದರೆ ಪಾಕ್‌ ಆಕ್ರಮಿತ ಕಾಶ್ಮೀರಕ್ಕೆ ಸಂಬಂಧಿಸಿದಂತೆ ಭಾರತದ ವಾದ ದುರ್ಬಲಗೊಳ್ಳಲಿದೆ ಎಂದು ಎಚ್ಚರಿಕೆ ನೀಡಿದ್ದಾರೆ. ಆದರೆ ಅದು ಖುರ್ಷಿದ್‌ ಅವರ ವೈಯಕ್ತಿಕ ಅಭಿಪ್ರಾಯ ಎಂದು ಕಾಂಗ್ರೆಸ್‌ ನಿರಾಕರಿಸಿದೆ.

ಬಲೂಚಿಸ್ತಾನ ಇರಬಹುದು ಇಲ್ಲವೇ ಪಾಕ್‌ ಆಕ್ರಮಿತ ಕಾಶ್ಮೀರ ಆಗಿರಬಹುದು ಅಥವಾ ಪಾಕಿಸ್ತಾನದ ಇತರ ಭಾಗಗಳಲ್ಲೇ ಆದರೂ ಪಾಕ್‌ ಏಜೆನ್ಸಿಗಳು ಮತ್ತು ಸೇನೆಗಳೇ ಮಾನವ ಹಕ್ಕುಗಳನ್ನು ಉಲ್ಲಂಘಿಸುತ್ತಿವೆ. ಹೀಗಿರುವಾಗ ಪ್ರಜಾಪ್ರಭುತ್ವವನ್ನು ಹತ್ತಿಕ್ಕಲಾಗುತ್ತಿರುವ ಬಲೂಚಿಸ್ತಾನದ ವಿವಾದವನ್ನು ಭಾರತವು ದ್ವಿಪಕ್ಷೀಯ ಮತ್ತು ಅಂತಾರಾಷ್ಟ್ರೀಯ ವೇದಿಕೆಗಳಲ್ಲಿ ಕೈಗೆತ್ತಿಕೊಳ್ಳಬೇಕು ಎಂದು ಎಐಸಿಸಿ ವಕ್ತಾರ ರಣ್‌ದೀಪ್‌ ಸುರ್ಜೆವಾಲ ಹೇಳಿದ್ದಾರೆ.