ಆನೆ ದಾಳಿಗೆ ಐವರು ಬಲಿ

ಭುವನೇಶ್ವರ: ಒಡಿಶಾದ ಅಂಗುಲ್‌ ಜಿಲ್ಲೆಯಲ್ಲಿ ಕಾಡಾನೆಯೊಂದು ಹಲವು ಗ್ರಾಮಗಳಿಗೆ ನುಗ್ಗಿ ದಾಂಧಲೆ ನಡೆಸಿದ್ದು, ಒಬ್ಬ ಮಹಿಳೆ ಹಾಗೂ ಇಬ್ಬರು ಬಾಲಕಿಯರು ಸೇರಿದಂತೆ ಐವರನ್ನು ಬಲಿ ಪಡೆದಿದೆ.

ಕಾಡಿನ ಬದಿಯಲ್ಲಿರುವ ಸಂಧಾ ಗ್ರಾಮಕ್ಕೆ ಗುರುವಾರ ರಾತ್ರಿ ನುಗ್ಗಿದ ಆನೆ, ಮನೆಯ ಮುಂದೆ ವರಂಡಾದಲ್ಲಿ ಮಲಗಿದ್ದ ಒಂದೇ ಕುಟುಂಬದ ಮೂವರನ್ನು ತುಳಿದು ಕೊಂದಿದೆ.

ಮನೆಯ ಯಜಮಾನ, ಎರಡು ವರ್ಷದ ಮಗಳು ಹಾಗೂ ಪತ್ನಿಯನ್ನು ತುಳಿದುಹಾಕಿದೆ. ಬಳಿಕ ಅದೇ ಗ್ರಾಮದಲ್ಲಿ ಮನೆಯ ಮುಂದೆ ಮಲಗಿದ್ದ ಮತ್ತೊಬ್ಬ ಮಹಿಳೆಯನ್ನೂ ಆನೆ ಇದೇ ರೀತಿ ತುಳಿದು ಬಲಿ ಪಡೆದಿದೆ.

ಅದೇ ದಿನ ರಾತ್ರಿ ಪಕ್ಕದ ಸಂತಪಾದಾ ಎಂಬ ಗ್ರಾಮಕ್ಕೆ ನುಗ್ಗಿರುವ ಸಲಗ, 70 ವರ್ಷದ ವೃದ್ಧರೊಬ್ಬರನ್ನು ಕೊಂದು ಹಾಕಿದೆ.

ಅರಣ್ಯ ಇಲಾಖೆ ಸಿಬ್ಬಂದಿ ವಿರುದ್ಧ ತೀವ್ರ ಆಕ್ರೋಶ ವ್ಯಕ್ತಪಡಿಸಿರುವ ಗ್ರಾಮಸ್ಥರು ಸೂಕ್ತ ಪರಿಹಾರ ಕೋರಿ ಶುಕ್ರವಾರ ಪ್ರತಿಭಟನೆ ನಡೆಸಿದರು. ಪರಿಹಾರದ ಒದಗಿಸಿದ ಬಳಿಕ ಪ್ರತಿಭಟನೆಯನ್ನು ಕೈಬಿಡಲಾಯಿತು.

ಪುಂಡಾನೆಯನ್ನು ಕಾಡಿಗಟ್ಟುವ ಕಾರ್ಯಾಚರಣೆ ಮುಂದುವರಿದಿದೆ.