ಪಣಜಿ (ಗೋವಾ): ಇಲ್ಲಿಗೆ ಸಮೀಪದ ಮಪುವಾ ನಗರದಲ್ಲಿ ಹದಿಹರೆಯದ ಬಾಲಕನ ಮೇಲೆ ತನ್ನ ಮನೆಯಲ್ಲಿ ಲೈಂಗಿಕ ದೌರ್ಜನ್ಯ ನಡೆಸಿದ ಆರೋಪದ ಮೇರೆಗೆ ಮಹಿಳೆಯೊಬ್ಬರ ವಿರುದ್ಧ ಪೊಲೀಸರು ಪ್ರಕರಣ ದಾಖಲಿಸಿದ್ದಾರೆ.
ಜೂನ್‌ 7 ಮತ್ತು ಸೆಪ್ಟೆಂಬರ್‌ 11ರ ನಡುವೆ 29 ವರ್ಷದ ಮಹಿಳೆ ತಮ್ಮ ಮಗನ ಮೇಲೆ ಲೈಂಗಿಕ ದೌರ್ಜನ್ಯ ನಡೆಸಿದ್ದಾಳೆ ಎಂದು ಬಾಲಕನ ತಂದೆ ತಾಯಿ ಈ ವಾರಾರಂಭ ದೂರು ದಾಖಲಿಸಿದ್ದರು ಎಂದು ಮಪುವಾ ಪೊಲೀಸ್‌ ಠಾಣೆಯ ಇನ್‌ಸ್ಪೆಕ್ಟರ್‌ ತುಶಾರ್‌ ಲಾಟ್ಲಿಕರ್‌ ತಿಳಿಸಿದ್ದಾರೆ.
ಪೊಂಡಾ ಗ್ರಾಮದ 17ರ ಬಾಲಕ ಒಂದು ದಿನ ಇದ್ದಕ್ಕಿದ್ದಂತೆ ಮನೆಬಿಟ್ಟು ಓಡಿಹೋಗಿ ಮಪುವಾ ನಗರದ ಪೆಟ್ರೋಲ್‌ ಪಂಪ್‌ನಲ್ಲಿ ಕೆಲಸಕ್ಕೆ ನಿಂತಿದ್ದ. ಮನೆ ತೊರೆದಿದ್ದ ಆತ ಆ ಮಹಿಳೆಯ ಮನೆಯಲ್ಲಿ ವಾಸವಾಗಿದ್ದ. ಮೂರು ಮಕ್ಕಳ ತಾಯಿಯಾಗಿದ್ದ ಆಕೆ ವಿಚ್ಛೇದಿತೆಯಾಗಿದ್ದಳು.
ಕೆಲವು ದಿನಗಳ ತರುವಾಯ ತರುಣ ಇದ್ದಕ್ಕಿದ್ದಂತೆ ಮನೆಗೆ ವಾಪಸಾಗಿದ್ದ. ಆದರೆ, ಆತನ ವರ್ತನೆ ಎಂದಿನಂತಿರಲಿಲ್ಲ. ಹೀಗಾಗಿ ಆತನನ್ನು ಪಣಜಿಗೆ ಸಮೀಪದ ಸರಕಾರಿ ಸ್ವಾಮ್ಯದ 'ಸೈಕಿಯಾಟ್ರಿ ಅಂಡ್‌ ಹ್ಯೂಮನ್‌ ಬಿಹೇವಿಯರ್‌ (ಐಪಿಎಚ್‌ಬಿ) ಸಂಸ್ಥೆ'ಗೆ ದಾಖಲಿಸಲಾಗಿತ್ತು. ಸಂಸ್ಥೆಯಲ್ಲಿ ನಡೆಸಿದ ಕೌನ್ಸೆಲಿಂಗ್‌ ವೇಳೆ, 'ಮಹಿಳೆ ತನ್ನ ಮೇಲೆ ನಡೆಸಿದ ಲೈಂಗಿಕ ದೌರ್ಜನ್ಯ'ದ ಬಗ್ಗೆ ಬಾಲಕ ಮಾಹಿತಿ ನೀಡಿದ್ದಾನೆ ಎಂದು ಪೊಲೀಸ್‌ ಅಧಿಕಾರಿ ತಿಳಿಸಿದ್ದಾರೆ.
ಇದೀಗ ಮಹಿಳೆ ವಿರುದ್ಧ ಪೋಸ್ಕೊ ಕಾಯ್ದೆ ಹಾಗೂ ಗೋವಾ ಮಕ್ಕಳ ಕಾಯ್ದೆಯಡಿ ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು, ಗುರುವಾರ ಠಾಣೆ ಮುಂದೆ ಹಾಜರಾಗುವಂತೆ ಸಮನ್ಸ್‌ ಕಳುಹಿಸಿದ್ದಾರೆ.