ಮಾಜಿ ಪ್ರಿಯಕರರ ಕಾಟಕ್ಕೆ ಬೇಸತ್ತು ವಿಷ ಸೇವಿಸಿದ ಮಹಿಳೆ

ಅಹಮದಾಬಾದ್: ಹಳೆಯ ಪ್ರಿಯಕರರಿಬ್ಬರ ಕಾಟಕ್ಕೆ ಬೇಸತ್ತು ಮಹಿಳೆಯೋರ್ವಳು ವಿಷ ಸೇವಿಸಿ ಆತ್ಮಹತ್ಯೆಗೆ ಯತ್ನಿಸಿದ ಘಟನೆ ಉತ್ತರಪ್ರದೇಶದಲ್ಲಿ ನಡೆದಿದೆ.

ಕಳೆದ ಎರಡು ವರ್ಷಗಳ ಹಿಂದೆ ಮಹಿಳೆ ಏಕಕಾಲದಲ್ಲಿ ಇಬ್ಬರನ್ನು ಪ್ರೀತಿಸುತ್ತಿದ್ದಳು. ಮೂವರು ಸಹ ಆಸ್ಪತ್ರೆಯೊಂದರಲ್ಲಿ ಜತೆಯಾಗಿ ಕೆಲಸ ಮಾಡುತ್ತಿದ್ದರು ಎಂದು ತಿಳಿದುಬಂದಿದೆ.

ವಿಷ ಸೇವಿಸಿ ಆತ್ಮಹತ್ಯೆಗೆ ಯತ್ನಿಸಿ ಆಸ್ಪತ್ರೆ ಸೇರಿರುವ ಮಹಿಳೆಯಿಂದ ಪೊಲೀಸರು ದೂರು ದಾಖಲಿಸಿಕೊಂಡಿದ್ದಾರೆ.

ನಾನು ಎರಡು ವರ್ಷದ ಹಿಂದೆ ವಿಎಸ್ ಆಸ್ಪತ್ರೆಯಲ್ಲಿ ಕೆಲಸ ಮಾಡುತ್ತಿದ್ದಾಗ ನನ್ನ ಸಹೋದ್ಯೋಗಿಗಳಾಗಿದ್ದ ದಲ್ಪತ್ ಪರ್ಮಾರ್ ಮತ್ತು ಕನು ಪರ್ವಾಮ್ ಎಂಬುವವರ ಜತೆ ಪ್ರೇಮ ಸಂಬಂಧದಲ್ಲಿದ್ದೆ. ಬಳಿಕ ಅವರಿಬ್ಬರಿಂದ ದೂರವಾಗಿ ಮಾತನಾಡುವುದನ್ನು ಕೂಡ ನಿಲ್ಲಿಸಿ ಆ ಆಸ್ಪತ್ರೆಯ ಕೆಲಸವನ್ನು ಸಹ ಬಿಟ್ಟಿದ್ದೆ. ಆದರೆ ಅವರಿಬ್ಬರು ನನ್ನ ಬೆನ್ನಿಗೆ ಬಿದ್ದು ಕಾಡುವುದನ್ನು ನಿಲ್ಲಿಸಲಿಲ್ಲ. ನಮ್ಮನ್ಯಾಕೆ ಪ್ರೀತಿಸಲ್ಲ, ಮತ್ತೆ ಪ್ರೀತಿಸು. ಇಲ್ಲದಿದ್ದರೆ ಸಾಯಿಸುತ್ತೇವೆ ಎಂದು ಬೆದರಿಕೆ ಒಡ್ಡಿದ್ದರು ಎಂದು ಪೊಲೀಸ್ ವಿಚಾರಣೆ ಸಂದರ್ಭದಲ್ಲಿ ಮಹಿಳೆ ಹೇಳಿದ್ದಾಳೆ.

ಗುರುವಾರ ಸಂಜೆ ಕೂಡ ಮಹಿಳೆಯನ್ನು ಭೇಟಿಯಾಗಿದ್ದ ಇಬ್ಬರು ಮಾಜಿ ಪ್ರಿಯಕರರು ಮತ್ತೆ ಜೀವಬೆದರಿಕೆ ಹಾಕಿದ್ದರು. ಅವರ ಕಾಟಕ್ಕೆ ರೋಸಿ ಹೋದ ಆಕೆ ವಿಷ ಸೇವಿಸಿದ್ದಾಳೆ. ವಿಷದ ಪ್ರಭಾವ ದೇಹವನ್ನು ವ್ಯಾಪಿಸುತ್ತಿದ್ದಂತೆ ತಾನು ವಿಷ ಸೇವಿಸಿರುವುದಾಗಿ ತನ್ನ ಮಗಳ ಬಳಿ ಹೇಳಿದ್ದಾಳೆ. ತಕ್ಷಣ ಆಕೆಯನ್ನು ಆಸ್ಪತ್ರೆಗೆ ದಾಖಲಿಸಿದ್ದರಿಂದ ಪ್ರಾಣಾಪಾಯದಿಂದ ಪಾರಾಗಿದ್ದಾಳೆ ಎಂದು ಪೊಲೀಸರು ತಿಳಿಸಿದ್ದಾರೆ.