25 ಮಹಿಳೆಯರಿಂದ 90 ಲಕ್ಷ ರೂ. ದೋಚಿದ ಕಳ್ಳಿ!

ನೋಯ್ಡಾ: ಕ್ಯಾನ್ಸರ್‌ ಚಿಕಿತ್ಸೆಗೆ ಹಣದ ಅವಶ್ಯಕತೆ ಇದೆ ಎಂದು ನೆರೆ ಮನೆಯವರನ್ನು ನಂಬಿಸಿ, ಮಹಿಳೆಯೊಬ್ಬಳು 90 ಲಕ್ಷ ರೂ. ದೋಚಿದ್ದಾಳೆ.

ಸುಮಾರು 25 ಮಹಿಳೆಯರಿಂದ ಹಣ ಪಡೆದುಕೊಂಡಿರುವ ಮಹಿಳೆ, ತನಗೆ ಸ್ತನ ಕ್ಯಾನ್ಸರ್‌ ಆಗಿದ್ದು, ಚಿಕಿತ್ಸೆಗೆ ಹಣ ಅಗತ್ಯವಿದೆ. ಹೀಗಾಗಿ ಹಣ ನೀಡುವಂತೆ ನೆರೆ ಮನೆಯವರಲ್ಲಿ ಕೇಳಿದ್ದಾಳೆ. ಕನಿಕರದಿಂದ ಸುಮಾರು 25 ಮಹಿಳೆಯರು ತಮ್ಮ ಮನೆಯವರಿಗೆ ತಿಳಿಯದಂತೆ ಹಣ ಹೊಂದಿಸಿಕೊಟ್ಟಿದ್ದಾರೆ. ಇದೀಗ ಮಹಿಳೆ ಸುಮಾರು 90 ಲಕ್ಷ ರೂ. ಹಣ ಪಡೆದು ಪರಾರಿಯಾಗಿದ್ದಾಳೆ.

ನೆರೆ ಮನೆಯವರು ಹಣ ವಾಪಾಸು ಕೇಳಲು ಆರಂಭಿಸಿದಂತೆಯೇ, ತನ್ನ ಮನೆಯನ್ನು ಜೂ.12ರಂದು ಗುಟ್ಟಾಗಿ ಮಾರಾಟ ಮಾಡಿದ ಮಹಿಳೆ, ಕುಟುಂಬ ಸಮೇತ ಪರಾರಿಯಾಗಿರುವುದು ತಿಳಿದು ಬಂದಿದೆ.

ಈ ಸಂಬಂಧ 25 ಮಂದಿಯಿಂದ ಜಂಟಿಯಾಗಿ ದೂರು ದಾಖಲಿಸಿಕೊಂಡಿರುವ ಪೊಲೀಸರು, ಕುಟುಂಬದ ವಿರುದ್ಧವೂ ಕೇಸು ದಾಖಲಿಸಿದ್ದಾರೆ. ಆರೋಪಿ ಪತ್ತೆಗೆ ಕಾರ್ಯಾಚರಣೆ ಕೈಗೊಂಡಿದ್ದಾರೆ.

ಮೂಲವರದಿ: ನವಭಾರತ್ ಟೈಮ್ಸ್‌