ಗಂಡ ಮೃತಪಟ್ಟಿದ್ದಾನೆಂದು ನಕಲಿ ದಾಖಲೆ ಸೃಷ್ಟಿಸಿ ಸಾಲ ಪಡೆದ ಪತ್ನಿ

ಆಗ್ರಾ: ಗಂಡ ಜೀವಂತ ಇದ್ದರೂ ಮೃತಪಟ್ಟಿದ್ದಾನೆ ಎಂದು ನಕಲಿ ಡೆತ್ ಸರ್ಟಿಫಿಕೇಟ್ ಸೃಷ್ಟಿಸಿ ಸಾಲ ಪಡೆದು ವಂಚಿಸಿರುವ ಆರೋಪದ ಮೇಲೆ ಆಗ್ರಾದ ಹರಿಪಾರ್ವತ್ ಪೊಲೀಸರು ಶ್ವೇತಾ (42) ಎಂಬುವವರನ್ನು ಬಂಧಿಸಿದ್ದಾರೆ.

ಗೃಹ ಸಾಲ ನೀಡಿದ ಬ್ಯಾಂಕ್ ಮನೆಯನ್ನು ಹರಾಜು ಹಾಕಲು ಬಂದಾಗ ಅಸಲಿ ಸಂಗತಿ ಬೆಳಕಿಗೆ ಬಂದಿದೆ. ಆಗ್ರಾದ ಬ್ರಿಜೇಷ್ ಗೌತಮ್ ಎಂಬುವವರು ಸೇನೆಯಲ್ಲಿ ಯೋಧನಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. 1993ರಲ್ಲಿ ಶ್ವೇತಾ ಮತ್ತು ಗೌತಮ್ ಮದುವೆಯಾಗಿದ್ದು ಇವರಿಗೆ ಇಬ್ಬರು ಮಕ್ಕಳು ಸಹ ಇದ್ದಾರೆ. ಸುಸೂತ್ರವಾಗಿ ಸಾಗುತ್ತಿದ್ದ ಸಂಸಾರದಲ್ಲಿ 2014ರಲ್ಲಿ ಜಗಳ ಶುರುವಾಯಿತು.

ಎಂ.ಎ ಪದವಿ ಪಡೆದಿರುವ ಶ್ವೇತಾ ತನ್ನನ್ನು ತಾನು ಪ್ರೊಫೆಸರ್ ಎಂದು ಹೇಳಿಕೊಳ್ಳುತ್ತಿದ್ದರು. ಐಶಾರಾಮಿ ಜೀವನ ನಡೆಸುತ್ತಿದ್ದ ಶ್ವೇತಾ ಇದಕ್ಕಾಗಿ ಅತ್ತೆಯ ಮನೆಯನ್ನೇ ಅಡವಾಗಿಟ್ಟು ಸಾಲ ಪಡೆದಿದ್ದಾರೆ.

2015ರಲ್ಲಿ ಶ್ವೇತಾ ವಿಚ್ಛೇದನಕ್ಕೆ ಅರ್ಜಿ ಸಲ್ಲಿಸಿದ್ದು ಅದೇ ವರ್ಷ ತನ್ನ ಗಂಡ ಮೃತಪಟ್ಟಿದ್ದಾನೆಂದು ನಕಲಿ ದಾಖಲೆ ಸೃಷ್ಟಿಸಿ ಗೃಹಸಾಲ ಪಡೆದಿದ್ದರು. ತನ್ನ ಅತ್ತೆ ಹೆಸರಿನಲ್ಲಿದ್ದ ಮನೆಯ ಪತ್ರಗಳನ್ನು ಕದ್ದು ಸಾಲಕ್ಕೆ ಅಡವಿಟ್ಟಿದ್ದರು. ಮಕ್ಕಳೊಂದಿಗೆ ದೂರ ಹೋಗಿ ಸಂಸಾರ ಸಾಗಿಸುತ್ತಿದ್ದರು. ಏತನ್ಮಧ್ಯೆ ಗಂಡ ಸೇನೆಯಿಂದ ನಿವೃತ್ತರಾಗಿದ್ದರು.

ಇತ್ತೀಚೆಗೆ ಬ್ರಿಜೇಷ್ ಗೌತಮ್ ಇರುವ ಮನೆಯನ್ನು ಹರಾಜು ಹಾಕಲು ಡಿಎಚ್ಎಫ್ಎಲ್‍ನಿಂದ ಸಿಬ್ಬಂದಿ ಬಂದರು. ಮನೆ ಮೇಲೆ ಸಾಲ ಮಾಡಿದ್ದೀರೆಂದು, ಅದು ಕಟ್ಟಿಲ್ಲ ಎಂದು ತಿಳಿಸಿದ ಬಳಿಕ ಮನೆಯವರು ಶಾಕ್ ಆಗಿದ್ದಾರೆ. ವಿಚಾರಣೆ ನಡೆಸಿದಾಗ ಶ್ವೇತಾ ಬಂಡವಾಳ ಬಯಲಾಗಿದೆ ಎಂದು ಪೊಲೀಸರು ವಿವರ ನೀಡಿದ್ದಾರೆ.

ಶ್ವೇತಾ ತನ್ನ ಪತಿ ಮೃತಪಟ್ಟಿದ್ದಾನೆಂದು ಡೆತ್ ಸರ್ಟಿಫಿಕೇಟ್ ತೆಗೆದುಕೊಂಡಿದ್ದರು. ಅದಕ್ಕೆ ಮನೆ ಪತ್ರಗಳನ್ನು ಜೋಡಿಸಿ ಡಿಎಚ್ಎಫ್ಎಲ್‌ನಲ್ಲಿ 25.65 ಲಕ್ಷ ರೂ. ಸಾಲ ಮಾಡಿದ್ದರು. ಆ ಹಣದಲ್ಲಿ ನೋಯಿಡಾದಲ್ಲಿ ರಾಜು, ಜೈನ್ ಎಂಬುವವರೊಂದಿಗೆ ಸೇರಿ ಸ್ವೀಟ್ ಶಾಪ್ ಓಪನ್ ಮಾಡಿದ್ದರು. ಬ್ರಿಜೇಷ್ ತಾಯಿ ದೂರು ನೀಡಿದ ಬಳಿಕ ಪ್ರಕರಣ ದಾಖಲಿಸಿಕೊಂಡ ಪೊಲೀಸರು ಆರೋಪಿ ಶ್ವೇತಾರನ್ನು ಬಂಧಿಸಿದ್ದಾರೆ.