ಹಿಜಾಬ್‌ ತೆಗೆಯಲೊಪ್ಪದ ಯುವತಿಗೆ ನೆಟ್‌ ಎಕ್ಸಾಮ್‌ ಕಟ್‌

ಪಣಜಿ: ಶಿರವಸ್ತ್ರ ತೆಗೆಯಲು ನಿರಾಕರಿಸಿದ ಕಾರಣಕ್ಕೆ ರಾಷ್ಟ್ರೀಯ ಅರ್ಹತಾ ಪರೀಕ್ಷೆ (ನೆಟ್‌) ಬರೆಯಲು ಅವಕಾಶ ನಿರಾಕರಿಸಿದ ಘಟನೆ ಪಣಜಿಯಲ್ಲಿ ನಡೆದಿರುವುದು ವರದಿಯಾಗಿದೆ.

24 ವರ್ಷದ ಸಫೀನಾ ಖಾನ್‌ ಸೌದಾಗರ್‌ ಎಂಬವರು ಸಕಾಲದಲ್ಲಿ ಪರೀಕ್ಷಾ ಕೇಂದ್ರಕ್ಕೆ ತಲುಪಿದ್ದರು. ಅಲ್ಲಿದ್ದ ಮೇಲ್ವಿಚಾರಕರು ಶಿರವಸ್ತ್ರ (ಹಿಜಾಬ್‌) ತೆಗೆಯುವಂತೆ ಸೂಚಿಸಿದರು. ಆದರೆ, ಆಕೆ ನಿರಾಕರಿಸಿದರು. ಆಗ ಅಧಿಕಾರಿಗಳು ಆಕೆಗೆ ಪರೀಕ್ಷೆ ಬರೆಯಲು ಅವಕಾಶ ನೀಡಲಿಲ್ಲ. ಭದ್ರತೆ ಮತ್ತು ಮೋಸ ಮಾಡುವ ಸಾಧ್ಯತೆಗಳ ಹಿನ್ನೆಲೆಯಲ್ಲಿ ಪರೀಕ್ಷಾ ಕೇಂದ್ರಕ್ಕೆ ಹಿಜಾಬ್‌ ಮತ್ತು ಇತರ ಕೆಲವು ಪರಿಕರಗಳನ್ನು ನಿರಾಕರಿಸಲಾಗಿದೆ ಎಂದು ಅಧಿಕಾರಿಗಳು ಸ್ಪಷ್ಟೀಕರಣ ನೀಡಿದ್ದಾರೆ.

''ಭದ್ರತಾ ತಪಾಸಣೆ ವೇಳೆ ಹಿಜಾಬ್‌ ತೆಗೆಯಲು ಹೇಳಿದರು. ಆದರೆ, ಧಾರ್ಮಿಕ ನಂಬಿಕೆಯ ಸಂಕೇತವನ್ನು ತೆಗೆಯಲು ಒಪ್ಪಲಿಲ್ಲ. ಫೋಟೋದಲ್ಲಿರುವ ವ್ಯಕ್ತಿ ನಾನೇ ಎಂದು ದೃಢಪಡಿಲು ಕಿವಿ ತೋರಿಸುವಂತೆ ಹೇಳಿದರು. ನಾನು ಒಪ್ಪಿದೆ. ಆದರೆ, ಸಾರ್ವಜನಿಕ ಸ್ಥಳದಲ್ಲಿ ಹಿಜಾಬ್‌ ಸರಿಸುವುದು ತಪ್ಪು ಎಂಬ ಕಾರಣಕ್ಕೆ ವಾಷ್‌ ರೂಮ್‌ಗೆ ಹೋಗೋಣ ಎಂದೆ. ಅದಕ್ಕೆ ಅವರು ಒಪ್ಪಲಿಲ್ಲ. ಅಂತಿಮವಾಗಿ ನಿಮಗೆ ಪರೀಕ್ಷೆ ಬೇಕಾ, ಹಿಜಾಬ್‌ ಬೇಕಾ ಎಂದು ಕೇಳಿದರು. ನಾನು ಹಿಜಾಬ್‌ ಆಯ್ಕೆ ಮಾಡಿಕೊಂಡೆ,'' ಎಂದು ಶಫೀನಾ ವಿವರಿಸಿದ್ದು, ಹಿಜಾಬ್‌ ಧರಿಸಬಾರದು ಎಂಬ ನಿಯಮವಿಲ್ಲ ಎಂದು ಪ್ರತಿಪಾದಿಸಿದ್ದಾರೆ. ಆದರೆ, ಹಿಜಾಬ್‌ ಅಷ್ಟೇ ಅಲ್ಲ ಮಂಗಲಸೂತ್ರವನ್ನೂ ಧರಿಸಬಾರದು ಎಂಬ ಸೂಚನೆ ಇದೆ ಎನ್ನುತ್ತಾರೆ ಅಧಿಕಾರಿಗಳು.