ತಾಯಿಯ ಸಹಾಯದಿಂದ ಮಾವನ ಜೀವಂತ ದಹನ ಮಾಡಿದ ಸೊಸೆ

ಚೆನ್ನೈ: ಮಹಿಳೆಯೊಬ್ಬಳು ತನ್ನ ತಾಯಿಯ ಸಹಾಯದಿಂದ ಗಂಡನ ತಂದೆಗೆ ಬೆಂಕಿ ಹಚ್ಚಿ ಜೀವಂತವಾಗಿ ಸುಟ್ಟು ಹಾಕಿದ ಘಟನೆ ತಮಿಳುನಾಡಿನಲ್ಲಿ ನಡೆದಿದೆ.

ತಿರುವಲನಂಗಾಡಿನಲ್ಲಿ ಈ ಕೃತ್ಯ ನಡೆದಿದ್ದು ಮೃತರನ್ನು ಸಬಾಪತಿ (65) ಎಂದು ಗುರುತಿಸಲಾಗಿದೆ.

ಸಬಾಪತಿ ಪುತ್ರ ಪ್ರಭಾಕರನ್ ಕಳೆದ 6 ವರ್ಷಗಳ ಹಿಂದೆ ಗಾಯತ್ರಿ ಎಂಬಾಕೆಯನ್ನು ವಿವಾಹವಾಗಿದ್ದ. ದಂಪತಿಗೆ ಒಬ್ಬ ಮಗನಿದ್ದಾನೆ. ಮೊದ ಮೊದಲು ಎಲ್ಲವೂ ಚೆನ್ನಾಗಿತ್ತು. ಆದರೆ ಕೆಲ ದಿನಗಳ ಬಳಿಕ ದಂಪತಿ ನಡುವೆ ವೈಮನಸ್ಸುಂಟಾಗಿ ಬೇರೆಯಾಗಿದ್ದರು.

ಏಪ್ರಿಲ್ 11ರಂದು ಪ್ರಭಾಕರನ್ ಇನ್ನೊಬ್ಬ ಮಹಿಳೆಯನ್ನು ಮದುವೆಯಾದರು. ಇದನ್ನು ಕೇಳಿದ ಗಾಯತ್ರಿ ಕೋಪ ನೆತ್ತಿಗೇರಿ ತಾಯಿ ಕಲಾವತಿ(57)ಯೊಂದಿಗೆ ಪತಿಯ ಮನೆಗೆ ಬಂದಿದ್ದಾಳೆ.

ಆ ಸಂದರ್ಭದಲ್ಲಿ ಸಬಾಪತಿಯೊಬ್ಬರೆ ಮನೆಯಲ್ಲಿದ್ದರು. ಆತನೊಂದಿಗೆ ಜಗಳಕ್ಕಿಳಿದ ತಾಯಿ- ಮಗಳು ಮೈಮೇಲೆ ಸೀಮೆಎಣ್ಣೆ ಸುರಿದು ಬೆಂಕಿ ಹಚ್ಚಿದ್ದಾರೆ. ಬಳಿಕ ಅಲ್ಲಿಂದ ಪರಾರಿಯಾಗಿದ್ದಾರೆ.

ಕಿರುಚಾಟ ಕೇಳಿ ಓಡಿ ಬಂದ ನೆರೆಹೊರೆಯವರು ಆತನನ್ನು ಆಸ್ಪತ್ರೆಗೆ ಸೇರಿಸಿದರಾದರೂ ಪ್ರಯೋಜನವಾಗಲಿಲ್ಲ.

ಆರೋಪಿಗಳನ್ನು ಬಂಧಿಸಿರುವ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.