ಹೊಸದಿಲ್ಲಿ: ನೋಟು ನಿಷೇಧ ಸೃಷ್ಟಿಸಿದ ಅವಾಂತರಗಳು ಒಂದೆರಡಲ್ಲ. ಸಂಸತ್ತಿನಿಂದ ಅಣತಿ ದೂರದಲ್ಲಿರುವ ಆರ್ಬಿಐ ಗೇಟ್ ಮುಂದೆ ಮಂಗಳವಾರ ನಡೆದ ವಿಚಿತ್ರ ಘಟನೆ ಇದಕ್ಕೆ ಹೊಸ ಸೇರ್ಪಡೆ. ಹಳೆಯ 500/1000 ರೂ. ನೋಟುಗಳ ವಿನಿಯಮಕ್ಕೆಂದು ದಿಲ್ಲಿಯ ಆರ್ಬಿಐ ಪ್ರಾದೇಶಿಕ ಕಚೇರಿಗೆ ಬಂದಿದ್ದ ವಿವಾಹಿತ ಮಹಿಳೆಗೆ ಭದ್ರತಾ ಸಿಬ್ಬಂದಿ ಒಳ ಪ್ರವೇಶಿಸಲು ಅನುಮತಿ ನಿರಾಕರಿಸಿದರು. ಅವಳು ಎಷ್ಟೇ ಪರಿಪರಿಯಾಗಿ ವಿನಂತಿಸಿಕೊಂಡರೂ ಸಿಬ್ಬಂದಿ ಅವಕಾಶ ನೀಡಲಿಲ್ಲ.
ಅಷ್ಟು ದೂರದಿಂದ ಬಂದರೂ ಪ್ರಯೋಜನವಾಗಲಿಲ್ಲವಲ್ಲ ಎಂದು ಅಳುತ್ತಾ ಬೇಸರದಲ್ಲಿ ಮಗುವಿನೊಂದಿಗೆ ಕಚೇರಿಯ ಗೇಟ್ ಮುಂದೆ ಪ್ರತಿಭಟನೆಗೆ ಕುಳಿತಳು. ಆಗ ಭದ್ರತಾ ಸಿಬ್ಬಂದಿ ಅಲ್ಲಿಗೆ ಧಾವಿಸಿ ಬಂದು ಮಹಿಳೆಯನ್ನು ಬಲವಂತದಿಂದ ಎತ್ತಂಗಡಿ ಮಾಡಿಸಲು ಮುಂದಾದಾಗ, ಆಕೆ ಸಾರ್ವಜನಿಕರ ಮುಂದೆ 'ಮೇಲುಡುಪು' ಕಳಚಿ ಪ್ರತಿಭಟನೆಯಿಂದ ಹಿಂದೆ ಸರಿಯುವ ಪ್ರಶ್ನೆಯೇ ಇಲ್ಲ ಎಂದು ಧಮಕಿ ಹಾಕಿದಳು. ಮಹಿಳೆಯ ವರ್ತನೆಗೆ ಕಕ್ಕಾಬಿಕ್ಕಿಯಾದ ಆರ್ಬಿಐ ಭದ್ರತಾ ಸಿಬ್ಬಂದಿ ದಾರಿ ಕಾಣದೇ ಪೊಲೀಸರಿಗೆ ಕರೆ ವಿಷಯ ಮುಟ್ಟಿಸಿದರು. ಪೊಲೀಸರು ಮಹಿಳೆಯನ್ನು ಸಮಧಾನಪಡಿಸಿ ಆಕೆಯನ್ನು ಠಾಣೆಗೆ ಕರೆದೊಯ್ಯುತ್ತಿದ್ದಂತೆ ಪ್ರಕರಣ ಸುಖಾಂತ್ಯ ಕಂಡಿತು.