ಎಸ್‌ಸಿಒ ಸಭೆಯಲ್ಲಿ ಕೇಂದ್ರ ಸಚಿವೆಯರು, ಶಹಬ್ಬಾಸ್ ಎಂದ ನೆಟ್ಟಿಗರು

ಹೊಸದಿಲ್ಲಿ: ಮಹಿಳೆಯರಿಗೆ ರಾಜಕೀಯದಲ್ಲಿ ಪ್ರಾಧಾನ್ಯತೆ ನೀಡಲಾಗುತ್ತಿದೆಯಾದರೂ, ಹೇಳಿಕೊಳ್ಳುವ ಪ್ರಮಾಣದಲ್ಲಿಲ್ಲ. ಆದರೆ ಇಬ್ಬರು ಕೇಂದ್ರ
ಸಚಿವೆಯರು ಮಾತ್ರ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಸುದ್ದಿಯಾಗಿದ್ದು, ಸಾಮಾಜಿಕ ತಾಣಗಳಲ್ಲೂ ಅವರ ಫೋಟೋಗಳು ಸಂಚಲನ ಸೃಷ್ಟಿಸಿವೆ.

ಇತ್ತೀಚೆಗೆ ಚೀನಾದ ಬೀಜಿಂಗ್‌ನಲ್ಲಿ ನಡೆದಿದ್ದ ಎಸ್‌ಸಿಒ ವಿದೇಶಾಂಗ ಮತ್ತು ರಕ್ಷಣಾ ಸಚಿವರ ಸಭೆಯಲ್ಲಿ ವಿದೇಶಾಂಗ ವ್ಯವಹಾರಗಳ ಸಚಿವೆ ಸುಷ್ಮಾ ಸ್ವರಾಜ್ ಮತ್ತು ರಕ್ಷಣಾ ಸಚಿವೆ ನಿರ್ಮಲಾ ಸೀತಾರಾಮನ್‌ ಭಾಗವಹಿಸಿದ್ದು, ಅವರಿಬ್ಬರನ್ನು ಹೊರತುಪಡಿಸಿದರೆ ಉಳಿದವರೆಲ್ಲರೂ ಅಲ್ಲಿ ಪುರುಷರೇ ಇದ್ದಿದ್ದು ಗಮನಾರ್ಹ.

ಶಾಂಘೈ ಸಹಕಾರ ಒಕ್ಕೂಟ (ಎಸ್‌ಸಿಒ)ದ ಸದಸ್ಯ ರಾಷ್ಟ್ರಗಳ ವಿದೇಶಾಂಗ ಮತ್ತು ರಕ್ಷಣಾ ಸಚಿವರ ಪೈಕಿ ದೇಶದ ಇಬ್ಬರು ಸಚಿವೆಯರನ್ನು ಹೊರತುಪಡಿಸಿದರೆ, ಅವರ ಸಮಕಾಲೀನರು ಪುರುಷರೇ ಆಗಿದ್ದಾರೆ. ಎಸ್‌ಸಿಒ ಸದಸ್ಯ ರಾ‍ಷ್ಟ್ರಗಳ ವಿದೇಶಾಂಗ ಸಚಿವರ ಸಭೆಯಲ್ಲಿ ಸುಷ್ಮಾ ಸ್ವರಾಜ್ ಭಾಗವಹಿಸಿದ್ದರೆ, ರಕ್ಷಣಾ ಸಚಿವರ ಸಭೆಯಲ್ಲಿ ನಿರ್ಮಲಾ ಸೀತಾರಾಮನ್ ಭಾಗವಹಿಸಿರುವ ಫೋಟೋಗಳು ಇಂಟರ್‌ನೆಟ್‌ನಲ್ಲಿ ವೈರಲ್ ಆಗಿ ಪ್ರಶಂಸೆ ಪಡೆದುಕೊಂಡಿವೆ.

ರೈಲ್ವೆ ಸಚಿವ ಪೀಯೂಷ್ ಗೋಯಲ್ ಕೂಡ ಎಸ್‌ಸಿಒ ಸಭೆಯ ಫೋಟೋಗಳನ್ನು ಟ್ವಿಟರ್‌ನಲ್ಲಿ ಶೇರ್‌ ಮಾಡಿಕೊಂಡಿದ್ದು, ಎಲ್ಲಿ ಮಹಿಳೆಯರನ್ನು ಗೌರವಿಸಲಾಗುತ್ತದೆಯೋ, ಅಲ್ಲಿ ಪೂಜ್ಯತೆ ತುಂಬಿರುತ್ತದೆ ಎಂದಿದ್ದಾರೆ.