ಕೇರಳದಲ್ಲಿ ನಶೆ ಏರಿಸಲಿದ್ದಾರೆ ಮಾನಿನಿಯರು

ತಿರುವನಂತಪುರ: ಗುಂಡಿನ ನಶೆಗೆ ಕೇರಳದ ಮಾನಿನಿಯರು ಮತ್ತಷ್ಟು ಕಿಕ್ಕೇರಿಸಲಿದ್ದಾರೆ.

ಕೇರಳ ಸರಕಾರದ ಅಬಕಾರಿ ಇಲಾಖೆ ಕೇರಳ ಮದ್ಯದ ಅಂಗಡಿ ವಿತರಣೆ ನಿಯಮ 2002 ಹಾಗೂ ವಿದೇಶಿ ಮದ್ಯ ನಿಯಮ 1953 ಕಾಯಿದೆಯನ್ನು ತಿದ್ದುಪಡಿ ಮಾಡಲಿದ್ದು, ಇದರ ಅನ್ವಯ ಮಹಿಳೆಯರು ಬಾರ್‌ ಹೋಟೆಲುಗಳು, ಬೀರ್‌ ಮತ್ತು ವೈನ್‌ ಪಾರ್ಲರ್‌ಗಳಲ್ಲಿ ಉದ್ಯೋಗ ಮಾಡಲು ಅನುಮತಿ ನೀಡಲಿದೆ.

ವಿದೇಶಿ ಮದ್ಯ ನಿಯಮ 9ಎ, 16, 20, 27ಎ, 36 ಮತ್ತು ಕೇರಳ ಅಬಕಾರಿ ವಿತರಣ ನಿಯಮ 37ರ ಪ್ರಕಾರ ಮಹಿಳೆಯರು ಮದ್ಯದ ಅಂಗಡಿಗಳಲ್ಲಿ ದುಡಿಯಲು ಅನುಮತಿಯಿರಲಿಲ್ಲ. ಇದೀಗ ಕೇರಳ ಅಬಕಾರಿ ಇಲಾಖೆ ಈ ನಿಯಮವನ್ನು ಬದಲಿಸಲು ಮುಂದಾಗಿದ್ದು, ಈ ಹಿಂದೆ ಹೈಕೋರ್ಟ್ ಕೂಡ ಮಹಿಳೆಯರ ಪರವಾಗಿ ಆದೇಶವನ್ನು ಹೊರಡಿಸಿತ್ತು.

2016ರ ಸನುಜಾ ಬಿ V/S ಕೇರಳ ರಾಜ್ಯ ಅಬಕಾರಿ ಇಲಾಖೆ ಪ್ರಕರಣದಲ್ಲಿ ಬಿವರೇಜ್ ಕಾರ್ಪೋರೇಷನ್‌ನಲ್ಲಿ ಈ ಹಿಂದೆ ಸಹಾಯಕರ ಕೆಲಸಕ್ಕೆ ಅರ್ಜಿ ನಿರಾಕರಿಸಿದ ಆರು ಮಹಿಳೆಯರನ್ನು ನೇಮಕ ಮಾಡುವಂತೆ ನ್ಯಾಯಮೂರ್ತಿ ಅನು ಶಿವರಾಮನ್‌ ಸೂಚಿಸಿದ್ದರು.