ರಾಣಿ ಹುಹ್‌ ಸ್ಮಾರಕದ ಉನ್ನತೀಕರಣ ಕಾಮಗಾರಿ 2 ವರ್ಷದಲ್ಲಿ ಪೂರ್ಣ

ಹೊಸದಿಲ್ಲಿ: ಅಯೋಧ್ಯೆಯ ರಾಜಕುಮಾರಿಯಾಗಿ ಮುಂದೆ ಕೊರಿಯನ್ನರ ಜನಪ್ರಿಯ ರಾಣಿಯಾದ ಹುಹ್‌ ಸ್ಮರಣಾರ್ಥ ಅಯೋಧ್ಯೆಯಲ್ಲಿರುವ ಸ್ಮಾರಕದ ಉನ್ನತೀಕರಣ ಯೋಜನೆ ಇನ್ನೆರೆಡು ವರ್ಷದಲ್ಲಿ ಪೂರ್ಣಗೊಳ್ಳಲಿದೆ ಎಂದು ಉತ್ತರ ಕೊರಿಯಾದ ರಾಯಭಾರ ಕಚೇರಿ ತಿಳಿಸಿದೆ. ಸರಯೂ ನದಿ ತಟದಲ್ಲಿರುವ 'ಕೊರಿಯಾ ಪಾರ್ಕ್‌'ನಲ್ಲಿ ಪುಟ್ಟ ಸ್ಮಾರಕವಿದೆ. ಇದರ ಸೌಂದರ್ಯ ಹೆಚ್ಚಿಸುವ ನಿಟ್ಟಿನಲ್ಲಿ 25 ಕೋಟಿ ರೂ. ಮೊತ್ತದ ಉನ್ನತೀಕರಣ ಯೋಜನೆಗೆ ನವೆಂಬರ್‌ನಲ್ಲಿಯೇ ಚಾಲನೆ ನೀಡಲಾಗಿದೆ.

ದೇವತೆಯ ಆದೇಶದಂತೆ ಅಯೋಧ್ಯೆ ರಾಜಕುಮಾರಿ ಸುರಿರತ್ನ ಕ್ರಿಸ್ತಶಕ 48ರಲ್ಲಿ ಕೊರಿಯಾಗೆ ತೆರಳಿ ಅಲ್ಲಿನ ಅರಸ ಸುರೋವನ್ನು ಮದುವೆಯಾಗಿ ಮುಂದೆ ರಾಣಿ ಹುಹ್‌ ಹ್ವಾಂಗ್‌ ಒಕೆ ಎಂದೇ ಜನಪ್ರಿಯಳಾದಳು ಎನ್ನುತ್ತದೆ ಪ್ರಾಚೀನ ಇತಿಹಾಸ. ಹೀಗೆ ಅಯೋಧ್ಯೆ ಮತ್ತು ಕೊರಿಯಾ ನಡುವೆ ಬಾಂಧವ್ಯ ಬೆಸೆಯಲು ಕಾರಣವಾದ ರಾಣಿ ಹುಹ್‌ನ ಸ್ಮರಣಾರ್ಥ ಅಯೋಧ್ಯೆಯ ಸರಯೂ ನದಿ ತಟದಲ್ಲಿ ಸ್ಮಾರಕವಿದೆ. ಪ್ರತಿ ಏಪ್ರಿಲ್‌ನಲ್ಲಿ ಕೊರಿಯನ್ನರು ಇಲ್ಲಿಗೆ ಭೇಟಿಕೊಟ್ಟು ಗೌರವ ಸಲ್ಲಿಸುವುದು ವಾಡಿಕೆ. ಕಳೆದ ನವೆಂಬರ್‌ನÜಲ್ಲಿ ಅಯೋಧ್ಯೆಯಲ್ಲಿ ನಡೆದ ದೀಪೋತ್ಸವ ಕಾರ‍್ಯಕ್ರಮದಲ್ಲಿ ಪಾಲ್ಗೊಂಡಿದ್ದ ದಕ್ಷಿಣ ಕೊರಿಯಾದ ಮೊದಲ ಮಹಿಳೆ ಕಿಮ್‌ ಜುಂಗ್‌ ಸೂಕ್‌ ಅವರು ಸ್ಮಾರಕದ ಉನ್ನತೀಕರಣ ಯೋಜನೆಗೆ ಶಂಕುಸ್ಥಾಪನೆ ನೆರವೇರಿಸಿದ್ದರು. ಜುಲೈನಲ್ಲಿಯೇ ಭಾರತ- ದಕ್ಷಿಣ ಕೊರಿಯಾ ಈ ಯೋಜನೆ ಸಂಬಂಧ ಒಡಂಬಡಿಕೆಗೆ ಸಹಿ ಹಾಕಿವೆ.