ಜಮ್ಮು ಕಾಶ್ಮೀರ: ಐಫೆಲ್ ಟವರ್‌ಗಿಂತಲೂ ಎತ್ತರದ ರೈಲು ಸೇತುವೆ ನಿರ್ಮಾಣ

ಹೊಸದಿಲ್ಲಿ: ಜಮ್ಮು ಕಾಶ್ಮೀರದ ಚೆನಾಬ್ ನದಿಗೆ ಅಡ್ಡಲಾಗಿ ಇನ್ನು ಎರಡು ವರ್ಷಗಳಿಗೆ ರೈಲು ಸೇತುವೆಯೊಂದು ನಿರ್ಮಾಣವಾಗಲಿದ್ದು, ಇದು ಐಫೆಲ್ ಟವರ್‌ಗಿಂತಲೂ 35 ಮೀ.ಉದ್ದವಿರಲಿದ್ದು, ವಿಶ್ವದಲ್ಲಿಯೇ ಅತೀ ಎತ್ತರದ ರೈಲು ಸೇತುವೆ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಲಿದೆ.

ಕಮಾನು ಆಕೃತಿಯ ಈ ಸೇತುವೆ ನಿರ್ಮಾಣಕ್ಕೆ 1,100 ಕೋಟಿ ವೆಚ್ಚ ತಗುಲಿದ್ದು, 24 ಸಾವಿರ ಟನ್ ಕಬ್ಬಿಣ ಬಳಸಲಾಗುತ್ತಿದೆ. ನದಿ ಮಟ್ಟದಿಂದ 359 ಮೀ. ಎತ್ತರದಲ್ಲಿ ಸೇತುವೆ ತಲೆ ಎತ್ತಲಿದೆ.

ಗಂಟೆಗೆ 260 ಮೀ. ಪವನ ವೇಗವನ್ನು ಗಮನದಲ್ಲಿಟ್ಟುಕೊಂಡು 1.315 ಕಿ.ಮೀ. ಉದ್ದದ ಈ ಸೇತುವೆ ನಕ್ಷೆ ತಯಾರಿಸಲಾಗಿದೆ. ಬಕ್ಕಲ್ (ಕಾತ್ರಾ) ಮತ್ತು ಕೌರಿ (ಶ್ರೀನಗರ)ಗೆ ಈ ಅದ್ಭುತ ಸೇತುವೆ ಸಂಪರ್ಕ ಕಲ್ಪಿಸಲಿದೆ.

ಈ ಸೇತುವೆ 111 ಕಿ.ಮೀ ಉದ್ದದ ಉದಮ್-ಶ್ರೀನಗರ-ಬಾರಾಮುಲ್ಲಾ ರೈಲು ಮಾರ್ಗದ ಭಾಗವಾಗಲಿದ್ದು, 2019ರ ವೇಳೆಗೆ ಯೋಜನೆ ಪೂರ್ಣಗೊಳ್ಳಲಿದೆ.



ರೋಪ್‌ವೇ ಮೂಲಕ ಸೇತವೆ ವೀಕ್ಷಿಸುವ ವ್ಯವಸ್ಥೆ ಕಲ್ಪಿಸಲಿದ್ದು, ಪ್ರವಾಸಿಗರನ್ನೂ ಆಕರ್ಷಿಸುವ ವ್ಯವಸ್ಥೆ ಮಾಡಲಾಗುತ್ತದೆ.