ಮೋದಿ ಅಂದ್ರೆ ಚೀನಾಗೆ ಭಯ: ಅಮೆರಿಕ ತಜ್ಞರು

ವಾಷಿಂಗ್ಟನ್: ಭಾರತದ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಅವರು ದೇಶದ ಹಿತಕ್ಕಾಗಿ ಯಾವುದೇ ಕಠಿಣ ನಿರ್ಧಾರ ತೆಗೆದುಕೊಳ್ಳಬಲ್ಲರು ಎಂಬ ಭಯ ನೆರೆಯ ರಾಷ್ಟ್ರ ಚೀನಾ ಅಧ್ಯಕ್ಷ ಕ್ಸಿನ್ ಜಿನ್ ಪಿಂಗ್‌ ಅವರಿಗಿದೆ ಎಂದು ಅಮೆರಿಕ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಅಮೆರಿಕಾ, ಜಪಾನ್‌ಗಳಂತಹ ಮುಂದುವರೆದ ರಾಷ್ಟ್ರಗಳ ಜತೆ ಕೈ ಜೋಡಿಸುತ್ತಿರುವ ಭಾರತ ಮುಂದಿನ ದಿನಗಳಲ್ಲಿ ನೆರೆಯ ರಾಷ್ಟ್ರಗಳಿಗೆ ಸೆಡ್ಡು ಹೊಡೆದು ನಿಲ್ಲಬಹುದು ಎಂಬ ಆತಂಕ ಚೀನಾಗಿದೆ ಎಂದು ವಾಷಿಂಗ್ಟನ್ ಡಿಸಿ ಮೂಲದ ಚೀನಾದ ಪವರ್ ಪ್ರಾಜೆಕ್ಟ್ ಹಿರಿಯ ಸಲಹೆಗಾರರಾದ ಗ್ಲೇಸರ್ ಅಭಿಪ್ರಾಯಪಟ್ಟಿದ್ದಾರೆ.

ಈಗಾಗಲೇ ಚೀನಾ ಅಧ್ಯಕ್ಷ ಜಿನ್ ಪಿಂಗ್ ಭಾರತಕ್ಕೆ ತೆರಳಿ ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಭೇಟಿಯಾಗಲು ಪ್ರಯತ್ನಿಸಿದ್ದರು. ಮೋದಿ ದೇಶದ ಹಿತಕ್ಕಾಗಿ ಯಾವ ಹಂತಕ್ಕೂ ಹೋಗಬಹುದಾದ ಸಮರ್ಥ ನಾಯಕ ಎಂದು ಚೀನಾ ಅಧ್ಯಕ್ಷರು ಅರಿತಿದ್ದಾರೆ. ಇದಕ್ಕೆ ಚೀನಾದ ಅಭಿವೃದ್ಧಿಗೆ ವಿರೋಧವಾಗಿ ಭಾರತ ಅನುಸರಿಸುತ್ತಿರುವ ವಿದೇಶಾಂಗ ನೀತಿ ಹಾಗೂ ಕಠಿಣ ಕ್ರಮಗಳೇ ಸಾಕ್ಷಿ ಎಂದು ವಿವರಿಸಿದರು.

ಭಾರತ ಹಾಗೂ ಚೀನಾ ದೇಶಗಳ ನಡುವೆ ಸಾಕಷ್ಟು ವ್ಯತ್ಯಾಸಗಳಿವೆ. ಭಾರತದ ಜತೆ ಉದ್ವಿಗ್ನ ಸ್ಥಿತಿ ತಂದುಕೊಳ್ಳವುದರಿಂದ ಚೀನಾ ದೇಶಕ್ಕೆ ಯಾವುದೇ ಲಾಭ ಇಲ್ಲ. ಉಭಯ ರಾಷ್ಟ್ರಗಳು ಶಾಂತಿಯುತವಾಗಿಯೇ ದೀರ್ಘ ಗಡಿಯನ್ನು ಹಂಚಿಕೊಳ್ಳಲಿದೆ ಎಂದು ಡೋಕ್ಲಾಮ್ ಬೆಳವಣಿಗೆಯ ಬಗ್ಗೆ ನಿಕಟ ವೀಕ್ಷಣೆ ನಡೆಸುತ್ತಿರುವ ಗ್ಲೇಸರ್ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.