* ಚಿಕ್ಕ ವಯಸ್ಸಿನಲ್ಲೇ ಜಾಣತನದ ಖನಿಜ ಈ ಅನನ್ಯ
* ಇಡೀ ಮನೆಯಲ್ಲಿದ್ದಾರೆ ಪುಟಾಣಿ ಪ್ರಚಂಡರು
ಲಖನೌ: ನಾಲ್ಕು ವರ್ಷ 8 ತಿಂಗಳ ಮಗು ಎಲ್ಕೆಜಿ ಇಲ್ಲವೇ ಯುಕೆಜಿಯಲ್ಲಿ ಓದುವುದು ಸಹಜ. ಈ ವಯಸ್ಸಿನ ಮಕ್ಕಳನ್ನು ಒಂದನೇ ಕ್ಲಾಸ್ಗೆ ಸೇರ್ಪಡೆ ಮಾಡಲು ಅವಕಾಶವಿಲ್ಲ.
ಆದರೆ, ಉತ್ತರಪ್ರದೇಶದ ನಾಲ್ಕು ವರ್ಷ 8 ತಿಂಗಳು 21 ದಿನದ ಬಾಲಕಿ 9ನೇ ತರಗತಿಗೆ ಪ್ರವೇಶ ಪಡೆದು ಎಲ್ಲರ ಹುಬ್ಬೇರುವಂತೆ ಮಾಡಿದ್ದಾಳೆ.
ಅನನ್ಯ ವರ್ಮಾ 9 ನೇ ತರಗತಿಗೆ ಪ್ರವೇಶ ಪಡೆದ ಬಾಲಕಿ. ಈ ಮೂಲಕ ಅತಿ ಚಿಕ್ಕ ವಯಸ್ಸಿನಲ್ಲಿ ಲಖನೌದ ಸೇಂಟ್ ಮೀರಾ ಇಂಟರ್ ಕಾಲೇಜಿನ 9 ನೇ ತರಗತಿಗೆ ಪ್ರವೇಶ ಪಡೆದ ಹೆಗ್ಗಳಿಕೆ ಪಡೆದಿದ್ದಾಳೆ. ಇದಕ್ಕೆ ಶಿಕ್ಷಣ ಇಲಾಖೆ ಒಪ್ಪಿಗೆ ಕೂಡ ಕೊಟ್ಟಿದೆ. ಇದರೊಂದಿಗೆ ಆಕೆ ಕಣ್ಣಿಟ್ಟಿರುವುದು ಲಿಮ್ಕಾ ಬುಕ್ ಆಪ್ ರಿಕಾರ್ಡ್ ಮೇಲೆ. ಉತ್ತರಪ್ರದೇಶ ಪರೀಕ್ಷಾ ಮಂಡಳಿ ನಡೆಸುವ ಪರೀಕ್ಷೆ ಎದುರಿಸಿ ಅನನ್ಯ ತೇರ್ಗಡೆಯಾದರೆ, ತನ್ನ ಸಹೋದರಿ ಸುಷ್ಮಾ ವರ್ಮಾ ಅವರ ದಾಖಲೆ ಮುರಿಯಲಿದ್ದಾರೆ. ಸುಷ್ಮಾ ವರ್ಮಾ 2007ರಲ್ಲಿ ತನ್ನ ಏಳನೇ ವಯಸ್ಸಿನಲ್ಲೇ 10ನೇ ತರಗತಿ ಪರೀಕ್ಷೆ ತೇರ್ಗಡೆಯಾಗುವ ಮೂಲಕ ದಾಖಲೆ ಬರೆದಿದ್ದಾರೆ.
ಶಿಕ್ಷಣ ಇಲಾಖೆಯಿಂದ ಅವಕಾಶ: ಕಾನೂನು ಪ್ರಕಾರ ನಾಲ್ಕನೇ ವಯಸ್ಸಿನಲ್ಲೇ 1ನೇ ಕ್ಲಾಸ್ಗೆ ಪ್ರವೇಶ ಪಡೆಯಲು ಅನುಮತಿ ಇಲ್ಲ . ಹೀಗಾಗಿ ಅನನ್ಯ ಪಾಲಕರು ಉತ್ತರ ಪ್ರದೇಶ ಶಿಕ್ಷಣ ಇಲಾಖೆಯಿಂದ ವಿಶೇಷ ಅನುಮತಿ ಪಡೆದರು. ಬಳಿಕ ಲಖನೌದ ಹೈಸ್ಕೂಲಿನಲ್ಲಿ 9 ನೇ ತರಗತಿಗೆ ಸೋಮವಾರ ಪ್ರವೇಶ ಕೊಡಿಸಿದ್ದಾರೆ.
ಪ್ರವೇಶಕ್ಕೆ ಅರ್ಹತೆ ಇದೆ: ಅನುಮತಿ ನೀಡಿ ಮಾತನಾಡಿದ ಜಿಲ್ಲಾ ಪರಿವೀಕ್ಷಕ ಉಮೇಶ್ ತ್ರಿಪಾಠಿ, ''ಅನನ್ಯ ತುಂಬಾ ಜಾಣೆಯಾಗಿದ್ದು, ಯಾರೊಬ್ಬರು ಅವರ ಪ್ರವೇಶ ತಡೆಯಲು ಸಾಧ್ಯವಿಲ್ಲ. ಅವಳು ನಿರರ್ಗಳವಾಗಿ ಹಿಂದಿ ಮಾತನಾಡುತ್ತಿದ್ದು, 9ನೇ ತರಗತಿ ಪುಸ್ತಕಗಳನ್ನು ಸರಳವಾಗಿ ಓದುತ್ತಾಳೆ. ಹೀಗಾಗಿ ಪ್ರವೇಶಕ್ಕೆ ಅನನ್ಯ ಅರ್ಹಳಿದ್ದಾಳೆ,'' ಎಂದು ಹೇಳಿದ್ದಾರೆ.
2011 ಡಿಸೆಂಬರ್ 1 ರಂದು ಜನಿಸಿರುವ ಅನನ್ಯ, ಬಾಬಾ ಸಾಹೇಬ್ ಭೀಮರಾವ್ ಅಂಬೇಡ್ಕರ್ ವಿವಿ ಸಹಾಯಕ ಮೇಲ್ವಿಚಾರಕ ತೇಜ್ ಬಹದ್ದೂರ್ ಅವರ ಪುತ್ರಿ. ತಾಯಿ ಛಾಯಾ ದೇವಿಗೆ ಓದಲು ಮತ್ತು ಬರೆಯಲು ಬರುವುದಿಲ್ಲ.
ಎಲ್ಲರೂ ಪ್ರಚಂಡರೇ: ಈಗಾಗಲೇ ಬಾಲಕಿ ಅನನ್ಯ ಸಹೋದರಿ ಮತ್ತು ಸಹೋದರಿಯರು ಇಂತಹುದೇ ಸಾಧನೆ ಮಾಡಿ ಗಮನ ಸೆಳೆದಿದ್ದಾರೆ. ಸಹೋದರ ಶೈಲೆಂದರ್ ತನ್ನ 14ನೇ ವಯಸ್ಸಿನಲ್ಲೇ ಬಿಸಿಎ ಪೂರ್ಣಗೊಳಿಸಿದ್ದಾನೆ. 7ನೇ ವಯಸ್ಸಿನಲ್ಲಿ ಬೋರ್ಡ್ ಎಕ್ಸಾಂ ಪಾಸ್ ಮಾಡಿ ದಾಖಲೆ ಬರೆದ ಸಹೋದರಿ ಸುಷ್ಮಾ , 15ನೇ ವಯಸ್ಸಿನಲ್ಲಿ ಪಿಎಚ್ಡಿಗೆ ಪ್ರವೇಶ ಪಡೆದು ಒಬ್ಬರನ್ನೊಬ್ಬರು ಮೀರಿಸುತ್ತಿದ್ದಾರೆ. 13ನೇ ವಯಸ್ಸಿನಲ್ಲೇ ಸುಷ್ಮಾ ಬಿಎಸ್ಸಿ ಪೂರ್ಣಗೊಳಿಸಿದ ಗರಿಮೆ ಹೊಂದಿದ್ದಾಳೆ.
---
9 ತಿಂಗಳಲ್ಲೇ ರಾಮಾಯಣ ಓದು: ಅಕ್ಕ ಮತ್ತು ಅಣ್ಣನಿಗಿಂತ ಒಂದು ಹೆಜ್ಜೆ ಮುಂದಿರುವ ಅನನ್ಯಾ 9 ತಿಂಗಳಲ್ಲೇ ರಾಮಾಯಣ ಮತ್ತು ಸುಂದರ ಕಾಂಡ ಓದುತ್ತಿದ್ದಳಂತೆ. ತಾವು ಯಾವಾಗಲೂ ಓದುವಂತೆ ಅವಳಿಗೆ ಒತ್ತಡ ಹೇರಿಲ್ಲ ಅಂತಾರೆ ತಂದೆ ತೇಜ್ ಬಹದ್ದೂರ್. ಮತ್ತೊಂದೆಡೆ ಅನನ್ಯಾಳ ಜಾಣ್ಮೆಗೆ ಪ್ರಿನ್ಸಿಪಲ್ ಅನಿತಾ ರಾತ್ರಾ ಅಚ್ಚರಿ ವ್ಯಕ್ತಪಡಿಸಿದ್ದಾರೆ. ಮೊಬೈಲು-ಟ್ಯಾಬು, ಗೇಮು ಅಂತ ದುಂಬಾಲು ಬೀಳೋ ಮಕ್ಕಳಿಗೆ ಇವರು ನಿಜಕ್ಕೂ ಉತ್ತರವಾಗಿದ್ದಾರೆ.