ದಿವ್ಯಾಂಗರ ಸಾಲಮನ್ನಾಗೆ ಮುಂದಾದ ಯೋಗಿ

ಲಖನೌ: ಮೊನ್ನೆಯಷ್ಟೇ ರೈತರ ಬೆಳೆ ಸಾಲಮನ್ನಾ ಮಾಡಿರುವ ಉತ್ತರ ಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ನೇತೃತ್ವದ ಸರಕಾರ ದಿವ್ಯಾಂಗರ ಸಾಲಮನ್ನಾ ಮಾಡಲು ಮುಂದಾಗಿದೆ.

ಉತ್ತರ ಪ್ರದೇಶ ಸರಕಾರದ ದಿವ್ಯಾಂಗಜನ್ ಸಶಕ್ತೀಕರಣ ಯೋಜನೆಯಡಿ ದಿವ್ಯಾಂಗರ 3.88 ಕೋಟಿ ರೂಪಾಯಿ ಸಾಲಮನ್ನಾ ಮಾಡಲು ನಿರ್ಧರಿಸಿದೆ. ಮುಂದಿನ 100 ದಿನಗಳಲ್ಲಿ 6,821 ದಿವ್ಯಾಂಗರ ಒಟ್ಟು 3.88 ರೂಪಾಯಿ ಸಾಲ ಮನ್ನಾ ಮಾಡಲು ದಿವ್ಯಾಂಗಜನ್ ಸಶಕ್ತೀಕರಣ ಇಲಾಖೆ ಪ್ರಯತ್ನಿಸುತ್ತಿದೆ. ಇಲ್ಲಿಯವರೆಗೂ 1.60 ಕೋಟಿ ರೂಪಾಯಿ ಸಾಲವನ್ನು ಪಾವತಿಸಲಾಗಿದೆ. ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಅವರು ರೈತರ ಸಾಲ ಮನ್ನಾ ಮಾಡಿದ ಬೆನ್ನಲ್ಲೇ ದಿವ್ಯಾಂಗರ ಸಾಲಮನ್ನಾ ಮಾಡುತ್ತೇವೆ ಎಂದು ದಿವ್ಯಾಂಗರ ಕ್ಷೇಮಾಭಿವೃದ್ಧಿ
ಖಾತೆ ಸಚಿವ ಓಂ ಪ್ರಕಾಶ ರಾಜ್‌ಭಾರ್ ಅವರು ಘೋಷಿಸಿದ್ದಾರೆ.

ಪ್ರಸ್ತುತ ಉತ್ತರ ಪ್ರದೇಶದಲ್ಲಿ ಸುಮಾರು 2 ಕೋಟಿ ಜನ ದಿವ್ಯಾಂಗರಿದ್ದಾರೆ. ದಿವ್ಯಾಂಗರನ್ನು ಸ್ವಾವಲಂಬಿಗಳಾಗಿ ಮಾಡಲು ಉತ್ತರ ಪ್ರದೇಶ ಸರಕಾರ ಮುಂದಾಗಿದೆ. ಕೇಂದ್ರದ ರಾಷ್ಟ್ರೀಯ ಕೌಶಲ್ಯ ಅಭಿವೃದ್ಧಿ ಮಿಶನ್‌ ಜತೆ ದಿವ್ಯಾಂಗರ ಅಭಿವೃದ್ಧಿಗೆ ಪ್ರಯತ್ನಿಸುತ್ತಿದ್ದೇವೆ. ತಮ್ಮ ಕುಟೀರಗಳಲ್ಲಿಯೇ ಸಣ್ಣ ಕೈಗಾರಿಕೆ ಆರಂಭಿಸಲು ಪ್ರೋತ್ಸಾಹ ನೀಡುತ್ತೇವೆ' ಎಂದು ಓಂ ಪ್ರಕಾಶ ರಾಜ್‌ಭಾರ್ ಭರವಸೆ ನೀಡಿದ್ದಾರೆ.