ಉ.ಪ್ರದೇಶದಲ್ಲಿ 3 ರೂ.ಗೆ ಟಿಫನ್‌, 5 ರೂ.ಗೆ ಊಟ !

ಲಖನೌ: ಉತ್ತರ ಪ್ರದೇಶ ಜನರಿಗೆ ಕಡಿಮೆ ಖರ್ಚಿನಲ್ಲಿ ಉತ್ತಮ ಆಹಾರ ನೀಡುವ ಉದ್ಧೇಶದಿಂದ ಇಲ್ಲಿನ ಸರಕಾರ ನೂತನ ಕ್ಯಾಂಟೀನ್ ಸೌಲಭ್ಯ ನೀಡಲು ಮುಂದೆ ಬಂದಿದೆ.

ತಮಿಳುನಾಡಿನ ಅಮ್ಮಾ ಕ್ಯಾಂಟೀನ್‌, ಕರ್ನಾಟಕದ ಇಂದಿರಾ ಕ್ಯಾಂಟೀನ್ ಬಳಿಕ ಇದೀಗ ಉತ್ತರ ಪ್ರದೇಶದ ಯೋಗಿ ಆದಿತ್ಯನಾಥ್ ಸರಕಾರವೂ ಕ್ಯಾಂಟೀನ್‌ ಸೌಲಭ್ಯ ನೀಡಲು ಮುಂದಾಗಿದ್ದು, 'ಅನ್ನಪೂರ್ಣ ಭೋಜನಾಲಯ'ವನ್ನು ಸ್ಥಾಪಿಸಲು ಮುಂದಾಗಿದೆ.

ಮಾಹಿತಿಗಳ ಪ್ರಕಾರ ಆದಿತ್ಯನಾಥ್‌ ನೇತೃತ್ವದ ಸರಕಾರ ಈಗಾಗಲೇ ತಮ್ಮ ಭವಿಷ್ಯದ ಹೋಟೆಲ್‌ನ ಮೆನು ಕೂಡಾ ಸಿದ್ಧ ಪಡಿಸಿದ್ದು, ಕೇವಲ 3 ರೂ.ಗೆ ಮುಂಜಾನೆಯ ತಿಂಡಿಗೆ ಇಡ್ಲಿ- ವಡಾ ಮತ್ತು ಸಾಂಬಾರ್, ಪೋಹಾ (ಅವಲಕ್ಕಿ ಬಾತ್‌), ಪಕೋಡಾ, ಕಚೋರಿ ಮತ್ತು ಟೀ ನೀಡಲಾಗುತ್ತದೆ.

ಅಪರಾಹ್ನದ ಊಟ ಹಾಗು ರಾತ್ರಿ ಊಟಕ್ಕೆ ಕೇವಲ 5 ರೂ. ನಿಗದಿ ಪಡಿಸಲಾಗಿದ್ದು, ದಾಲ್‌, ರೈಸ್‌, ಚಪಾತಿ ಸೇರಿದಂತೆ ಋತುವಾರು ತರಕಾರಿಗಳ ಸಾಂಬಾರ್‌ ನೀಡಲಾಗುತ್ತದೆ. ಹೋಟೆಲ್‌ಗಳಲ್ಲಿ ಸ್ಟೀಲ್‌ ತಟ್ಟೆಯಲ್ಲಿ ಊಟ, ಉಪಾಹಾರ ನೀಡಲಾಗುತ್ತದೆ.

ಕಳೆದ ವರ್ಷವಷ್ಟೇ ಸಮಾಜವಾದಿ ಪಾರ್ಟಿಯ ಅಖಿಲೇಶ್‌ ಯಾದವ್ ನೇತೃತ್ವದ ಸರಕಾರ ಸಮಾಜವಾದಿ ಕ್ಯಾಂಟಿನ್ ಮಾಡಿತ್ತಾದರೂ ಇದಕ್ಕೆ ಜನಬೆಂಬಲ ದೊರಕದ ಹಿನ್ನೆಲೆಯಲ್ಲಿ ಈ ಯೋಜನೆ ನೆಲಕಚ್ಚಿತ್ತು.