ಹೊಸದಿಲ್ಲಿ: ಬಿಜೆಪಿ ಸಂಸದರೊಬ್ಬರ ಐದು ವರ್ಷದ ಪುಟಾಣಿ ಮಗಳ ಜತೆ ಪ್ರಧಾನಿ ನರೇಂದ್ರ ಮೋದಿ ಅವರ ಮಾತುಕತೆಯ ವಿಡಿಯೋ ವೈರಲ್ ಆಗಿದೆ. ಮಧ್ಯಪ್ರದೇಶದ ಉಜ್ಜಯನಿಯ ಬಿಜೆಪಿ ಸಂಸದ ಅನಿಲ್ ಫಿರೋಜಿಯಾ ಅವರು ತಮ್ಮ ಕುಟುಂಬದ ಜತೆ ಸಂಸತ್ನಲ್ಲಿ ಪ್ರಧಾನಿ ಮೋದಿ ಅವರನ್ನು ಭೇಟಿ ಮಾಡಿದ್ದರು. ಈ ವೇಳೆ ಮಗುವಿನ ಮುಗ್ಧ ಮಾತಿಗೆ ಪ್ರಧಾನಿ ಮೋದಿ ಖುಷಿಯಿಂದ ಜೋರಾಗಿ ನಕ್ಕರು.
"ನಾನು ಏನು ಮಾಡುತ್ತೇನೆ ಎಂದು ನಿನಗೆ ಗೊತ್ತೇ?" ಎಂದು ಪ್ರಧಾನಿ ಮತ್ತೆ ಕೇಳಿದ್ದಾರೆ. "ನೀವು ಲೋಕಸಭೆಯಲ್ಲಿ ಕೆಲಸ ಮಾಡುತ್ತಿದ್ದೀರಿ" ಎಂದು ಅವಳು ಉತ್ತರಿಸಿದ್ದಾಳೆ.
ಇದನ್ನು ಕೇಳಿದ ಕೂಡಲೇ ಕೊಠಡಿಯಲ್ಲಿದ್ದ ಪ್ರತಿಯೊಬ್ಬರೂ ಜೋರಾಗಿ ನಕ್ಕಿದ್ದಾರೆ. ಮೋದಿ ಕೂಡ ಮಗುವಿನ ಮುಗ್ಧ ಮಾತುಗಳನ್ನು ಆನಂದಿಸಿದ್ದಾರೆ. ಮಗು ಕೊಠಡಿಯಿಂದ ಹೊರಗೆ ಹೋಗುವುದಕ್ಕೂ ಮುನ್ನ ಪ್ರಧಾನಿ ಮೋದಿ ಅವಳಿಗೆ ಚಾಕೊಲೇಟ್ ನೀಡಿದ್ದಾರೆ. ಪ್ರಧಾನಿ ಮೋದಿ ಅವರು ಈ ಹಿಂದೆಯೂ ಸಂಸದರ ಮಕ್ಕಳ ಜತೆ ತಮಾಷೆಯಾಗಿ ಹರಟಿದ್ದರು.
ಅಹನಾಳ ತಂದೆ ಅನಿಲ್ ಫಿರೋಜಿಯಾ ಅವರು ಕೆಲವು ತಿಂಗಳ ಹಿಂದೆ ಸಾಕಷ್ಟು ಸುದ್ದಿಯಲ್ಲಿದ್ದರು. ರಸ್ತೆ ಸಾರಿಗೆ ಸಚಿವ ನಿತಿನ್ ಗಡ್ಕರಿ ನೀಡಿದ್ದ ಸವಾಲನ್ನು ಸ್ವೀಕರಿಸಿ ಅವರು ತೂಕ ಇಳಿಸಲು ಮಾಡಿದ್ದ ಪ್ರಯತ್ನ ಶ್ಲಾಘನೆಗೆ ಒಳಗಾಗಿತ್ತು.
ಸಮಾರಂಭವೊಂದರಲ್ಲಿ ನಿತಿನ್ ಗಡ್ಕರಿ ಅವರಿಗೆ ಸಂಸದ ಅನಿಲ್ ಅವರು, ತಮ್ಮ ಕ್ಷೇತ್ರದ ಅಭಿವೃದ್ಧಿಗೆ ಅನುದಾನ ಬಿಡುಗಡೆ ಮಾಡುವಂತೆ ಕೋರಿದ್ದರು. ಅನಿಲ್ ಅವರು ಇಳಿಸುವ ಪ್ರತಿ ಒಂದು ಕೆಜಿ ತೂಕಕ್ಕೆ ಒಂದು ಸಾವಿರ ಕೋಟಿ ರೂ ಅನುದಾನ ಮಂಜೂರು ಮಾಡಿಸಿಕೊಡುವುದಾಗಿ ಗಡ್ಕರಿ ಭರವಸೆ ನೀಡಿದ್ದರು. ಇದನ್ನು ಸವಾಲಾಗಿ ತೆಗೆದುಕೊಂಡಿದ್ದ ಅನಿಲ್ ಅವರು 21 ಕೆಜಿ ತೂಕ ಇಳಿಸಿಕೊಂಡಿದ್ದಾರೆ. ಹೀಗಾಗಿ 21,000 ಕೋಟಿ ರೂ ಅನುದಾನ ಅವರ ಕ್ಷೇತ್ರಕ್ಕೆ ಸಿಗಬೇಕಿದೆ.
ಪ್ರಧಾನಿ ಮೋದಿ ಕೂಡ ಸಂಸದ ಅನಿಲ್ ಅವರ ದೇಹ ತೂಕ ಇಳಿಸುವ ಕುರಿತು ಮಾತನಾಡಿದ್ದರು. ಅವರ ಪ್ರಯತ್ನಗಳನ್ನು ಶ್ಲಾಘಿಸಿದ ಮೋದಿ, ಸಂಪೂರ್ಣ ಫಿಟ್ ಆಗಲು ಅವರು ಇನ್ನೂ ಸ್ವಲ್ಪ ತೂಕ ಇಳಿಸಿಕೊಳ್ಳಬೇಕಾಗಿದೆ ಎಂದು ಸಲಹೆ ನೀಡಿದ್ದಾರೆ.
ಕೆಲವು ದಿನಗಳ ಹಿಂದಷ್ಟೇ ಬಿಹಾರಕ್ಕೆ ಭೇಟಿ ನೀಡಿದ್ದ ಪ್ರಧಾನಿ ಮೋದಿ, ಬಿಜೆಡಿ ನಾಯಕ ತೇಜಸ್ವಿ ಯಾದವ್ ಅವರಿಗೆ ತೂಕ ಇಳಿಸಿಕೊಳ್ಳುವಂತೆ ಸಲಹೆ ನೀಡಿದ್ದರು. ಇದರ ಬಳಿಕ ತೇಜಸ್ವಿ ಯಾದವ್ ಅವರು ಕ್ರಿಕೆಟ್ ಆಡುವ ಮತ್ತು ಬರಿ ಕೈಗಳಿಂದ ಕಾರು ಎಳೆದು ಕಸರತ್ತು ಮಾಡುವ ವಿಡಿಯೋಗಳನ್ನು ಹಂಚಿಕೊಂಡಿದ್ದರು.