ಯುವತಿಯನ್ನು ಇರಿದುಕೊಂದ ಭಗ್ನಪ್ರೇಮಿ

ಇಂದೋರ್: ಪರಿಚಯದ ಯುವತಿ ಪರಪುರುಷರ ಜತೆ ಮಾತನಾಡುತ್ತಾಳೆ ಮತ್ತು ಆಧುನಿಕ ಜೀವನಶೈಲಿ ರೂಢಿಸಿಕೊಂಡಿದ್ದಾಳೆ. ತನ್ನ ಜತೆ ಮಾತನಾಡುತ್ತಿಲ್ಲ, ನಾವಿಬ್ಬರೂ ಮದುವೆಯಾಗಲು ಸಾಧ್ಯವಿಲ್ಲ ಎಂದುಕೊಂಡ ಭಗ್ನಪ್ರೇಮಿಯೊಬ್ಬ 25 ವರ್ಷದ ಯುವತಿಯನ್ನು 38 ಬಾರಿ ಇರಿದು ಕೊಂದಿದ್ದಾನೆ.

ಗುರುವಾರ ರಾತ್ರಿ ಯುವತಿ ಕೆಲಸ ಮಾಡುತ್ತಿದ್ದ ಕಚೇರಿ ಬಳಿ ಆಗಮಿಸಿದ್ದ ಆರೋಪಿ ಕಮ್ಲೇಶ್ ಸಾಹು, ಯುವತಿ ಸುಪ್ರಿಯಾ ಜೈನ್ ಹೊರಗೆ ಊಟಕ್ಕೆ ಬಂದ ಸಂದರ್ಭ ನೋಡಿ ಆಕೆಯನ್ನು ಹಿಂಬಾಲಿಸಿದ್ದ. ನಂತರ ಆಕೆಯನ್ನು ಹಿಡಿದುಕೊಂಡು ಕತ್ತಿಯಿಂದ 38 ಬಾರಿ ಇರಿದಿದ್ದಾನೆ. ಇಬ್ಬರು ಆಕೆಯ ಸಹಾಯಕ್ಕೆ ಧಾವಿಸಿದರಾದರೂ, ಅವರಿಗೆ ಬೆದರಿಕೆ ಒಡ್ಡಿದ್ದರಿಂದ ದೂರ ಸರಿದಿದ್ದಾರೆ. ನಂತರ ಅವರು ಪೊಲೀಸರಿಗೆ ಮಾಹಿತಿ ನೀಡಿದ್ದಾರೆ.

ಪೊಲೀಸರು ಬಂದಾಗ ಕಮ್ಲೇಶ್ ಆಕೆಯ ರಕ್ತಸಿಕ್ತ ದೇಹದ ಬಳಿ ಕುಳಿತಿದ್ದ. ಕೂಡಲೇ ಆಕೆಯನ್ನು ಆಸ್ಪತ್ರೆಗೆ ದಾಖಲಿಸಲಾಯಿತಾದರೂ, ಚಿಕಿತ್ಸೆ ಫಲಕಾರಿಯಾಗದೆ ಶುಕ್ರವಾರ ಬೆಳಗ್ಗೆ ಆಕೆ ಮೃತಪಟ್ಟಿದ್ದಾಳೆ.

ಆಕೆಯನ್ನು ನಾನು ತುಂಬಾ ಪ್ರೀತಿಸುತ್ತಿದೆ. ಆಕೆಗೆ 12ನೇ ತರಗತಿಯಲ್ಲಿ ಪ್ರೇಮ ನಿವೇದನೆ ಮಾಡಿಕೊಂಡಿದ್ದೆ. ಕೆಲಸ ದೊರೆತ ಬಳಿಕ ಪ್ರೀತಿಸೋಣ ಎಂದು ಆಕೆ ಹೇಳಿದ್ದಳು. ಆದರೆ ಕೆಲಸ ದೊರೆತ ಬಳಿಕ ನನ್ನನ್ನು ನಿರ್ಲಕ್ಷಿಸಿದ್ದಳು. ಜತೆಗೆ ಇತರ ಗೆಳೆಯರ ಹೊರಗಡೆ ಹೋಗುತ್ತಿದ್ದಳು. ಆಧುನಿಕ ಶೈಲಿಯ ಉಡುಪು ಧರಿಸುತ್ತಿದ್ದಳು, ಫೇಸ್‌ಬುಕ್‌ನಲ್ಲಿ ಅವುಗಳನ್ನು ಪೋಸ್ಟ್ ಮಾಡುತ್ತಿದ್ದಳು. ಹೀಗಾಗಿ ಆಕೆಯನ್ನು ಕೊಲೆ ಮಾಡಿದೆ ಎಂದು ಪೊಲೀಸ್ ಬಂಧನದಲ್ಲಿರುವ ಕಮಲೇಶ್ ತಿಳಿಸಿದ್ದಾನೆ.