ಭಾರತದ ಅತಿ ಕಿರಿಯ ಐಪಿಎಸ್‌ ಅಧಿಕಾರಿ ಈ ಯುವಕ!

ರಾಜ್‌ಕೋಟ್‌: ಈತನಿಗೆ ವಯಸ್ಸು ಕೇವಲ 22! ಆದರೆ ದೇಶ ಸೇವೆಯ ಮಹತ್ಕಾರ್ಯಕ್ಕೆ ಸಿದ್ಧನಾಗಿದ್ದಾನೆ.
ಗುಜರಾತ್‌ ಮೂಲದ ಯುವಕ ಹಸನ್‌ ಸಾಫಿನ್‌ ದೇಶದ ಅತ್ಯಂತ ಕಿರಿಯ ಐಪಿಎಸ್‌ ಆಫಿಸರ್‌ ಆಗಿ ಅಧಿಕಾರ ಸ್ವೀಕರಿಸಲಿದ್ದಾನೆ!

ರಾಜ್‌ಕೋಟ್‌ನ ಜಮ್ನನಗರ ಠಾಣೆಯಲ್ಲಿ ಡಿ.23ರಿಂದ ಸಹಾಯಕ ಎಸ್‌ಪಿಯಾಗಿ ಅಧಿಕಾರ ಸ್ವೀಕರಿಸಲಿದ್ದಾನೆ. ಸಾಮಾನ್ಯ ಕುಟುಂಬದಿಂದ ಬಂದಿರುವ ಹಸನ್‌ ಗುಜರಾತ್‌ನ ಪಾಲನ್‌ಪುರದಲ್ಲಿನ ಕಾನೊದರ್‌ ಗ್ರಾಮದ ಚುರುಕು ಹುಡುಗ. ದೇಶ ಸೇವೆಯ ಹಂಬಲ ಈತನನ್ನು ಉನ್ನತ ಹುದ್ದೆಗೇರುವ ಅವಕಾಶ ನೀಡಿದೆ.

ಕಳೆದ ವರ್ಷ ಯುಪಿಎಸ್‌ಸಿ ಪರೀಕ್ಷೆ ಬರೆದಿದ್ದ ಹಸನ್‌, 570ನೇ ರ‍್ಯಾಂಕ್‌ ಪಡೆದು, ಐಪಿಎಸ್‌ಗೆ ಅರ್ಹತೆ ಪಡೆದಿದ್ದಾನೆ. ತಂದೆ ಮುಸ್ತಫಾ ಹಸನ್‌ ಹಾಗೂ ತಾಯಿ ನಸೀಂಬಾನು ಸಿರಿವಂತರಲ್ಲ. ಕಷ್ಟಪಟ್ಟು ದಿನದ ಸಂಬಳದಲ್ಲಿ ಕೆಲಸ ಮಾಡುವ ಮೂಲಕ ಹಸನ್‌ ಜೀವನ ರೂಪಿಸಿದವರು. ಮನೆ, ಗ್ರಾಮದ ಸುತ್ತಮುತ್ತಲಿನ ಹೋಟೆಲ್‌ಗಳಿಗೆ ಚಪಾತಿಗಳನ್ನು ಮಾರಾಟ ಮಾಡುತ್ತ ತಾಯಿ, ಹಸನ್‌ ಓದಿಗೆ ಬೆನ್ನೆಲುಬಾಗಿ ನಿಂತಿದ್ದರು. ಮಾರಾಟ ಮಾಡಿದ ಚಪಾತಿಯ ಹಣವೇ ಹಸನ್‌ ಉನ್ನತ ಶಿಕ್ಷಣಕ್ಕೂ ಸಹಕಾರಿಯಾಗಿತ್ತು. ಇದರೊಂದಿಗೆ ಗ್ರಾಮದಲ್ಲಿನ ಉದ್ಯಮಿ ಹಾಗೂ ಸೊಸೈಟಿಯ ಜನರ ಸಹಾಯವನ್ನೂ ಪಡೆದ ಹಸನ್‌, ತನ್ನ ಕನಸನ್ನು ನನಸಾಗಿಸುವ ಶ್ರಮದಲ್ಲಿ ಸಫಲನಾಗಿದ್ದಾನೆ!

ರಾಮ ಮಂದಿರ ನಿರ್ಮಾಣಕ್ಕೆ ಒಂದು ಇಟ್ಟಿಗೆ, ರೂ.11 ನೀಡುವಂತೆ ಕರೆ!

ಐಎಎಸ್‌ ಅಧಿಕಾರಿಯಾಗುವ ಛಲದಲ್ಲಿದ್ದ ಹಸನ್‌, ಆರಂಭದಲ್ಲಿ ಐಪಿಎಸ್‌ ಅಧಿಕಾರಿಯಾಗಿ ದೇಶಕ್ಕಾಗಿ ಖಾಕಿ ತೊಡುವ ಮನಸ್ಸು ಮಾಡಿರಲಿಲ್ಲ. ಐಎಎಸ್‌ಗಾಗಿಯೇ ಮತ್ತೆ ಯುಪಿಎಸ್‌ಸಿ ಪರೀಕ್ಷೆ ಬರೆದರೂ ಉತ್ತೀರ್ಣ ಆಗಿಲ್ಲ! ಪ್ರಥಮ ಬಾರಿಯ ಪರೀಕ್ಷೆಯಲ್ಲಿ ಖಾಕಿ ತೊಡುವ ಅವಕಾಶ ಸಿಕ್ಕಿದ್ದರಿಂದ, ದೇಶಕ್ಕೆ ತನ್ನ ಅಗತ್ಯ ಈ ನಿಟ್ಟಿನಲ್ಲಿದೆ ಎಂದು ಮನಗಂಡು, ಐಪಿಎಸ್‌ ತರಬೇತಿಗೆ ಸೇರಿದ್ದಾನೆ.