ಇವರೇ ದೇಶದ ಅತಿ ಕಿರಿಯ ಜಡ್ಜ್‌, 21ನೇ ವಯಸ್ಸಿಗೆ ನ್ಯಾಯಾಧೀಶರಾದರು

ಹೊಸದಿಲ್ಲಿ: ದೇಶದ ಅತಿ ಕಿರಿಯ ನ್ಯಾಯಾಧೀಶ ಎಂಬ ಗೌರವಕ್ಕೆ ರಾಜಸ್ಥಾನದ ಮಯಾಂಕ್‌ ಪ್ರತಾಪ್‌ ಸಿಂಗ್ ಪಾತ್ರರಾಗಿದ್ದಾರೆ.

ಕೇವಲ 21ನೇ ವಯಸ್ಸಿನಲ್ಲಿಯೇ ನ್ಯಾಯಾಂಗ ಸೇವಾ ಪರೀಕ್ಷೆಯಲ್ಲಿ ತೇರ್ಗಡೆ ಹೊಂದಿರುವ ಮಯಾಂಕ್‌ ಈಗ ದೇಶದ ಅತಿ ಕಿರಿಯ ನ್ಯಾಯಾಧೀಶ ಎಂಬ ಹೆಗ್ಗಳಿಕೆ ಹೊಂದಲಿದ್ದಾರೆ.

2014ರಲ್ಲಿ ರಾಜಸ್ಥಾನ ವಿವಿಯಲ್ಲಿ ಕಾನೂನು ಪದವಿ ಪೂರೈಸಿದರು. ಈಗ ತೇರ್ಗಡೆ ಹೊಂದಿದ್ದೇನೆ. ಮೊದಲಿನಿಂದಲೂ ಕಾನೂನು, ನ್ಯಾಯಾಂಗ ಎಂದರೆ ಆಸಕ್ತಿ ಇತ್ತು. ನ್ಯಾಯಾಧೀಶ ಆಗಬೇಕೆಂಬ ಆಸೆ ಕೂಡ ಇತ್ತು ಎಂದು ಮಯಾಂಕ್‌ ತಿಳಿಸಿದ್ದಾರೆ.

ಮೊದಲ ಪ್ರಯತ್ನದಲ್ಲೇ ನ್ಯಾಯಾಂಗ ಸೇವಾ ಪರೀಕ್ಷೆ ತೇರ್ಗಡೆಯಾಗಿದ್ದು ಖುಷಿ ತಂದಿದೆ. ಇದಕ್ಕೆ ನನ್ನ ಪಾಲಕರು, ಕುಟುಂಬ ಸದಸ್ಯರು, ಸ್ನೇಹಿತರು, ಶಿಕ್ಷಕರು ಕಾರಣ ಎಂದರು.

ನ್ಯಾಯಾಂಗ ಸೇವಾ ಪರೀಕ್ಷೆ ಬರೆಯಲು ಈ ಮೊದಲು 23 ವರ್ಷ ಆಗಬೇಕಾಗಿತ್ತು, ಆದರೆ ಈ ವರ್ಷವೇ ರಾಜಸ್ಥಾನ ಹೈಕೋರ್ಟ್‌ ಅದನ್ನು 21ಕ್ಕೆ ಇಳಿಸಿದ್ದು ನನಗೆ ನೆರವಾಯಿತು ಎಂದು ಮಯಾಂಕ್‌ ಸಿಂಗ್‌ ತಿಳಿಸಿದರು.