ತಾಯಿಯನ್ನು ಮದುವೆಯಾಗಲು ಮಗುವಿನ ಅಪಹರಣ

ಘಾಜಿಯಾಬಾದ್: ಪ್ರೀತಿಸುತ್ತಿದ್ದ ಮಹಿಳೆಯನ್ನು ಬಲವಂತದಿಂದ ಒಲಿಸಿಕೊಳ್ಳಲು 28 ವರ್ಷದ ಯುವಕನೊಬ್ಬ ಆಕೆಯ 4 ವರ್ಷದ ಮಗುವನ್ನು ಅಪಹರಣ ಮಾಡಿದ ಪ್ರಸಂಗ ಉತ್ತರ ಪ್ರದೇಶದಲ್ಲಿ ನಡೆದಿದೆ. ಅದೃಷ್ಟವಶಾತ್ ಪ್ರಕರಣ ಸುಖಾಂತ್ಯ ಕಂಡಿದ್ದು ಬಾಲಕ ಸುರಕ್ಷಿತವಾಗಿ ತಾಯಿಯ ಮಡಿಲು ಸೇರಿದ್ದಾನೆ.

ಆರೋಪಿ ಮೋನು ಕೂಲಿ ಕಾರ್ಮಿಕನಾಗಿದ್ದು, ಜುಲೈ 24ರಂದು ಲೋನಿಯಲ್ಲಿರುವ ಬಾಬಾ ಮೋಹನ್ ರಾಮ್ ಶಾಲೆಯಿಂದ ನರ್ಸರಿ ಓದುತ್ತಿದ್ದ ಬಾಲಕನನ್ನು ಅಪಹರಿಸಿದ್ದ. ಮೋನು ಮತ್ತು ಆತ ಅಪಹರಿಸಿದ್ದ ಬಾಲಕನ ಕುಟುಂಬ ನೆರೆಹೊರೆಯಲ್ಲಿ ವಾಸಿಸುತ್ತಿದೆ. ಮಗುವಿನ ತಾಯಿ ರುಚಿ, ಪತಿಯ ಕುಡಿತದ ವ್ಯಸನದಿಂದ ಬೇಸತ್ತು 2 ವರ್ಷದಿಂದ ಆತನಿಂದ ದೂರವಾಗಿದ್ದಾರೆ. ಕಳೆದ ಒಂದು ವರ್ಷದಿಂದ ಮೋನುಗೆ ರುಚಿಯ ಪರಿಚಯವಿದ್ದು ತನ್ನನ್ನು ಮದುವೆಯಾಗುವಂತೆ ಆಕೆಯನ್ನಾತ ಕಾಡುತ್ತಿದ್ದ. ದರೋಡೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಜೈಲಿಗೆ ಹೋಗಿ ಬಂದಿರುವ ಮೋನುವನ್ನು ಮದುವೆಯಾಗಲು ರುಚಿ ಸುತಾರಾಂ ಒಪ್ಪಿರಲಿಲ್ಲ. ಹೇಗಾದರೂ ಸರಿ ಆಕೆಯನ್ನು ಪಡೆಯಲೇ ಬೇಕೆಂದು ಯೋಜನೆ ರೂಪಿಸಿದ ಮೋನು ಆಕೆಯ ಮಗುವನ್ನು ಅಪಹರಿಸಿದ್ದಾನೆ.

ನೆರೆಹೊರೆಯವನಾಗಿದ್ದರಿಂದ ಮಗು ಮೋನು ಜತೆ ಸಲಿಗೆಯಿಂದಿತ್ತು. ಹೀಗಾಗಿ ಆತ ಕರೆದಾಗ ಯಾವ ವಿರೋಧವಿಲ್ಲದೆ ಹೋಗಿದೆ. ಮಗುವನ್ನು ಮೀರತ್‌ಗೆ ಕರೆದುಕೊಂಡು ಹೋದ ಮೋನು, ನನ್ನನ್ನು ಮದುವೆಯಾಗದಿದ್ದರೆ ಮಗುವನ್ನು ಸಾಯಿಸುವುದಾಗಿ ರುಚಿಗೆ ಕರೆ ಮಾಡಿ ಬೆದರಿಕೆ ಹಾಕಿದ್ದಾನೆ.
ಮರುದಿನ ಮುಂಜಾನೆ ರುಚಿ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದು, ಮೊಬೈಲ್ ಲೊಕೇಷನ್ ಸಹಾಯದಿಂದ ಆರೋಪಿಯನ್ನು ಬಂಧಿಸಿದ ಪೊಲೀಸರು ಮಗುವನ್ನು ತಾಯಿಗೊಪ್ಪಿಸಿದ್ದಾರೆ.