'ದಿ ಆ್ಯಕ್ಸಿಡೆಂಟಲ್‌ ಪ್ರೈಮ್‌ ಮಿನಿಸ್ಟರ್‌' ಸಿನಿಮಾ ಟ್ರೇಲರ್‌ ಬಿಡುಗಡೆ: ಕಾಂಗ್ರೆಸ್ ಕೆಂಡಾಮಂಡಲ

ಹೊಸದಿಲ್ಲಿ: ಮಾಜಿ ಪ್ರಧಾನಿ ಡಾ. ಮನಮೋಹನ್‌ ಸಿಂಗ್‌ ಅವರನ್ನು ಮುಖ್ಯ ಪಾತ್ರದಲ್ಲಿ ತೋರಿಸುವ ಕಥಾ ಹಂದರ ಹೊಂದಿರುವ ವಿಜಯ್‌ ರತ್ನಾಕರ್‌ ಗುತ್ತೆ ನಿರ್ದೇಶನದ 'ದಿ ಆ್ಯಕ್ಸಿಡೆಂಟಲ್‌ ಪ್ರೈಮ್‌ ಮಿನಿಸ್ಟರ್‌' ಸಿನಿಮಾ ಟ್ರೇಲರ್‌ ಗುರುವಾರ ಬಿಡುಗಡೆಯಾದ ಬೆನ್ನಲ್ಲೇ ಕಾಂಗ್ರೆಸ್‌ ತಕರಾರು ತೆಗೆದಿದೆ.

ಟ್ರೇಲರ್‌ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್‌ ಆಗಿದ್ದು, ಬಿಡುಗಡೆಗೆ ಮುನ್ನ ಈ ಸಿನಿಮಾವನ್ನು ಪಕ್ಷದ ಕಾರ‍್ಯಕರ್ತರಿಗೆ ತೋರಿಸಬೇಕು. ಒಂದೊಮ್ಮೆ ಕೆಲ ದೃಶ್ಯಗಳು ವಾಸ್ತವ ಸಂಗತಿಗಳಿಗೆ ದೂರವಾದುದೆಂದು ತೋರಿದಲ್ಲಿ ಅಂತವುಗಳನ್ನು ಕಿತ್ತು ಹಾಕಬೇಕು. ಈ ಬೇಡಿಕೆಗೆ ಚಿತ್ರ ನಿರ್ಮಾಣ ತಂಡ ಮಣಿಯದಿದ್ದರೆ ದೇಶಾದ್ಯಂತ ಬಿಡುಗಡೆಗೆ ತಡೆಯೊಡ್ಡಿ ಪ್ರತಿಭಟನೆ ನಡೆಸುವುದಾಗಿ ಮಹಾರಾಷ್ಟ್ರದ ಯುವ ಕಾಂಗ್ರೆಸ್‌ ಘಟಕ ಬೆದರಿಕೆ ಹಾಕಿದೆ.

ಯುಪಿಎ ಆಡಳಿತಾವಧಿಯ 2004ರಿಂದ 2014ರವರೆಗೆ ಪ್ರಧಾನಿಯಾಗಿದ್ದ ಮನಮೋಹನ್‌ ಸಿಂಗ್‌ ಅವರನ್ನು ಮುಖ್ಯ ಪಾತ್ರದಲ್ಲಿ ತೋರಿಸುವ ಕಥಾ ಹಂದರವನ್ನು ಈ ಚಿತ್ರ ಹೊಂದಿದ್ದು, ಬಿಡುಗಡೆಗೆ ಮುನ್ನವೇ ತೀವ್ರ ಆಸಕ್ತಿ ಹುಟ್ಟಿಸಿದೆ. 2019ರ ಜನವರಿ 11ರಂದು ಚಿತ್ರ ತೆರೆ ಕಾಣಲಿದೆ. ಸಂಜಯ್‌ ಬರು ಬರೆದಿರುವ 'ದಿ ಆ್ಯಕ್ಸಿಡೆಂಟಲ್‌ ಪ್ರೈಮ್‌ ಮಿನಿಸ್ಟರ್‌' ಪುಸ್ತಕ ಆಧಾರಿತ ಈ ಚಿತ್ರಕ್ಕೆ ಅದೇ ಹೆಸರನ್ನು ಇಡಲಾಗಿದೆ. ಅನುಪಮ್‌ ಖೇರ್‌ ಪ್ರಧಾನ ಪಾತ್ರದಲ್ಲಿ ಅಭಿನಯಿಸಿದ್ದಾರೆ.