ಝಾಕಿರ್‌ ನಾಯಕ್‌ಗೆ ಇನ್ನು ನೆಲೆ ಇಲ್ಲ, ಪಾಸ್‌ಪೋರ್ಟ್‌ ರದ್ದು

ಹೊಸದಿಲ್ಲಿ: ರಾಷ್ಟ್ರೀಯ ತನಿಖಾ ಸಂಸ್ಥೆಯ ಶಿಫಾರಸಿನ ಮೇರೆಗೆ ವಿವಾದಿತ ಇಸ್ಲಾಂ ಧರ್ಮಗುರು ಝಾಕಿರ್‌ ನಾಯಕ್‌ ಅವರ ಪಾಸ್‌ಪೋರ್ಟ್‌ಅನ್ನು ಸರಕಾರ ರದ್ದು ಪಡಿಸಿದೆ.

ಮುಂಬಯಿ ಪ್ರಾದೇಶಿಕ ಪಾಸ್‌ಪೋರ್ಟ್‌ ಕಚೇರಿ ಝಾಕಿರ್‌ ನಾಯ್ಕ್‌ ಅವರ ಪಾಸ್‌ಪೋರ್ಟ್‌ ಹಿಂಪಡೆದಿರುವುದರಿಂದ ನಾಯಕ್‌ಗೆ ನೆಲೆ ಇಲ್ಲದಂತಾಗಿದೆ.

ಮತೀಯ ಭಾವನೆ ಪ್ರಚೋದನೆ ಮತ್ತು ಭಯೋತ್ಪಾದನೆಗೆ ಕುಮ್ಮಕ್ಕು ನೀಡುವಂಥ ಭಾಷಣ ಹಾಗೂ ದುಷ್ಕೃತ್ಯಗಳಿಗೆ ಹಣಕಾಸು ನೆರವು ನೀಡಿದ ಆರೋಪದ ಮೇಲೆ ಝಾಕಿರ್ ನಾಯಕ್ ವಿರುದ್ಧ 2016ರ ನವೆಂಬರ್ 18, ರಂದು ಎನ್ಐಎ ಪ್ರಕರಣ ದಾಖಲಿಸಿತ್ತು. ಹಲವು ಬಾರಿ ನೋಟಿಸ್‌ ಕಳುಹಿಸಿದ್ದರೂ ನಾಯಕ್‌ ವಿಚಾರಣೆಗೆ ಹಾಜರಾಗದ ಹಿನ್ನೆಲೆಯಲ್ಲಿ ಈ ಕ್ರಮಕ್ಕೆ ಶಿಫಾರಸು ಮಾಡಿತ್ತು.

ಕಳೆದ ವರ್ಷ ದೇಶ ತೊರೆದ ನಂತರ ನಾಯಕ್‌ ಸೌದಿ ಅರೇಬಿಯಾ, ಮಲೇಷ್ಯಾ ಹಾಗೂ ಇತರ ರಾಷ್ಟ್ರಗಳಲ್ಲಿ ಅಡ್ಡಾಡುತ್ತಿದ್ದರು. ಪಾಸ್‌ಪೋರ್ಟ್‌ ರದ್ದು ಪಡಿಸಿರುವುದರಿಂದ ಇನ್ನು ಮುಂದೆ ತಿರುಗಾಟ ಸಾಧ್ಯವಿಲ್ಲ.

ಕಾನೂನು ಬಾಹಿರ ಚಟುವಟಿಕೆ ಕಾಯಿದೆ ಅಡಿ ನಾಯಕ್‌ ಒಡೆತನದ ಇಸ್ಲಾಮಿಕ್‌ ರಿಸರ್ಚ್‌ ಫೌಂಡೇಷನ್‌ಅನ್ನು ಕೇಂದ್ರ ಸರಕಾರ ಈಗಾಗಲೇ ನಿಷೇಧಿಸಿದೆ.