ಲೋಕಸಭೆ ಚುನಾವಣೆ 2019: ಯಾರಿಗೆ ಸಾಲ ಮನ್ನಾ ಲಾಭ?

ಲೋಕಸಭೆ ಚುನಾವಣೆ ಹತ್ತಿರವಾಗುತ್ತಿದ್ದಂತೆ ರಾಜಕೀಯ ಪಕ್ಷಗಳ ಬತ್ತಳಿಕೆಯಲ್ಲಿ ಚುನಾವಣೆ ಅಸ್ತ್ರಗಳು ಒಂದೊಂದಾಗಿ ಸಿದ್ಧಗೊಳ್ಳುತ್ತಿವೆ. ಈ ಪೈಕಿ ರೈತರ ಸಾಲ ಮನ್ನಾ ಅತ್ಯಂತ ಹೆಚ್ಚು ಸದ್ದು ಮಾಡಲಿದೆ ಎನ್ನಲಾಗಿದೆ. ಆರಂಭದಲ್ಲಿ ಕೆಲವು ರಾಜ್ಯಗಳಲ್ಲಿ ರೈತರ ಸಾಲ ಮನ್ನಾ ಮಾಡಿದ್ದ ಬಿಜೆಪಿ ಇತ್ತೀಚೆಗೆ ಯು-ಟರ್ನ್‌ ಹೊಡೆದಿದೆ. ಸಾಲ ಮನ್ನಾದಂತಹ ಪಾಪವನ್ನು ನಾನು ಮಾಡುವುದಿಲ್ಲ ಎಂದು ಪ್ರಧಾನಿ ನರೇಂದ್ರ ಮೋದಿ ಇತ್ತೀಚೆಗೆ ಚುನಾವಣಾ ರ್ಯಾಲಿಯೊಂದರಲ್ಲಿ ಹೇಳಿಕೆ ನೀಡಿದ್ದರು. ಸಾಲ ಮನ್ನಾ ಯೋಜನೆಗಳಿಂದ ರಾಷ್ಟ್ರದ ಆರ್ಥಿಕತೆ ಮೇಲೆ ತೀವ್ರ ಹೊಡೆತ ಬೀಳಲಿದೆ ಎಂದು ರಘುರಾಮ್‌ ರಾಜನ್‌ ಸೇರಿದಂತೆ ಅನೇಕ ವಿತ್ತ ತಜ್ಞರು ಅಭಿಪ್ರಾಯ ವ್ಯಕ್ತ ಪಡಿಸಿದ್ದಾರೆ. ಆದರೆ ಪ್ರತಿಪಕ್ಷಗಳ ಸಾಲಮನ್ನಾಗೇ ಒತ್ತು ನೀಡುತ್ತಿವೆ.

ಸಾಲ ಮನ್ನಾ ಹೇಗೆ ವಿಫಲವಾಗುತ್ತಿದೆ ಎಂಬುದಕ್ಕೆ ಕರ್ನಾಟಕ ಮೈತ್ರಿ ಸರಕಾರವನ್ನು ಬೊಟ್ಟು ಮಾಡಲಾಗುತ್ತಿದೆ. ಆದರೆ ರಾಷ್ಟ್ರದಲ್ಲಿ ಕಾಂಗ್ರೆಸ್‌ ಅಧಿಕಾರಕ್ಕೆ ಬಂದರೆ ರಾಷ್ಟ್ರದ ಎಲ್ಲ ರೈತರ ಸಾಲ ಮನ್ನಾ ಮಾಡುವ ಭರವಸೆಯನ್ನ ಕಾಂಗ್ರೆಸ್‌ ನೀಡಿದೆ. ಒಟ್ಟಾರೆ ಸಾಲ ಮನ್ನಾ ಯೋಜನೆ ಅಸ್ತ್ರಗಳು ಮತದಾರರ ಮೇಲೆ ಹೇಗೆ ಪರಿಣಾಮ ಬೀರಲಿವೆ ಎಂಬ ಕುತೂಹಲ ಮನೆ ಮಾಡಿದೆ.